ވާނާގެ ސޮއި ޗެލްސީން ހޯދައިފި

ޖަރުމަންގެ އާރުބީ ލެއިޕްޒީގަށް ކުޅެމުން އަންނަ ހުނަރުވެރި ފޯވާޑް ޓިމޯ ވާނާގެ ސޮއި ޗެލްސީން ހޯދައިފިއެވެ.

މީގެ ކުރިން ޗެލްސީއަށް ބަދަލުވާން ވާނާ އެއްބަސްވި ވާހަކަ ލެއިޕްޒީގުން ދޮގުކުރި ނަމަވެސް، ބުރާސްފަތި ދުވަހު ޗެލްސީން ވަނީ ވާނާގެ ސޮއި ހޯދިކަން އިއުލާން ކޮށްފައެވެ. ވާނާގެ ސޮއި ޗެލްސީން ހޯދީ އޭނާ ލެއިޕްޒީގާއެކު ހަދާފައިވާ އެއްބަސްވުން އުވާލަން ދައްކަން ޖެހޭ 50 މިލިއަން ޔޫރޯ ދައްކަން އެއްބަސްވުމުންނެވެ. ޗެލްސީއާއެކު ވާނާ ހަދާފައިވަނީ ފަސް އަހަރު ދުވަހުގެ އެއްބަސްވުމެކެވެ. ރިޕޯޓުތައް ބުނާ ގޮތުން ވާނާއާށް ޗެލްސީގައި އަހަރަކު 10 މިލިއަނަށް ވުރެ ގިނަ ޔޫރޯ ލިބޭނެއެވެ.

ވާނާގެ ސޮއި ޗެލްސީން ހޯދިއިރު، އޭނާ ރަސްމީކޮށް ޗެލްސީ އަށް ބަދަލުވާނީ މި ސީޒަންގެ އިނގިރޭސި ޕްރިމިއާ ލީގު ނިމުމުންނެވެ.

ޗެލްސީއަށް ބަދަލުވާން ވާނާ އެއްބަސްވިއިރު، އޭނާ ހޯދުމަށް މީގެ ކުރިން އިންޓަ މިލާނާއި، ބާސެލޯނާ އާއި، މެންޗެސްޓާ ޔުނައިޓެޑް އަދި ލިވަޕޫލުން ވެސް ވަނީ މަސައްކަތްކޮށްފަ އެވެ. މީގެ ތެރެއިން ވާނާ އަށް އެންމެ ބޮޑަށް ފާރަލީ ލިވަޕޫލުންނެވެ.

އެގޮތުން މީގެ ކުރިން ލިވަޕޫލްގެ ކޯޗު ޔާގެން ކްލޮޕް އާއެކު މަސައްކަތްކުރަން ބޭނުންވާ ކަމަށް ވާނާ ބުނި ނަމަވެސް، ލިވަޕޫލުން ވަނީ ކޮރޯނާވައިރަސް (ކޮވިޑް-19) ގެ މި ހާލަތުގައި އެ ވަރުގެ އަގެއް އިތުރު ފޯވާޑަކަށް ޚަރަދުކުރަން ބޭނުންނުވާ ކަމަށް ބުނެ، އަގު ކުޑަކުރަން ހުށަހަޅާފަ އެވެ. އެކަމަކު ލެއިޕްޒީގުން އެކަމަށް އެއްބަސްވެފައެއް ނުވެއެވެ.

އުމުރުން 24 އަހަރުގެ ވާނާ އަންނަ ސީޒަނުގައި ޗެލްސީ އަށް ބަދަލުވާން އެއްބަސްވިއިރު، އޭނާ އަންނަނީ މި ސީޒަނުގައި މޮޅު ކުޅުމެއް ދައްކަމުންނެވެ. އެގޮތުން ވާނާ ވަނީ މި ސީޒަނުގައި މިހާތަނަށް 43 މެޗުން 32 ލަނޑު ކާމިޔާބުކޮށްފައެވެ.

ގަވާއިދާ ޚިލާފާށް ކުޅުންތެރިން ރަޖިސްޓްރީ ކުރުމުގައި ޗެލްސީން ފީފާ ގަވާއިދުގެ 150 ކަމަކާ ޚިލާފުވެފައިވާތީ ދެ ޓްރާންސްފާ ބާޒާރުގައި ކުޅުންތެރިން ނުގެނެވޭ ގޮތަށް ދިން އަދަބު މިދިޔަ އަހަރުގެ ޑިސެމްބަރު މަހު ސީއޭއެސްއިން ލުއިކޮށްދިންއިރު، ވާނާ އަކީ އޭގެ ފަހުން ޗެލްސީން ހޯދި ދެވަނަ ކުޅުންތެރިޔާއެވެ.

މީގެ ކުރިން އެ ކްލަބުން ސޮއި ހޯދާފައިވަނީ އަޔަކްސްއަށް ކުޅެމުން އަންނަ މޮރޮކޯގެ ތަރި ހަކީމް ޒިޔެކްއެވެ. އެކަމަކު އޭނާވެސް ޗެލްސީއާ ގުޅޭނީ މި ސީޒަނުގެ އިނގިރޭސި ޕްރިމިއާ ލީގު ނިމުމުންނެވެ.