ރިސޯޓުތަކާއި ބިންތަކުގެ ކުލި 01 އަހަރު ދުވަހަށް ފަސްކޮށްދެނީ
ރިސޯޓުތަކުގެ ކުލި 1 ޖޫން 2021 އިން ފެށިގެން ދެއްކުމަށް ފަސްކުރަން ނިންމާފައިވޭ
ރާއްޖޭގެ ރިސޯޓެއް
ކޮވިޑް-19 ގެ ބަލިމަޑުކަމާއި އެކު އިޤްތިސާދަށް ދިމާވެފައިވާ ތަދުމަޑުކަމާއި މި ބަލި ފެތުރުން ކޮންޓްރޯލް ކުރުމަށްޓަކައި އަޅާފައިވާ ފިޔަވަޅުތަކުގެ ސަބަބުން ވިޔަފާރިތަކުގެ ހިންގުމަށް ދަތިވެ، ވިޔަފާރިއާއި ރައްޔިތުންނަށް މާލީ ހީނަރުކަމާއި ކުރިމަތިލާން ޖެހުމާއި ގުޅިގެން ރިސޯޓުތަކާއި ބިންތަކުގެ ކުލި 01 އަހަރު ދުވަހަށް ފަސްކޮށްދޭން ނިންމައިފިއެވެ.
ފިނޭންސް މިނިސްޓްރީން ބުނީ މި ދަތި އުނދަގޫ ދަނޑިވަޅުގައި ވިޔަފާރިތަކަށާއި އާންމު ރައްޔިތުންނަށް އެހީވުމަށާއި ވިޔަފާރި ދެމެހެއްޓުމަށްޓަކައި ސަރުކާރުން ގެންދަނީ މާލީ އެހީތެރިކަމާއި އިތުރު ލުއިތައް ފޯރުކޮށްދެމުން ކަމަށެވެ.
އެގޮތުން 2020 ވަނަ އަހަރުގެ ތިންވަނަ ކުއާޓަރާއި ހަތަރުވަނަ ކުއާޓަރަށް ނިސްބަތްވާ ރިސޯޓްތަކުގެ ކުލި 1 ޖޫން 2021ން ފެށިގެން ދެއްކުމަށް ފަސްކުރަން ނިންމާފައިވާ ކަމަށެވެ.
އަދި ޖޫން 2020ން ޑިސެމްބަރު 2020 އާ ދެމެދު ދައްކަންޖެހޭ ބިމުކުލި 1 ޖޫން 2021ން ފެށިގެން ދެއްކުމަށް ފަސްކުރަން ނިންމާފައިވާ ކަމަށެވެ.
އަދި މި ފަސްކޮށްދޭ ކުލި އަނބުރާ ދެއްކުމަށް ހަމަޖެހިފައިވަނީ 1 އަހަރުގެ މުއްދަތަށް ބަހާލައިގެން ކަމަށް މިނިސްޓްރީން މައުލޫމާތު ދެއެވެ.
މިގޮތުން ތިންމަހުން އެއްމަހު ނަމަ ފަސްކޮށްދީފައިވާ މުއްދަތުގެ ކުލި ދައްކަން ޖެހޭނީ 01 ޖޫން 2021ން ފެށިގެން 4 ކުއާޓަރަށް (ޖޫން 2021، ސެޕްޓެމްބަރު 2021، ޑިސެމްބަރު 2021، މާރޗް 2022) ބަހާލައިގެންނެވެ.
އަދި ކުލި ދައްކަނީ މަހުން މަހަށް ނަމަ، ފަސްކޮށްދީފައިވާ މުއްދަތުގެ ކުލި ދައްކާނީ 1 ޖޫން 2021ން ފެށިގެން 12 މަސް ދުވަހަށް ބަހާލައިގެންނެވެ.
ކުލި ދެއްކުން ފަސްކޮށްދިން މުއްދަތުގެ ތެރޭގައި ފައިސާ ނުދެއްކިޔަސް ޖޫރިމަނާއެއް ނުހިނގާނެ ކަމަށާއި މިގޮތަށް ފަސްކޮށްދޭ ފައިސާ ނުދެއްކުމާއި ގުޅިގެން އަރާ ޖޫރިމަނާ އާއި އިންޓްރެސްޓް ހިނގަން ފަށާނީ އަލުން ފައިސާ ދައްކަންޖެހޭ މުއްދަތުގައި (1 ޖޫން 2021ން ފެށިގެން) އެ ފައިސާ ދެއްކުމަށް ކަނޑައަޅާފައިވާ ސުންގަޑިއަށް ފައިސާ ނުދައްކާނަމަ ކަމަށް ފިނޭންސް މިނިސްޓްރީން މައުލޫމާތު ދެއެވެ.
މިނިސްޓްރީން ބުނީ ފަސްކޮށްދީފައިވާ ކުލީގެ ތެރޭގައި ހިމެނެނީ އެކި މިނިސްޓްރީ ތަކުންނާއި އެ މިނިސްޓްރީގެ ދަށުން ހިންގާ އެހެނިހެން އޮފީސްތަކާއި މިނިސްޓްރީތަކުން ހިންގާ ޓްރަސްޓް ފަންޑުތަކުން (ޒަކާތު ފަނޑު ފިޔަވައި) ނަގާ ކުލި ކަމަށެވެ.
މިނިސްޓްރީން ހާމަކޮށްފައިވާ ގޮތަށް ކުލި ދެއްކުމަށް ލުއި ދިނުމުގެ ސަބަބުން ކުއްޔަށް ހިފާފައިވާ ފަރާތާއި ސަރުކާރާއެކު ވެފައިވާ ކުލީގެ އެއްބަސްވުމެއް އިސްލާހު ކުރަން ޖެހޭނަމަ އެ އިސްލާހުތައް ގެނައުމަށް ވަނީ އެދިފައެވެ.
