ގެޓާފޭ ބަލިކޮށް ރެއާލް މެޑްރިޑުން ސްޕެނިޝް ލީގުގެ އެއްވަނައިގައި ހަތަރު ޕޮއިންޓުގެ ލީޑެއް ނަގައިފިއެވެ.

ލީގުގައި ބުރާސްފަތި ދުވަހުގެރޭ ކުޅުނު މެޗުން ރެއާލް މޮޅުވީ 1-0 ގެ ނަތީޖާއަކުންނެވެ.

ރެއާލުގެ ދަނޑުގައި ބުރާސްފަތި ދުވަހުގެރޭ ކުޅުނު މެޗުން ރެއާލް މޮޅުވި ނަމަވެސް، އެންމެ އެދެވޭ ކުޅުމެއް ދެއްކިފައެއް ނުވެއެވެ. މި މެޗުގައި ރެއާލުން ޖެހި ހަމައެކަނި ލަނޑު މެޗުގެ 79 ވަނަ މިނެޓުގައި ކެޕްޓަން ސާޖިއޯ ރާމޯސް ކާމިޔާބުކުރީ ޕެނަލްޓީއަކުންނެވެ. މިއީ ރެއާލްގެ ޑެނީ ކަރްވަހާލްއަށް ގެޓާފޭގެ މަތިއަސް އޮލިވޭރާ ކުރި ފައުލަކަށް ރެފްރީ ދިން ޕެނަލްޓީއެކެވެ.

މި މޮޅާއެކު ރެއާލުން އެއްވަނައިގައި ހަތަރު ޕޮއިންޓުގެ ލީޑެއް ނެގީ ކުޅުނު 33 މެޗުން 74 ޕޮއިންޓް ހޯދައިގެންނެވެ. ރެއާލަށް ލީޑު ފުޅާކުރަން ފުރުސަތު ލިބުނީ ދެވަނައިގައި އޮތް ބާސެލޯނާ އަންގާރަ ދުވަހުގެރޭ ކުޅުނު މެޗުގައި އެތުލެޓިކޯ މެޑްރިޑާ 2-2 އިން އެއްވަރުވުމުންނެވެ.

ދެ ވަނައިގައި އޮތް ބާސާއަށް 33 މެޗުން 70 ޕޮއިންޓު ލިބިފައިވާއިރު، ތިން ވަނައިގައި އޮތް އެތުލެޓިކޯ މެޑްރިޑަށް ލިބިފައިވަނީ 33 މެޗުން 59 ޕޮއިންޓެވެ.