2019 ވަނަ އަހަރުގެ މެދުތެރެގޭގައި އޮޅުވާލައިގެން ރާއްޖެއަށް ވަގަށް ވެހިކަލްތަކެއް އެތެރެކުރި މައްސަލައިގައި، ކަސްޓަމްސްގެ އެއްވެސް ކޮންޓްރޯލް އޭރިއާއަކަށް ނުވަދޭވޭގޮތަށް ބްރޯކަރެއް ސަސްޕެންޑް ކޮށްފައިވާ ކަމަށް ކަސްޓަމްސްއިން ބުނެފިއެވެ.
2019 ވަނަ އަހަރުގެ އޮގަސްޓް މަހުގެ ތެރޭގައި އޮޅުވާލައިގެން ސައިކަލާއި، ވޭން ފަދަ އުޅަނދުތައް ވަނީ އެތެރެކޮށްފައެވެ. މި މައްސަލައިގައި ކަސްޓަމްސްއިން ބުނެފައިވާ ގޮތުގައި ރާއްޖެއަށް ލަކުޑި އެތެރެ ކުރުމުގެ ނަމުގައި ގެނައި ދެ ކޮންޓެއިނަރަކުން ތިން ކާރާއި ދެ ޕިކަޕާއި ދެ ވޭނާއި 14 ސައިކަލް ކަސްޓަމްސްގެ ބެލުމުގެ ދަށަށް ގެންގޮސްފައިވެއެވެ. އަދި މި ވެހިކަލްތަކުގެ ސީއެންޑްއެފް އަގު 586،000 ރުފިޔާއަށް އަރާނެ ކަމަށް ލަފާ ކުރެވޭ ކަމަށްވެސް ކަސްޓަމްސްއިން އޭރު ނެރުނު ބަޔާނުގައި ބުނެފައިވެއެވެ.
ރާއްޖެޓީވީގެ ފަލަ ސުރުޚީ ޕްރޮގްރާމުގައި ވާހަކަދައްކަވަމުން ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފް ވިދާޅުވީ މި މައްސަލައިގައި މިހާތަނަށް 2 މުވައްޒަފަކު ވަޒީފާއިން ވަކިކޮށްފައިވާ ކަމަށާއި، އަދިވެސް މައްސަލަ ބަލަމުން އަންނަ ކަމަށެވެ.
ޝަރީފް ވިދާޅުވީ މި މައްސަލައާއި ގުޅިގެން، އެކަމުގައި ޝާމިލުވާ ބްރޯކަރު ސަސްޕެންޑްކޮށް ކަސްޓަމްސްގެ އެއްވެސް ކޮންޓްރޯލް އޭރިއާއަކަށް ނުވަދެވޭގޮތަށް ނިންމާފައިވާ ކަމަށެވެ. އެކަމަކު އެއީ ކޮން ވިޔަފާރިއެއްގެ ބްރޯކަރެއް ކަމެއް ޝަރީފް ވިދާޅެއްނުވެއެވެ.
ވަގަށް ވެހިކަލް އެތެރެކުރި މައްސަލައާ ގުޅިގެން އެ މުދާ ކްލިއަރ ކުރަން އުޅުނު ފަރާތް އަޅުގަނޑުމެން ވާނީ ކަސްޓަމްސްގެ އެއްވެސް ކޮންޓްރޯލް އޭރިއާއަކަށް ނުވަދެވޭ ގޮތަށް ސަސްޕެންޑް ކޮށްފައި. އަޅުގަނޑުމެން މިތިބީ ވިޔަފާރިވެރިންނަށްވެސް އެހީތެރިކަން ދޭން. އެއްވެސް ކަހަލަ ކަމެއް ހިނގާނަމަ އަޅުގަނޑުމެންނަށް އަންގާދަލެއްވޭ. އަޅުގަނޑުމެން މިތިބީ ވަރަށް ސާބިތުކަމާއެކީގައި ކަސްޓަމްވެސް، އެމްޕީއެލްވެސް އެ ބޭފުޅުން މުދާ ކްލިއަރ ކޮށްގެންދާއިރު ކަސްޓަމްސް މުވައްޒަފުންނަށް ސަޔެއް، އެމްޕީއެލް މުވައްޒަފުންނަށް ސަޔެއް ގޮތުގައި އެ ދޭ ލާރިއަކީ ކްލިއަރ ކުރަން އަންނަ ފަރާތުން ދޭ ފައިސާއެއް ނޫން. އެ ފައިސާ އެބޭފުޅުންނަށް ނުދޭށޭ. އެއީ އެބޭފުޅުން ކޮންމެވެސް ބޭނުމެއްގައި ނަގާ އެއްޗެއް. އެކަހަލަ ކަންތައްތައް ހުއްޓޭނީ މުޅި މުޖުތަމައު އެއްބާރުލުން ދީގެން. ކޮމާޝަލް ހާބަރުގައި މަސައްކަތް ކުރާ އެންމެންނަކީ އެކަތިގަނޑަކަށް ވެގެން މަސައްކަތް ކުރަން ޖެހޭ ބައެއް.ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފް
ޝަރީފް ވިދާޅުވީ ކޮރަޕްޝަން ނައްތާލުމަށް ކަސްޓަމްސްގެ ހުރިހާ މުވައްޒަފުން ވެސް މަސައްކަތް ކޮށްދެއްވާނެ ކަމަށެވެ. އަދި ވިދާޅުވީ އާންމުކޮށް މުދާ ކްލިއަރ ކުރަން އަންނަ ބްރޯކަރުންނާއި، މަޖޫރީންގެ ފަރާތުންވެސް ގަބޫލު ނުކުރެވޭ ކަންކަން ފެންނަމުންދާ ކަމަށެވެ.
ހުރިހާ ވިޔަފާރިވެރިންނަށް މި ދަންނަވާލަނީ އެބޭފުޅުންވެސް އަދި މަޖޫރީންވެސް ކަސްޓަމްސް އެމްޕީއެލް ސަޔަށޭ ކިޔާފައި ބިލުގައި ބައިވަރު ލާރިތަކެއް ޖަހައިގެން އެ ފައިސާ ނުދީ ހުރޭ. އަޅުގަނޑު ޔަގީންކަން މިދެނީ ކަސްޓަމްސްގެ އެއްވެސް ކަމެއް ނިންމާކަށް ކަސްޓަމްސްގެ އޮފިސަރަކަށް ބައި ލާރިވެސް ދޭކަށް ނުޖެހޭނެ. އެއީ ދަރުލަތުން އެ މުސާރަ ދޭނެ. އެކަހަލަ ކަމެއް އުޅޭނަމަ އަންގާދެއްވާ. އަޅުގަނޑުމެން ވަގުތުން އެކަމާ ދޭތެރޭގައި ފިޔަވަޅު އަޅާނަން. މިހެން ހިނގާ ކަންތައްތަކުގައި އަޅުގަނޑުމެންނަށް މައުލޫމާތުދޭ ބޭފުޅުން ވެސް އެބަތިބި މި ކަންތައްތަކުގައި. މުޅި މުޖުތަމައުއަށް ބަލާއިރު، އަދިވެސް ކޮންމެވެސް ވަރެއްގެ ހިފަހެއްޓުމެއް އެބަހުރި މި ކަންތައްތަކުގައި.ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފް
ޝަރީފް ވިދާޅުވީ މި މައްސަލަ ބެލުމުގައި ކަމާބެހޭ ހުރިހާ ފަރާތްތަކެއްގެ އެއްބާރުލުން ލިބެމުންދާ ކަމަށެވެ. އަދި ހާއްސަކޮށް ފުލުހުންގެ ފަރާތުން މިކަމުގައި ފުރިހަމަ އެއްބާރުލުން ލިބެމުންދާ ކަމަށެވެ.
ވަގަށް ވެހިކަލްތައް އެތެރެކުރި މައްސަލައިގައި ޓްރާންސްޕޯޓް މިނިސްޓްރީއަށް ވެސް ޝަރީފް ވަނީ ތުހުމަތުތަކެއް ކުރައްވާފައެވެ. އެގޮތުން ފޯޖް ޑޮކިއުމެންޓްތައް ގެންދިއުމުން އެ ބަލައިގަނެ ވެހިކަލްތައް ރަޖިސްޓްރީ ކުރުމުގައި ޓްރާންސްޕޯޓް މުވައްޒަފުންގެ އަތެއްވާ ކަމަށް ޝަރީފް ވިދާޅުވިއެވެ.
