ވަގަށް ވެހިކަލް އެތެރެކުރި މައްސަލައިގައި ކަސްޓަމްސްގެ ކޮންޓްރޯލް އޭރިއާއަށް ނުވަދެވޭ ގޮތަށް ބްރޯކަރެއް ސަސްޕެންޑް ކޮށްފި
ވަގަށް ވެހިކަލް އެތެރެކުރީ މިދިޔަ އަހަރުގެ އޮގަސްޓް މަހުގެ ތެރޭގައި
އެމްޕީއެލްގެ މާލޭ ކޮމާޝަލް ބަނދަރަށް ގެނެސްފައިވާ މުދާ ހުސްކުރުމުގެ މަސައްކަތުގައި ބަޔަކު ހަރަކާތްތެރިވަނީ
2019 ވަނަ އަހަރުގެ މެދުތެރެގޭގައި އޮޅުވާލައިގެން ރާއްޖެއަށް ވަގަށް ވެހިކަލްތަކެއް އެތެރެކުރި މައްސަލައިގައި، ކަސްޓަމްސްގެ އެއްވެސް ކޮންޓްރޯލް އޭރިއާއަކަށް ނުވަދޭވޭގޮތަށް ބްރޯކަރެއް ސަސްޕެންޑް ކޮށްފައިވާ ކަމަށް ކަސްޓަމްސްއިން ބުނެފިއެވެ.
2019 ވަނަ އަހަރުގެ އޮގަސްޓް މަހުގެ ތެރޭގައި އޮޅުވާލައިގެން ސައިކަލާއި، ވޭން ފަދަ އުޅަނދުތައް ވަނީ އެތެރެކޮށްފައެވެ. މި މައްސަލައިގައި ކަސްޓަމްސްއިން ބުނެފައިވާ ގޮތުގައި ރާއްޖެއަށް ލަކުޑި އެތެރެ ކުރުމުގެ ނަމުގައި ގެނައި ދެ ކޮންޓެއިނަރަކުން ތިން ކާރާއި ދެ ޕިކަޕާއި ދެ ވޭނާއި 14 ސައިކަލް ކަސްޓަމްސްގެ ބެލުމުގެ ދަށަށް ގެންގޮސްފައިވެއެވެ. އަދި މި ވެހިކަލްތަކުގެ ސީއެންޑްއެފް އަގު 586،000 ރުފިޔާއަށް އަރާނެ ކަމަށް ލަފާ ކުރެވޭ ކަމަށްވެސް ކަސްޓަމްސްއިން އޭރު ނެރުނު ބަޔާނުގައި ބުނެފައިވެއެވެ.
ރާއްޖެޓީވީގެ ފަލަ ސުރުޚީ ޕްރޮގްރާމުގައި ވާހަކަދައްކަވަމުން ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފް ވިދާޅުވީ މި މައްސަލައިގައި މިހާތަނަށް 2 މުވައްޒަފަކު ވަޒީފާއިން ވަކިކޮށްފައިވާ ކަމަށާއި، އަދިވެސް މައްސަލަ ބަލަމުން އަންނަ ކަމަށެވެ.
ޝަރީފް ވިދާޅުވީ މި މައްސަލައާއި ގުޅިގެން، އެކަމުގައި ޝާމިލުވާ ބްރޯކަރު ސަސްޕެންޑްކޮށް ކަސްޓަމްސްގެ އެއްވެސް ކޮންޓްރޯލް އޭރިއާއަކަށް ނުވަދެވޭގޮތަށް ނިންމާފައިވާ ކަމަށެވެ. އެކަމަކު އެއީ ކޮން ވިޔަފާރިއެއްގެ ބްރޯކަރެއް ކަމެއް ޝަރީފް ވިދާޅެއްނުވެއެވެ.
ޝަރީފް ވިދާޅުވީ ކޮރަޕްޝަން ނައްތާލުމަށް ކަސްޓަމްސްގެ ހުރިހާ މުވައްޒަފުން ވެސް މަސައްކަތް ކޮށްދެއްވާނެ ކަމަށެވެ. އަދި ވިދާޅުވީ އާންމުކޮށް މުދާ ކްލިއަރ ކުރަން އަންނަ ބްރޯކަރުންނާއި، މަޖޫރީންގެ ފަރާތުންވެސް ގަބޫލު ނުކުރެވޭ ކަންކަން ފެންނަމުންދާ ކަމަށެވެ.
ޝަރީފް ވިދާޅުވީ މި މައްސަލަ ބެލުމުގައި ކަމާބެހޭ ހުރިހާ ފަރާތްތަކެއްގެ އެއްބާރުލުން ލިބެމުންދާ ކަމަށެވެ. އަދި ހާއްސަކޮށް ފުލުހުންގެ ފަރާތުން މިކަމުގައި ފުރިހަމަ އެއްބާރުލުން ލިބެމުންދާ ކަމަށެވެ.
ވަގަށް ވެހިކަލްތައް އެތެރެކުރި މައްސަލައިގައި ޓްރާންސްޕޯޓް މިނިސްޓްރީއަށް ވެސް ޝަރީފް ވަނީ ތުހުމަތުތަކެއް ކުރައްވާފައެވެ. އެގޮތުން ފޯޖް ޑޮކިއުމެންޓްތައް ގެންދިއުމުން އެ ބަލައިގަނެ ވެހިކަލްތައް ރަޖިސްޓްރީ ކުރުމުގައި ޓްރާންސްޕޯޓް މުވައްޒަފުންގެ އަތެއްވާ ކަމަށް ޝަރީފް ވިދާޅުވިއެވެ.
