އަންހެނުންގެ ވޯލްޑް ކަޕަށް ބިޑް ނުކުރަން ޖަޕާނުންވެސް ނިންމަނީ

2023 ވަނަ އަހަރު ބޭއްވުމަށް ހަމަޖެހިފައިވާ ފީފާ އަންހެނުންގެ ވޯލްޑް ކަޕަށް ބިޑް ނުކުރަން ޖަޕާނުންވެސް ނިންމާނެ ކަމަށް އެ ގައުމުގެ މީޑިއާތަކުން ރިޕޯޓުކޮށްފިއެވެ.

32 ގައުމު ވާދަކުރާ 2023 ވަނަ އަހަރުގެ އަންހެނުންގެ ވޯލްޑް ކަޕް ބޭއްވުމަށް ބިޑް ކޮށްފައިވާ ގައުމުތަކުގެ މެދުގައި ވޯޓުލުން ކުރިޔަށް ދާނީ އަންނަ ބުރާސްފަތި ދުވަހެވެ.

މީގެ ކުރިން އަންހެނުންގެ ވޯލްޑް ކަޕް ބޭއްވުމަށް ބިޑް ކުރާނެ ކަމަށް އިއުލާން ކޮށްފައިވަނީ ބްރެޒިލް، ކޮލަމްބިއާ، ޖަޕާން އަދި އޮސްޓްރޭލިއާ އާއި ނިއުޒިލޭންޑް (ޖޮއިންޓް ބިޑުގެ އުސޫލުން) ނެވެ. މީގެ ތެރެއިން ބްރެޒިލުން ދާދި ފަހުން ވަނީ އަންހެނުންގެ ވޯލްޑް ކަޕް ބޭއްވުމަށް ބިޑް ނުކުރާނެކަން ހާމަކޮށްފައެވެ. އޭގެ ބަދަލުގައި ކޮލަމްބިއާއިން ކޮށްފައިވާ ބިޑަށް އެއްބާރުލުން ދޭން ނިންމާފައިވާ ކަމަށްވެސް ބްރެޒިލުން ވަނީ ހާމަކޮށްފައެވެ.

ޖަޕާންގެ މީޑިއާ ރިޕޯޓުތައް ބުނި ގޮތުން އަންހެނުންގެ ވޯލްޑް ކަޕް ބޭއްވުމަށް ބިޑް ނުކުރަން ޖަޕާނުގެ ފުޓްބޯލް އެސޯސިއޭޝަނުން މިހާރު ވަނީ ނިންމާފައެވެ. ސަބަބަކީ ކޮރޯނާވައިރަސް (ކޮވިޑް-19) ގެ ސަބަބުން އެ ގައުމަށް ދިމާވެފައިވާ މާލީ ހާލަތުގެ ސަބަބުން، އަންހެނުންގެ ވޯލްޑް ކަޕަށް ބޮޑު ޚަރަދެއް ނުކުރެވޭނެތީއެވެ.

ޖަޕާނަށް ދިމާވެފައިވާ މާލީ ގޮންޖެހުންތަކާއެކު 2023 ވަނަ އަހަރުގެ އަންހެނުންގެ ވޯލްޑް ކަޕް ބޭއްވުމަށް ބިޑް ނުކުރަން ނިންމި ކަމަށް ރިޕޯޓުތައް ބުނިއިރު، މިއަހަރު އެ ގައުމުގައި ބޭއްވުމަށް ހަމަޖެހިފައި އޮތް އޮލިމްޕިކް ގޭމްސް މިހާރު ވަނީ އަންނަ އަހަރަށް ފަސްކޮށްފައެވެ. އަދި އޮލިމްޕިކްސް އަންނަ އަހަރަށް ފަސްކުރުމުގެ ސަބަބުން، އެ ގައުމަށް މާލީ ގޮތުން ގެއްލުންތަކެއްވި ކަމަށް ވަނީ ރިޕޯޓުކޮށްފައެވެ.

ކޮވިޑް-19ގެ އަސަރު ޖަޕާނަށްވެސް ކޮށްފައިވާއިރު، އެ ގައުމުން މިހާތަނަށް 17،800 ށްވުރެ ގިނަ މީހުން ވަނީ ވައިރަހަށް ޕޮޒިޓިވް ވެފައެވެ. އަދި ވައިރަސް ޖެހިގެން އެގައުމުން މިހާތަނަށް 900ށް ވުރެ ގިނަ މީހުން ވަނީ މަރުވެފައެވެ.