ބޮޑުފިނޮޅު ހަމަނުޖެހުމުގެ މައްސަލަ މަޖިލީހުގެ ކޮމިޓީން ބަލަނީ
3 ޖުލައި 2020 | ހުކުރު 17:55ފުލުހުން ދަނީ މައްސަލަ އިތުރަށް ތަހުގީގު ކުރަމުން
ބޮޑުފިނޮޅުގައި ހިނގި ހަމަނުޖެހުންތަކުގައި ހެވީލޯޑް ވެހިކަލެއްގެ ބިއްލޫރި ތާޅާލާފައި
ބ. އަތޮޅުގައި ރިސޯޓެއްގެ ގޮތުގައި ތަރައްގީ ކުރަމުންދާ ބޮޑުފިނޮޅުގައި މަސައްކަތްކުރާ ބިދޭސީންތަކެއް ކުރި ހަޅުތާލު ހޫނުވެ ދިވެހިންތަކެއް ރަހީނުކުރި މައްސަލަ ރައްޔިތުންގެ މަޖިލީހުގެ ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީން ބަލަން ނިންމައިފިއެވެ.
އެކޮމިޓީގައި ހިމެނިވަޑައިގަންނަވާ ވިލިމާލެ ދާއިރާގެ މެންބަރު އަހުމަދު އުޝާމް ރާއްޖެ.އެމްވީއަށް ދެއްވި ިއންޓަވިއުއެއްގައި ވިދާޅުވީ، އެ މައްސަލަ ތާވަލުކޮށްފައިވަނީ، ހޯމަ ދުވަހު ބާއްވަ ކޮމިޓީގެ ޖަލްސާގައި ކަމަށެވެ. އުޝާމް ވިދާޅުވީ، ކޮމިޓީން މައްސަލަ ބަލަނީ ވަރަށް ސީރިއަސް މައްސަލައެއްގެ ގޮތުގައި ކަމަށެވެ.
ބިދޭސީންގެ މައްސަލައަކީ ގިނަ ދުވަސްތަކެއް ވަންދެން ހައްލުނުވާ ދިގުލައިގެން ގޮސްފައިވާ މައްސަލައަކަށް ވާތީވެ، ޚާރިޖީ ގުޅުންތަކާއި ބެހޭ ކޮމިޓީން ދަނީ އެކަމުގައި ހިމެނޭ އިދާރާތައް ހާޒިރުކޮށް މައުލޫމާތު ސާފުކުރަމުންނެވެ.
ބޮޑުފިނޮޅުގައި ހަމަނުޖެހުން ހިންގައި، ބިދޭސީންތަކެއް ވަނީ ދިވެހިންތަކެއް ރަހީނު ކޮށްފައެވެ. އަދި އެ ރަށުގެ ވަރަށް ގިނަ ތަންތަނަކަށް ބިދޭސީން ވަނީ ވަރަށް ބޮޑަށް ގެއްލުންދީފައެވެ. ބުރާސްފަތި ދުވަހުގެރޭ ރަހީނުކުރި ދިވެހިން ސަލާމަތްކުރީ ހުކުރު ދުވަހުގެ ހެނދުނުގެ ވަގުތެއްގައި ފުލުހުން އެ ރަށަށް އަރާއެވެ. ދިވެހިން ރަހީނުކުރުމުގައި ބައިވެރިވި 19 ވަރަކަށް ބިދޭސީން ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. ފުލުހުން ދަނީ އެ މައްސަލަ އިތުރަށް ތަހުގީގު ކުރަމުންނެވެ.
