ބަންދެއްގައި ހުންނަތާ މިހާރު ދެތިން އަހަރު ވެއްޖެ: ކުރީގެ އުއްތަމަ ފަނޑިޔާރު އަބްދުﷲ ސައީދު
އަބްދުﷲ ސައީދު ވިދާޅުވީ އެއްތަނުން އަނެއްތަނަށް ދަތުރު ނުކުރެވޭގޮތަށް އޭނާގެ މައްޗަށް އަމުރެއް އެބައޮތް ކަމަށް
ކުރީގެ އުއްތަމަ ފަނޑިޔާރު އަބްދުﷲ ސައީދު ބަންދުގައި ބަހައްޓައިގެން ކޯޓަށް ހާޒިރު ކުރަނީ (ކުރީގެ ފޮޓޯއެއް)
އެއްތަނުން އަނެއްތަނަށް ދަތުރު ނުކުރެވޭގޮތަށް ބަންދުގައި ހުންނަވާތާ ދެތިން އަހަރުވެފައިވާތީ، ސުޕްރީމް ކޯޓުގައި މިހާރު ހިނގަމުންދާ ސިއްރި ހެކީގެ މައްސަލަ ވީހާވެސް އަވަހަކަށް ނިންމަވާ ދެއްވުމަށް ސުޕްރީމް ކޯޓުގެ ކުރީގެ އުއްތަމަ ފަނޑިޔަރު އަބްދުﷲ ސައީދު ވިދާޅުވެއްޖެ އެވެ.
އަބްދުﷲ ސައީދު މިހެން ވިދާޅުވީ، ސުޕްރީމް ކޯޓުގައި ބުރާސްފަތި ދުވަހުގެ ބޭއްވި ސިއްރު ހެކީގެ މައްސަލައިގެ އަޑުއެހުމުގަ އެވެ. މިއަޑުއެހުން ސުޕްރީމް ކޯޓުން ކުރިއަށް ގެންގޮސްފައިވަނީ ވެބް ކޮންފަރެންސް މެދުވެރިކޮށެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި އޭރު ސުޕްރީމް ކޯޓުގެ އުއްތަމަ ފަނޑިޔާރުކަމުގެ މަގާމުގައި ހުންނެވި، އަބްދުﷲ ސައީދުގެ މައްޗަށް ދައުލަތުން ކުރި ޢަދުލް އިންސާފު ގާއިމުކުރަން ހުރަސްއެޅުމުގެ ކުށުގެ ދައުވާ، ކްރިމިނަލް ކޯޓުން ސާބިތުވާ ކަމަށް ނިންމާއި ޖަލަށް ހުކުމް ކުރި އެވެ. ކްރިމިނަލް ކޯޓުންކުރި މިހުކުމް އަބްދުﷲ ސައީދުގެ ފަރާތުން ވަނީ ހައިކޯޓުގައި އިސްތިއުނާފް ކޮށްފަ އެވެ. އަދި ހައިކޯޓުން ވަނީ އަބްދުﷲ ސައީދުގެ މައްޗަށް ކްރިމިނަލް ކޯޓުން ކުރި ހުކުމް ބާތިލްކަމަށް ނިންމާފަ އެވެ.
ޕީޖީ އޮފީހުން ސުޕްރީމް ކޯޓަށް ހުށަހެޅީ، އަބްދުﷲ ސައީދުގެ މައްޗަށް ކްރިމިނަލް ކޯޓުން ކޮށްފައިވާ ހުކުމް ބާތިލް ކުރުމަށް ނިންމި، ހައިކޯޓުގެ 2018 ވަނަ އަހަރުގެ 387 ވަނަ ނަންބަރުގެ ޤަޟިއްޔާގައި ސިއްރު ހެއްކާބެހޭގޮތުން ކަނޑައެޅުއްވި އުޞޫލު، ޤާނޫނީ ގޮތުން ރަނގަޅުކަމަށް ނުފެންނާތީ، އެޤަޟިއްޔާގެ އެބައި (ޤާނޫނު މާނަކުރުމުގެ ބައި) އެވެ.
މިމައްސަލައާ ގުޅިގެން ސުޕްރީމް ކޯޓުން ބުރާސްފަތި ދުވަހުގެ ބޭއްވި އަޑުއެހުމުގައި، ދެފަރާތުގެ އަޑުހުންތަކަށްފަހު، މިމައްސަލައިގެ ފަހުބަހެއްގެ ގޮތުގައި ވާހަކަ ދައްކަވަމުން އަބްދުﷲ ސައީދު ވިދާޅުވީ، އޭނާގެ މައްޗަށް ބަރީއަކަށް ސާބިތުވެފައިވާ، ހައްގަށް އުނިކަން އަންނަން ނުކުތާއެއްކަމަށް ދެކިވަޑައިގަންނަވާތީ، އެއުނިކަން ނާންނާނެ ގޮތުގެމަތިން މިމައްސަލައަށް ރިއާޔަތް ކޮށްދެއްވުމަށް އެދިވަޑައިގަންނަވާ ކަމަށެވެ. އަދި މިމައްސަލަ ވީ އެންމެ އަވަހަކަށް ނިންމަވާދެއްވުމަށް އެދިވަޑައިގަންނަވާ ކަމަށާއި، ސަބަބަކީ މިއާގުޅިގެން އަމުރެއް ނެރެފައި އެބައޮތް ކަމަށެވެ. މިއަމުރުގައި، އެއްތަނުން އަނެއްތަނަށް ދަތުރުކުރުން ހިފެހެއްޓިފައިވާ ކަމަށާއި މީގެ ސަބަބުން މިހާރު ބަންދެއްގައި ހުންނަތާ ދެތިން އަހަރު ވެއްޖެ ކަމަށެވެ.
އެހެންވީމާ އެކަން ދެމިގެން ނުދާނެ ގޮތަކަށް، އަދި ހިފެހެއްޓިފައިވާ މިނިވަންކަމާއި އަސާސީ ހައްގުތައް ހިމާޔަތް ކުރެވޭގޮތަކަށް މިމައްސަލަ އަވަސްކޮށްދެއްވައި ނިންމަވާ ދެއްވުމަށް އެދިވަޑައިގަންނަވާ ކަމަށްވެސް އަބްދުﷲ ސައީދު ވިދާޅުވި އެވެ.
އަބްދުﷲ ސައީދުގެ މައްޗަށް ދައުލަތުން ކުރި ޢަދުލް އިންސާފު ގާއިމުކުރަން ހުރަސްއެޅުމުގެ ކުށުގެ ދައުވާ އާގުޅުގެން ކްރިމިނަލް ކޯޓުން އަބްދުﷲ ސައީދު 1 އަހަރާއި 7 މަހާއި 6 ދުވަހަށް ޖަލަށްލުމަށް ހުކުމް ކޮށްފައިވަނީ 13 ޖޫން 2018 ގަ އެވެ.
ކްރިމިނަލް ކޯޓުގެ އެހުކުމް އަބްދުﷲ ސައީދުގެ ފަރާތުން ހައިކޯޓުގައި އިސްތިއުނާފް ކުރުމުން ކްރިމިނަލް ކޯޓުގެ ހުކުމް ބާޠިލް ކޮށްފައިވަނީ 27 ޖެނުއަރީ 2020 ގަ އެވެ.
ކުރީގެ އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ކުރީގެ ފަނޑިޔާރު އަލީ ހަމީދު، ސުޕްރީމް ކޯޓުގައި ތިއްބަވަނިކޮށް، ސުޕްރީމް ކޯޓަށް ފުލުހުންވަދެ، އެ ދެބޭފުޅުން ހައްޔަރުކޮށްގެން ޖަލަށް ގެންގޮސްފައިވަނީ، 2018 ވަނަ އަހަރުގެ ފެބްރުއަރީ އެކެއްގައި ސުޕްރީމް ކޯޓުން ނެރުނު އަމުރަކާ ގުޅިގެން ފެބްރުއަރީ 5 ވަނަ ދުވަހުގެ ރޭ މެންދަމު 03:30 އެހާކަން ހާއިރު އެވެ.
