ޕާކުތަކާއި މައިޒާންތަކުގައި އުޅޭ އިރު ހުންނަންޖެހޭ ރައްކާތެރިކަމުގެ ފިޔަވަޅުތަކާ ބެހޭ އުސޫލު އާންމުކޮށްފި
ކޮވިޑް-19 އިން ރައްކާތެރިވުމާ ގުޅޭ މަޢުލޫމާތާއި ޢަމަލުތައް ބަހައްޓަންވީގޮތުގެ އިރުޝާދު ޕާކު ނުވަތަ މައިޒާނުގެ ވަންނަ ދޮރު ކައިރީގައި އަދި ތަނުގެ އެތެރޭގައި ފެންނަގޮތަށް ހުންނަންޖެހޭ
ސަލްޓަން ޕާކުގައި ކުޑަކުދިން ކުޅެން ބޭނުންކުރަ ސާމާނު ދޮވެ ސާފުކުރުމުގެ މަސައްކަތް ކުރަނީ؛ ޕާކު ތަކާއި މައިޒާންތައް ހުޅުވާލާއިރު އަމަލުކުރަންޖެހޭ އުސޫލުވަނީ އާންމުކޮށްފައި
ކޮވިޑް-19އާ ގުޅިގެން ރައްކާތެރިކަމާއެކު އާންމު ޙާލަތަށް ރުޖޫޢަ ވުމަށް ޕާކުތަކާއި މައިޒާން ފަދަ ތަންތަނުގައި ރައްކާތެރި ކަމުގެ ގޮތުން އަޅަންޖެހޭ ފިޔަވަޅުތައް ބަޔާންކުރަ އުސޫލު އާންމުކޮށްފިއެވެ.
މި އުސޫލުގައި ޕާކު ނުވަތަ މައިޒާންތައް އާންމުންނަށް ހުޅުވާލުމުގައި ރައްކާތެރިކަމުގެ ފިޔަވަޅުތައް ކަށަވަރު ކުރަންޖެހޭކަމަށް ބުނެފައިވެއެވެ. އެގޮތުން ކޮވިޑް-19އިން ރައްކާތެރިވުމާ ގުޅޭ މަޢުލޫމާތާއި ޢަމަލުތައް ބަހައްޓަންވީގޮތުގެ އިރުޝާދު (މާސްކު އެޅުން، މަދުވެގެން 3 ފޫޓު ގައިދުރުމިން ބެހެއްޓުން، އަތުގެ ސާފުތާހިރުކަން، ފަދަ) ޕާކު ނުވަތަ މައިޒާނުގެ ވަންނަ ދޮރު ކައިރީގައި އަދި ތަނުގެ އެތެރޭގައި ފެންނަގޮތަށް ހުންނަން ޖެހެއެވެ.
އަދި މަދުވެގެން 3 ފޫޓު ގައިދުރުމިން ބެހެއްޓޭ ގޮތަށް އެއްފަހަރާ ތަނުގެ ތެރެއަށް ވަދެވޭނެ މީހުންގެ ޢަދަދު ފެންނަ ގޮތަށް ބޯޑުތަކުގައި ލިޔެފައި ބެހެއްޓުމާއި އެތަންތަނަށް މީހުން ވަނުމާއި ނުކުތުމުގެ އިންތިޒާމު ހަމަޖެހިފައި ހުންނަން ޖެހެއެވެ.
މީގެ އިތުރުން ޕާކު ނުވަތަ މައިޒާނުގައި އުޅޭއިރު މާސްކް އަޅައިގެން އުޅުމާއި، ކުޑަ ކުދިން ދުވެ ކުޅެ ހަދާއިރު މާސްކްގެ ސަބަބުން ދިމާވެދާނެ ކަމަކަށް ސަމާލުވުން، މާސްކް އެޅުމުގެ ރަނގަޅު އުސޫލުތަކާ އެއްގޮތަށް ޢަމަލު ކުރުމަށް ވަނީ އެދިފައެވެ. އަދި ޕާކު ފަދަ ތަންތަން މަދުވެގެން ދުވާލަކު 1 ފަހަރު ސާފުކުރުމާއި، ތަނުގައި ހުންނަ ގޮނޑި، ކުދިން ކުޅުމަށް އެރުމަށް ބޭނުންކުރާ ތަކެތި، މީހުން އަތްލާ ތަންތަނާއި ތަކެތި ޑިޓަރޖެންޓް (ސައިބޯނި ފެން) ބޭނުންކޮށްގެން ރަނގަޅަށް ސާފު ކުރުމަށް ވަނީ އަންގާފައެވެ.
ޕާކު ނުވަތަ މައިޒާންތައް ބޭނުންކުރާ ފަރާތްތަކުން ސަމާލުވާން ޖެހޭ ކަންތައްތައް ވެސް މި އުސޫލުގައި ހިމެނެއެވެ. އެގޮތުން ކޮވިޑް-19ގެ އެއްވެސް ޢަލާމާތެއް ހުރިފަރާތެއް ނަމަ މިފަދަ ތަންތަނަށް ނުދިއުމާއި، މާސްކް އަޅައިގެން ހުރުން އަދި މާސްކް އެޅުމުގެ ރަނގަޅު އުސޫލުތަކާ އެއްގޮތަށް ޢަމަލު ކުރުމަށް ވަނީ އަންގާފައެވެ.
އަދި ޕާކު ނުވަތަ މައިޒާނުގައި އުޅޭއިރު އެހެންމީހުންނާ ދެމެދު މަދުވެގެން 3 ފޫޓުގެ ގައިދުރުމިން ބެހެއްޓުމާއި، ޕާކު ނުވަތަ މައިޒާނުގައި ހުންނަ ތަކެތީގައި ނުވަތަ ތަންތަނުގައި އަތްލުން މަދުކުރުން އަދި އަތް ސާފުނުކޮށް މޫނުގައި އަތް ނުލުމުގެ އިތުރުން ޕާކު ނުވަތަ މައިޒާނުން އެނބުރި ގެއަށް ދިއުމަށްފަހު ސައިބޯނިލައިގެން މަދުވެގެން 20 ސިކުންތު ވަންދެން ރަނގަޅަށް އަތް ދޮވުމަށް ވަނީ އިރުޝާދު ދީފައެވެ.
