ފްރާންސް ފޯވާޑް އެންޓޮއިން ގްރީޒްމަންއަކީ ބާސެލޯނާއަށް މުހިންމު ކުޅުންތެރިއެއް ކަމަށް އެ ކްލަބުގެ ކޯޗު ކިކޭ ސެޓިއެން ބުނެފިއެވެ.

ގްރީޒްމަން ބާސާއަށް ބަދަލުވީ މިދިޔަ އަހަރުގެ ހޫނު މޫސުމުގައި ކުރީގެ ކްލަބު އެތުލެޓިކޯ މެޑްރިޑާއެކު ހަދާފައިވާ އެއްބަސްވުން އުވާލަން ދައްކަންޖެހޭ 120 މިލިއަން ޔޫރޯ ބާސާއިން ދެއްކުމުންނެވެ. އޭނާ ބާސާ އާއެކު ފަސް އަހަރުގެ މުއްދަތަކަށް ސޮއިކުރިއިރު، އެ އެއްބަސްވުން ހަމަވާނީ 2024 ގައެވެ.

އެކަމަކު ބާސާއަށް ބަދަލުވުމަށްފަހު އޭނާއަށް އެންމެ އެދެވޭ ކުޅުމެއް ދެއްކިފައެއް ނުވެއެވެ. އެގޮތުން މިހާތަނަށް ބާސާއަށް ކުޅެދިން 39 މެޗުގައި ގްރީޒްމަނަށް ކާމިޔާބުކުރެވިފައިވަނީ 14 ލަނޑެވެ.

ސްޕެނިޝް ލީގުގައި އަންގާރާ ދުވަހުގެރޭ ލެގަނޭސްއާ ދެކޮޅަށް ބާސާ ކުޅުނު މެޗުގައި ގްރީޒްމަން ވަނީ 90 މިނެޓު ފުރިހަމަ ކޮށްފައެވެ. މި މެޗުގައި ގްރީޒްމަން ލަނޑެއް ކާމިޔާބުކުރި ނަމަވެސް، ވީޑިއޯ އެސިސްޓަންޓް ރެފްރީ (ވީއޭއާރް) ން ވަނީ އެ ލަނޑު އޮފްސައިޑް ކަމަށް ނިންމާފައެވެ.

މި މެޗަށްފަހު ބާސާފގެ ކޯޗު ސެޓިއެން ބުނީ މެޗުގައި ގްރީޒްމަންގެ ފަރާތުން ރަނގަޅު ކުޅުމެއް ފެނިގެންދިޔަ ކަމަށާއި، އޭނާއަކީ ބާސާއަށް އަދިވެސް މުހިންމު ކުޅުންތެރިއެއް ކަމަށެވެ.

ގްރީޒްމަންއަކީ ބާސާއަށް މުހިންމު ކުޅުންތެރިއެއް ކަމަށް ސެޓިއެން ބުނި ނަމަވެސް، ރިޕޯޓުތައް ބުނާ ގޮތުން ކުރިއަށް އޮތް ޓްރާންސްފާ ބާޒާރުގައި ގްރީޒްމަން ވިއްކާލަން ބާސާއިން އަންނަނީ މަސައްކަތް ކުރަމުންނެވެ. އެގޮތުން ބާސާއިން އޭނާ ވިއްކާލަން މަސައްކަތް ކުރަނީ 100 މިލިއަން ޔޫރޯއަށް ކަމަށްވެސް ވަނީ ރިޕޯޓުކޮށްފައެވެ.

ގްރީޒްމަން ގެންދިޔުމަށް މެންޗެސްޓާ ޔުނައިޓެޑް، ޗެލްސީ، އާސެނަލް އަދި ޕީއެސްޖީން މަސައްކަތް ކުރަމުން އަންނައިރު، ޕީއެސްޖީއަށް ކުޅެމުން އަންނަ ބްރެޒިލްގެ ތަރި ނޭމާ ގަތުމަށް ބާސާއިން ގްރީޒްމަން ދިނުމަށް ނިންމައިފައިވާ ކަމަށް ވެސް މީގެ ކުރިން މީޑިއާތަކުން ވަނީ ރިޕޯޓުކޮށްފައެވެ.