ޕީއެސްޖީ އާއި ޓުލޫސްގެ ކުޅުންތެރިން ކޮރޯނާވައިރަހަށް ޕޮޒިޓިވް ވެއްޖެ

ފްރާންސްގެ ޕީއެސްޖީ އާއި ޓުލޫސްގެ ކުޅުންތެރިން ކޮރޯނާވައިރަސް (ކޮވިޑް-19) ށް ޕޮޒިޓިވް ވެއްޖެއެވެ.

ސެޕްޓެމްބަރު މަހުގެ ކުރިން މީހުން އެއްވެ އުޅެ ކުރިއަށް ގެންދާ އެއްވެސް ހަރަކާތެއް ނުބޭއްވޭނެ ކަމަށް ފްރާންސް ސަރުކާރުން ނިންމުމާއެކު މި ސީޒަނުގެ ފްރެންޗު ލީގު ވަނީ ކެންސަލް ކޮށްފައެވެ.

މި ސީޒަނުގެ ފްރެންޗު ލީގު ކެންސަލް ކޮށް ޕީއެސްޖީއަށް ޗެމްޕިއަންކަން ދީފައިވީ ނަމަވެސް، މި ސީޒަނުގެ ޔުއެފާ ޗެމްޕިއަންސް ލީގުގައި ޕީއެސްޖީން އަދި ވާދަކުރާނެއެވެ. އެގޮތުން އޮގަސްޓް މަހު އަލުން ފަށާ ޗެމްޕިއަންސް ލީގުގެ މެޗުތަކަށް ތައްޔާރުވުމަށް ޕީއެސްޖީން ފަރިތަކުރުންތައް ފެށުމުގެ ކުރިން ވަނީ ކުޅުންތެރިންނާއި އޮފިޝަލުން ކޮވިޑް-19 ށް ޓެސްޓު ކޮށްފައެވެ.

އެގޮތުން ކުރިއަށް ގެންދިޔަ ޓެސްޓުތަކުން އެ ކްލަބުގެ ތިން ކުޅުންތެރިއަކާއި އޮފިޝަލަކު ވައިރަހަށް ޕޮޒިޓިވް ވިކަން ޕީއެސްޖީން ވަނީ ހާމަކޮށްފައެވެ. އެކަމަކު އެ ކުޅުންތެރިންގެ ނަންތައް އެ ކްލަބުން ހާމަކޮށްފައެއް ނުވެއެވެ.

އަދި މި ސީޒަނުގެ ފްރެންޗު ލީގު ކެންސަލް ކުރުމާއެކު ދެވަނަ ޑިވިޝަނަށް ރެލިގޭޓްވި ޓުލޫސްއިން ހޯމަ ދުވަހު ވަނީ ފަރިތަކުރުންތައް އަލުން ފެށުމުގެ ކުރިން ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކޮށްފައެވެ. ރިޕޯޓުތައް ބުނާ ގޮތުން ޓުލޫސްއިން ކުރިއަށް ގެންދިޔަ ޓެސްޓު ތަކުން އެ ކްލަބުގެ ހަތަރު ކުޅުންތެރިއަކު ވަނީ ކޮވިޑް-19ށް ޕޮޒިޓިވް ވެފައެވެ.

ޕީއެސްޖީ އާއި ޓުލޫސްއިންވެސް ކޮވިޑް-19ށް ޕޮޒިޓިވްވި ކުޅުންތެރިންގެ ނަންތައް ހާމަނުކުރި ނަމަވެސް، އެ ހުރިހާ ކުޅުންތެރިންވެސް މިހާރު އައިސޮލޭޝަނަށް ބަދަލުކޮށްފައިވާކަން ވަނީ ހާމަކޮށްފައެވެ. އަދި ހަ ދުވަސް ފަހުން އަނެއްކާވެސް އެ ދެ ޓީމުގެ ހުރިހާ ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކުރާނެކަން ވަނީ ހާމަކޮށްފައެވެ.

ކޮވިޑް-19 އާ ގުޅިގެން މި ސީޒަނުގެ ފްރެންޗު ލީގު ކެންސަލް ކުރިއިރު، ފްރެންޗު ލީގަކީ ޔޫރަޕުގެ ގަދަ ފަސް ލީގުގެ ތެރެއިން ކެންސަލް ކުރި ހަމައެކަނި ލީގެވެ.