ބެންޒެމާގެ ދެ ލަނޑާއެކު ރެއާލުން ފަރަގު ކުޑަކޮށްފި

ކަރިމް ބެންޒެމާ ކާމިޔާބުކުރި ދެ ލަނޑާއެކު ރެއާލް މެޑްރިޑުން ސްޕެނިޝް ލީގުގެ އެއްވަނައިގައި އޮތް ބާސެލޯނާއާ ދެމެދު އޮތް ފަރަގު ކުޑަކޮށްފިއެވެ.

ބުރާސްފަތި ދުވަހުގެރޭ ލީގުގައި ވެލެންސިއާ އަތުން ރެއާލް މޮޅުވީ 3-0 ގެ ނަތީޖާއަކުންނެވެ.

ރެއާލްގެ ދަނޑުގައި ކުޅުނު މެޗު ފަށައިގެން އެޓީމުން ވެލެންސިއާގެ ހާފަށް ބާރު ބޮޑުކުރިއިރު، މެޗުގެ 11 ވަނަ މިނެޓުގައި ރެއާލްގެ ބެލްޖިއަމް ފޯވާޑް އެޑެން ހަޒާޑަށް ވަނީ ލަނޑު ޖަހަން ރަނުގެ ފުރުސަތެއް ލިބިފައެވެ. އެކަމަކު ހަޒާޑް ފޮނުވާލި ހަމަލާ ވެލެންސިއާގެ ގޯލްކީޕަރު ވަނީ ހުޝިޔާރު ކަމާއެކު ދިފާއުކޮށްފައެވެ.

މި ހަމަލާއަށްފަހު ވެލެންސިއާއިން ވަނީ އެޓީމުގެ ކުޅުން ރަނގަޅުކޮށް ރެއާލްގެ ގޯލަށް ނުރައްކާ ކޮށްފައެވެ. އެގޮތުން މެޗުގެ 14 ވަނަ މިނެޓުގައި ވެލެންސިއާގެ ފޯވާޑް ރޮޑްރިގޯ ފޮނުވާލި ނުރައްކާތެރި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ. އޭގެ ފަހުން މެޗުގެ 20 ވަނަ މިނެޓުގައި ވެލެންސިއާއިން ލަނޑެއް ޖެހި ނަމަވެސް، ވީޑިއޯ އެސިސްޓަނންޓް ރެފްރީ (ވީއޭއާރް) ން ވަނީ އެއީ އޮފްސައިޑް ލަނޑެއް ކަމުގައި ނިންމާފައެވެ.

މެޗުގެ ދެވަނަ ހާފު ފަށައިގެން ރެއާލުން އެޓީމުގެ ކުޅުން ރަނގަޅުކުރިއިރު، މެޗުގެ 61 ވަނަ މިނެޓުގައި ރެއާލުން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ހަޒާޑް ތަނަވަސްކޮށްދިން ފުރުސަތަކުން ކަރިމް ބެންޒެމާއެވެ.

މި ލަނޑަށްފަހުވެސް ރެއާލުން ވަނީ ފުލުފުލުގައި ވެލެންސިއާގެ ގޯލަށް ނުރައްކާ ކޮށްފައެވެ. އެގޮތުން މެޗުގެ 74 ވަނަ މިނެޓުގައި ރެއާލުން ވަނީ އިތުރު ލަނޑެއް ޖަހާ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ މެންޑީ ތަނަވަސްކޮށްދިން ފުރުސަތަކުން ބަދަލު ކުޅުންތެރިއެއްގެ ގޮތުގައި ކުޅެންއެރި އެސެންސިއޯއެވެ. ރެއާލުން މި މެޗުގައި ކާމިޔާބުކުރި ފަހު ލަނޑު އެޓީމަށް ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި ބެންޒެމާއެވެ.

މި ނަތީޖާއާއެކު ރެއާލް އޮތީ ކުޅުނު 29 މެޗުން ލިބުނު 62 ޕޮއިންޓާއެކު ތާވަލުގެ ދެވަނައިގައެވެ. ތާވަލުގެ އެއްވަނައިގައި ބާސާ އޮތީ ކުޅުނު 29 މެޗުން ލިބުނު 64 ޕޮއިންޓާއެކުގައެވެ. އަދި ތިންވަނައިގައި އޮތް ސެވިއްޔާއަށް 29 މެޗުން 51 ޕޮއިންޓު ވަނީ ލިބިފައެވެ.