ރައްޔިތުންގެ މަޖިލީހުގެ ރައީސް، މައިމޫނާއަށް ތައުރީފު ކުރައްވައިފި
ޖާބިރު ވަނީ މައިމޫނާ ހައްޔަރު ކުރުމަށް ގޮވާލައްވާފަ
ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރު: އާންމު ސިއްހަތު ރައްކާތެރި ކުރުމުގެ ގޮތުން އަޅަންޖެހޭ ފިޔަވަޅުތައް އެޅުމުގައި ބޮޑެތި ބާރުތަކެއް ލިބިދީފައިވޭ
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު، ހެލްތް ޕްރޮޓެކްޝަން އެޖޭންސީ (އެޗްޕީއޭ) ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރަށް ތައުރީފު ކުރައްވައިފިއެވެ.
ޑިރެކްޓަރ ޖެނެރަލް އޮފް ޕަބްލިކް ހެލްތްގެ މަގާމަކީ، އާންމު ސިއްހަތު ރައްކާތެރިކުރުމުގެ ގާނޫނުގެ ދަށުން އުފައްދާފައިވާ ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ އެންމެ އިސްވެރިޔާއެވެ.
އަންގާރަ ދުވަހުގެ މަޖިލީހުގެ ޖަލްސާގެ ރިޔާސަތުގައި އިންނެވި، މަޖިލީހުގެ ރައީސް މައުމޫނާއަށް ތައުރީފު ކުރެއްވީ، އާންމު ސިއްހަތު ރައްކާތެރިކުރުމުގެ ގާނޫނަށް އިސްލާހު ގެނައުމުގެ ބިލަށް ބަހުސް ކުރެއްވުމަށް ހުޅުވާލި ފުރުސަތުގައި، ކާށިދޫ ދާއިރާގެ މެމްބަރު އަބްދުﷲ ޖާބިރު، މައިމޫނާ އަށް ވަރަށް ބޮޑަށް ފާޑު ވިދާޅުވެ ވާހަކަ ދެއްކުވެމާއި ގުޅިގެންނެވެ.
ޖާބިރުގެ އެވާހަކަތައް މެދުކަނޑާލައްވައި، މަޖިލީހުގެ ރައީސް ނަޝީދު ވިދާޅުވީ، ކޮވިޑް-19 ރޯގާ ރާއްޖޭގައި ފެތުރުން ކޮންޓްރޯލް ކުރުމަށް ހަރުދަނާ ފިޔަވަޅުތަކެއް ޑިރެކްޓަރ ޖެނެރަލް އޮފް ޕަބްލިކް ހެލްތް މައުމޫނާ އަޅުއްވާފައިވާ ކަމަށެވެ.
އާންމު ސިއްހަތު ރައްކާތެރިކުރުމުގެ ގާނޫނަށް ބޮޑެތި ބަދަލުތަކެއް ނުވަތަ މުޅި ގާނޫނު އިސްލާހު ކުރުމަށް ބައެއް މެމްބަރުން އެ ބިލަށް ބަހުސް ކުރައްވަމުން ވިދާޅުވެފައިވެއެވެ.
ރާއްޖެއިން ކޮވިޑް-19 އަށް ފުރަތަމަ މީހަކު ޕޮޒިޓިވް ވެފައިވަނީ މާރޗު މަހުގެ 7 ވަނަ ދުވަހުއެވެ.
އާންމު ސިއްހަތުގެ ކުއްލި ނުރައްކަލުގެ ހާލަތު ރާއްޖޭގައި އިއުލާން ކުރީ މާރޗު މަހުގެ 12 ވަނަ ދުވަހުއެވެ. އޭރު އިއުލާން ކުރި އާންމު ސިއްހަތުގެ ކުއްލި ނުރައްކަލުގެ އެކި ފަހަރުމަތިން އިތުރުކޮށް، މިހާރު އެ މުއްދަތު އިތުރުކޮށްފައިވަނީ ޖުލައި މަހުގެ 14 ވަނަ ދުވަހަށެވެ.
މާލެ ސަރަހައްދުގައި ކޮވިޑް-19 ފެތުރެން ފެށުމާ ގުޅިގެން މާލެ ސަރަހަައްދު ފުރަބަންދު ކުރީ އޭޕްރީލް މަހުގެ 15 ވަނަ ދުވަހުއެވެ.
ރާއްޖޭގައި މިހާތަނަށް ކޮވިޑް-19އަށް ޕޮޒިޓިވް ވެފައިވަނީ 2336 މީހެކެވެ. މި ބަލިން 1927 މީހަކު ރަނގަޅު ވެފައިވާއިރު، މިހާރު ފަރުވާ ދެމުންދަނީ 396 މީހަކަށެވެ. މިބަލީގައި ރާއްޖެއިން މިހާތަނަށް މަރުވެފައިވަނީ، 8 މީހުންނެވެ.
