އެފްއޭއެމްގެ މައްސަލަ މަޖިލީހަށް ބެލޭނެ ކަމަށް ގަބޫލެއް ނުކުރަން: ބައްސާމް

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ މައްސަލަ ރައްޔިތުންގެ މަޖިލީހުގެ ތެރެއިން ބެލޭނެ ކަމަށް ގަބޫލުނުކުރާ ކަމަށާއި، އެ އިދާރާގެ އެއްވެސް ކަމެއް ސީދާ ބެލޭނީ ސްޕޯޓްސް ކޮމިޝަނަށް ކަމަށް އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

އެފްއޭއެމްގެ ރައީސް ކަމަށް ދެވަނަ ދައުރަކަށް އިންތިޚާބުވުމަށްފަހު މީޑިއާ ބައްދަލުކޮށް ރާއްޖެޓީވީން ކުރި ސުވާލަކަށް ޖަވާބު ދެއްވަން ބައްސާމް ވިދާޅުވީ ކޮންމެ ގައުމެއްވެސް މި އޮންނަނީ އެކި މުއާހަދާތަކުގައި ސޮއިކޮށްފައި ކަމަށާއި، ރާއްޖެވެސް ޔޫއެން އަދި ބައިނަލްއަގުވާމީ އެތައް މުއާހަދާއެއްގައި ސޮއިކޮށްފައިވާ ކަމަށެވެ. ރާއްޖެއިން ސޮއިކޮށްފައިވާ ފީފާގެ މުއާހަދާގައި ވަރަށް ސާފުކޮށް އެފްއޭއެމްގެ ހިންގުމާ ބެހޭ ގޮތުން ބަޔާން ކޮށްފައިވާއިރު، ތިންވަނަ ފަރާތެއް އެފްއޭއެމްގެ ހިންގުމުގެ ތެރެއަށް ނުވަދެވޭނެކަން ބަޔާންކޮށްފައިވާ ކަމަށާއި، ބުރާސްފަތި ދުވަހުގެ އިންތިޚާބު ބޭއްވިގެން ދިޔައީވެސް ފީފާގެ ރުހުން ލިބުމުން ކަމަށް ބައްސާމް ވިދާޅުވިއެވެ.

ރައްޔިތުންގެ މަޖިލީހުގެ އަމީން އާންމު، ފާތިމަތު ނިޔުޝާ ސޮއިކުރައްވައި ކުޅިވަރާ ބެހޭ ވަޒީރު އަޙްމަދު މަޙްލޫފަށް ބުރާސްފަތި ދުވަހު ފޮނުއްވި ސިޓީގައި ބުނެފައިވަނީ ކުޅިވަރުގެ ޤާނޫނާ އެއްގޮތަށް ކުޅިވަރާ ބެހޭ ވުޒާރާއިން އެފްއޭއެމްއާ ދޭތެރޭ ފިޔަވަޅު އަޅާފައިނުވާތީވެ، އެސޯސިއޭޝަނާ މެދު ޤާނޫނުގައިވާ ގޮތުގެ މަތިން ފިޔަވަޅު އަޅުއްވައި ދެއްވުމަށް އެދި، މެދުހެންވޭރު ދާއިރާގެ މެންބަރު އަލީ އާޒިމް ރައްޔިތުންގެ މަޖިލީހަށް ހުށަހަޅާފައިވާ މައްސަލައެއް އިޖުތިމާޢީ ކޮމިޓީން ދިރާސާކުރަމުން އަންނަ ކަމަށެވެ. އެހެންވެ އެ މައްސަލަ އެ ކޮމިޓީން ދިރާސާކޮށް ނިމެންދެން، އެ އެސޯސިއޭޝަނުގެ އިންތިޚާބު ފަސްކޮށްދިނުމަށް އެ ކޮމިޓީން އެދިވަޑައިގަންނަވާތީ، އެ ވާހަކަ ދަންނަވާ ކަމަށެވެ.

މަޖިލީހުގެ އަމީން އާންމުގެ ސިޓީއާ ގުޅިގެން ވުޒާރާއިން ބުރާސްފަތި ދުވަހުގެ މެންދުރު އެފްއޭއެމަށް ފޮނުވި ސިޓީގައި ބުނެފައިވަނީ، ކޮމިޓީން އެދިފައިވާ ގޮތަށް އެ މައްސަލަ ދިރާސާކޮށް ނިމެންދެން، އިންތިޚާބު ފަސްކުރަން އެދޭ ކަމަށެވެ.

މިކަމާއި ގުޅިގެން ބައްސާމް ވިދާޅުވީ އިންތިޚާބު ފަސްކުރުމަށް އެދި ވުޒާރާގެ ސިޓީއެއް ލިބުނު ކަމަށާއި، އަދި ސީދާ ވަޒީރު ފޯނުން ގުޅައި އިންތިޚާބު މަޑުޖައްސާލުމަށް އެދުނު ކަމަށެވެ.

ސްޕޯޓްސް ކޮމިޝަނަރު މެދުވެރިކޮށް އެފްއޭއެމްގެ ކަންކަން ބެލޭނެ ކަމަށް ގަބޫލުކުރައްވާ ކަމަށާއި، މަޖިލީހުން ބަލަމުންދާ މައްސަލައަށް އެ އިދާރާއަށް ފީފާގެ އުސޫލުތަކާއި ގަވާއިދުތަކަށް ބަލާއިރު ދާންނުޖެހޭ ކަމަށް ބައްސާމް ވިދާޅުވިއެވެ. އެހެން ނަމަވެސް ގަދަ ބަޔަކަށްވެ، ގަދަ ބަސް ބުނެ ނުދާން ޖެހޭ އެއްވެސް ސަބަބެއް ނެތް ކަމަށާއި، އެފްއޭއެމް އޮތީ ދާންޖެހޭ ކޮންމެތާކަށް ދާން ތައްޔާރަށްކަން ހާމަކުރަމުން ބައްސާމް ވިދާޅުވީ އެފްއޭއެމްއާ ގުޅޭގޮތުން ކޮންމެ ކަމެއްވެސް ސާފުކޮށްދިނުމަށް ތައްޔާރު ކަމަށެވެ.

އެފްއޭއެމްގެ ކޮންގްރެސް ކުރިއަށްދިޔައިރު ސްޕޯޓްސް ކޮމިޝަނުގެ އޮބްޒާވަރުން ތިބީ އޮންލައިންކޮށް ކަމަށާއި، ހަމަ އެގޮތަށް އޮލިމްޕިކް ކޮމިޓީ އާއި ފީފާއިން ދިޔައީ ކޮންގްރެސް ބަލަމުން ކަމަށް ބައްސާމް ވިދާޅުވިއެވެ.

ސިޔާސީ ނުފޫޒުން އެފްއޭއެމް އެއްކިބާ ކުރުމަށް މިއަދުވެސް ހުރިހާ ފަރާތްތަކަށް ގޮވާލާއިރު، އެއްވެސް މައްސަލައެއް ބަލާނަމަ ސްޕޯޓްސް ކޮމިޝަން މެދުވެރިކޮށް އެކަކުރަން އެފްއޭއެމުން އަބަދުވެސް މަރުޙަބާ ކިޔާނެ ކަމަށާއި، ކޮންމެ ވަގުތެއްގައި ވެސް ސްޕޯޓްސް ކޮމިޝަނަރަށް އެފްއޭއެމް ހުންނާނީ ހުޅުވިފައި ކަމަށް ބައްސާމް ވިދާޅުވިއެވެ.

އެފްއޭއެމްގެ އިންތިޚާބު ބޭއްވީ ސަރުކާރަށް ގޮންޖަހާފައި ގަވާއިދާ ޚިލާފަށް އާޒިމް ވަނީ ބުރާސްފަތި ދުވަހު ވިދާޅުވެފައެވެ. އެފްއޭއެމްގެ އިންތިޚާބާ ގުޅިގެން އާޒިމް ކުރެއްވި ޓްވީޓެއްގައި ވިދާޅުވީ ސަރުކާރަށް ގޮންޖަހާފައި އެފްއޭއެމްގެ އިންތިޚާބު ބޭއްވީ ޤާނޫނާއި ޤާނޫނުން ބާރު ލިބިގެން ހަދާފައިވާ ގަވާއިދާ ޚިލާފަށް ކަމަށެވެ. އެހެންކަމުން އެފްއޭއެމްގެ އިންތިޚާބަކީ ބާތިލު އިންތިޚާބެއްކަން ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވާން ޖެހޭ ކަމަށާއި، ރައްޔިތުން ބޭނުންވަނީ ޤާނޫނީ ދައުލަތެއް މިގައުމުގައި ހިނގަން ކަމަށް އާޒިމް ވިދާޅުވިއެވެ.