މެންޗެސްޓާ ސިޓީ އަތުން އިނގިރޭސި ޕްރިމިއާ ލީގުގެ ޗެމްޕިއަންކަން މިދިޔަ ހަފުތާގައި ކަށަވަރުކުރި ލިވަޕޫލް ބޮޑު ތަފާތަކުން ބަލިވެއްޖެއެވެ.

ޗެމްޕިއަންކަން ކަށަވަރުކުރުމަށްފަހު ކުޅުނު ފުރަތަމަ މެޗުން ލިވަޕޫލް ބަލިވީ 4-0 ގެ ނަތީޖާއަކުންނެވެ.

ހބުރާސްފަތި ދުވަހުގެރޭ ސިޓީގެ ދަނޑުގައި ކުޅުނު މި މެޗު ފެށުމުގެ ކުރިން އެޓީމުން ވަނީ، ލިވަޕޫލަށް ޗެމްޕިއަންކަން ހޯދުމުގެ ޝަރަފުގައި ގާޑް އޮފް އޮނާއެއް ދީފައެވެ.

މި މެޗުގެ ކުރީކޮޅު ލިވަޕޫލުން ގިނަ ހަމަލާތަކެއް އުފެއްދި ނަމަވެސް، ފަހުން ލިވަޕޫލްގެ ފަރާތުން ފެނިގެންދިޔައީ އާދައިގެ ކުޅުމެކެވެ.

މެޗުގައި ސިޓީން ލީޑު ނެގީ 25 މަނަ މިނެޓުގައި ކެވިން ޑި ބްރޭނާ ކާމިޔާބުކުރި ޕެނަލްޓީންނެވެ. މިއީ ސިޓީގެ ރަހީމް ސްޓާލިންއަށް ލިވަޕޫލްގެ ޖޯ ގޯމޭޒް ކުރި ފައުލަކަށް ދިން ޕެނަލްޓީއެކެވެ. އަދި އޭގެ 10 މިނެޓު ފަހުން ސިޓީން ވަނީ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ސްޓާލިންއެވެ.

އަދި ފުރަތަމަ ހާފުގެ ފަހު މިނެޓުގައި ސިޓީގެ ތިންވަނަ ލަނޑު ޖެހީ ފިލް ފޯޑެންއެވެ. ސިޓީގެ ހަތަރުވަނަ ލަނޑަކީ މެޗުގެ 66 ވަނަ މިނެޓުގައި ލިވަޕޫލުގެ އެލެކްސް އޮކްސްލޭޑް-ޗެމްބަލައިން އަތުން ބައިކޮޅަށް ވަން ލަނޑެކެވެ. މެޗުގެ އިތުރު ވަގުތުގައި ރިޔާދު މާރޭޒް އިތުރު ލަނޑެއް ކާމިޔާބުކުރި ނަމަވެސް، ކުރިން ކުރި ފައުލަކާ ގުޅިގެން ވީޑީއޯ އެސިސްޓަންޓް ރެފުރީ (ވީއޭއާރް) ން ވަނީ އެ ލަނޑު ބާތިލުކޮށްފައެވެ.

މި ނަތީޖާއާއެކު ލިވަޕޫލް އެއްވަނައިގައި އޮތީ 32 މެޗުން 86 ޕޮއިންޓާއެކުއެވެ. ދެވަނައިގައި އޮތް ސިޓީއަށް 32 މެޗުން ވަނީ 66 ޕޮއިންޓު ލިބިފައެވެ.

މީގެ އިތުރުން ލީގުގައި ބުރާސްފަތި ދުވަހުގެރޭ ޓޮޓެންހަމް ހޮޓްސްޕާ ވަނީ ޝެފީލް ޔުނައިޓެޑް އަތުން 3-1 ން ބަލިވެފައެވެ.

ޝެފީލްޑްގެ ދަނޑުގައި ކުޅުނު މި މެޗުގައި އެޓީމުގެ ފަރާތުން މޮޅު ކުޅުމެއް ފެނިގެންދިޔައިރު، މެޗުގެ 31 ވަނަ މިނެޓުގައި އެޓީމުން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ސަންޑާ ބާޖެވެ. އޭގެ ދެ މިނެޓު ފަހުން ހެރީ ކޭން ޓޮޓެންހަމަށް ނަތީޖާ އެއްވަރުކޮށްދިން ނަމަވެސް، ވީއޭއާރުން ވަނީ އެ ލަނޑި ބާތިލުކޮށްފައެވެ.

ދެވަނަ ހާފުގައިވެސް ޝެފީލްޑުން މޮޅު ކުޅުމެއް ދެއްކިއިރު، 69 ވަނަ މިނެޓުގައި ލީސް މޫސެޓް ވަނީ އެޓީމަށް ލީޑު ފުޅާކޮށްދީފައެވެ. އަދި 84 ވަނަ މިނެޓުގައި ޝެފީލްޑުގެ ތިންވަނަ ލަނޑު ކާމިޔާބުކޮށްދިނީ އިލިވިއޭ މެކްބާނީއެވެ. މި މެޗުގައި ޓޮޓެންހަމުން ކާމިޔާބުކުރި ހަމައެކަނި ލަނޑު 90 ވަނަ މިނެޓުގައި ޖަހައިދިނީ ހެރީ ކޭންއެވެ.

މި ނަތީޖާއާއެކު ޓޮޓެންހަމް އޮތީ ތާވަލުގެ ނުވަވަނައިގައި 32 މެޗުން 45 ޕޮއިންޓާއެކުއެވެ. ޓޮޓެންހަމް އަތުން މޮޅުވި ޝެފީލްޑް އޮތީ ތާވަލުގެ ހަތްވަނައިގައި 32 މެޗުން 47 ޕޮއިންޓާއެކުއެވެ.