ޝިޔާމަށް އަނިޔާވި މައްސަލަ މަޖިލީހުގެ އިމްތިޔާޒު ކޮމެޓީން ބަލަން ނިންމައިފި
ޝިޔާމަށް އަނިޔާކުރި ކަމަށްބުނެ، އިދިކޮޅު ޕީޕީއެމް-ޕީއެންސީ ކޯލިޝަނުން ވަނީ މަޖިލީހުގެ ޖަލްސާތައް ބޮއިކޮޓް ކޮށްފަ
ނައިފަރު ދާއިރާގެ މެމްބަރު އަދި ޕީޕީއެމްގެ ނާއިބު ރައީސް އަހުމަދު ޝިޔާމް: ޝިޔާމަށް އަނިޔާވުމުން އިދިކޮޅު ޕާޓީތަކުން ވަނީ މަޖިލީހުގެ ޖަލްސާތައް ބޮއިކޮޓް ކޮށްފައި
ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަދި ޕީޕީއެމްގެ ނާއިބު ރައީސް އަހުމަދު ޝިޔާމަށް އަނިޔާވި މައްސަލަ ބެލުމަށް ރައްޔިތުންގެ މަޖިލީހުގެ އިމްތިޔާޒް އަދި ސްލޫކް ކޮމެޓީން ނިންމައިފިއެވެ.
ޝިޔާމަށް އަނިޔާވެފައިވަނީ، ހިނގަމުންދިޔަ ކައުންސިލްތަކުގެ ދައުރު ދިގު ދައްމާލަން ގާނޫނު އަސާސީއަށް ގެނެސްފައިވާ އިސްލާހު ފާސްކުރުމަށް ބޭއްވި މަޖިލީހުގެ ޖަލްސާގައި ހިނގައިދިޔަ ހަމަނުޖެހުމުގެ ތެރެއިންނެވެ.
އެޖަލްސާގައި ނިޒާމު ގެއްލި، ޝިޔާމްގެ ނަން މަޖިލީހުގެ ރިޔާސަތުން އިއްވިއެވެ. އަދި މަޖިލީހުގެ ތަޅުމުން ނިކުންނެވުމަށް ރިޔާސަތުން ވިދާޅުވުމުން ވެސް މަޖިލީހުގެ ތަޅުމުގައި، ހުންނަވައި މަޖިލީހުގެ ނިޒާމު ގެއްލިގެން ދިއުމުން ހިނގައިދިޔަ ހަމަނުޖެހުމުގެ ތެރެއިން ޝިޔާމަށް ވަރަށް ބޮޑަށް އަނިޔާވެފައިވާ ކަމަށް އިދިކޮޅު ޕީޕީއެމް-ޕީއެންސީ ކޯލިޝަނުން ވަނީ ބުނެފައެވެ.
ޝިޔާމަށް އަނިޔާވުމާއި ގުޅިގެން އިދިކޮޅު ކޯލިޝަނުން ވަނީ މަޖިލީހުގެ ޖަލްސާތައް ބޮއިކޮޓް ކޮށްފައެވެ. ޝިޔާމު މަޖިލީހުގެ ތަޅުމުން ނެރުމުގައި ހަރަކާތްތެރިވީ، މަޖިލީހުގައި އެކަމަށް ކަނޑައަޅާފައި އޮންނަ ނިޒާމުގެ ތެރެއިން ސަރޖަންޓް އެޓް އާރމްސްއެވެ.
އެޖަލްސާ ބާއްވާފައިވަނީ، މިމަހުގެ 1 ވަނަ ދުވަހުގެ ރޭގެ ދަންވަރު 01:30ގަ އެވެ. މިޖަލްސާ އެގަޑީގައި ބާއްވަން ޖެހުނީ، ގާނޫނުއަސާސީއަށް ގެންނަން ހުށަހަޅާފައިވާ އެ އިސްލާހު ނުގެނެވިއްޖެނަމަ، މިމަހުގެ 3 ވަނަ ދުވަހަށް ލޯކަލް ކައުންސިލްތަކުގެ ގާނޫނީ ހުސްކަން އަންނާނެތީ، ވަގުތު ކުޑަތަންވެފައިވާތީއެވެ.
ގާނޫނު އަސާސީއަށް އެ އިސްލާހު ގެންނަން ޕީޕީއެމް-ޕީއެންސީން ކޯލިޝަނުން ފުރަތަމަ އެއްބާރުލުން ދޭނެ ކަމަށް ބުނިނަމަވެސް، ފަހު ވަގުތު ވަނީ އެކަމަށް ދެކޮޅު ހަދާފައެވެ.
އަންގާރަ ދުވަހު، އިމްތިޔާޒް އަދި ސްލޫކް ކޮމެޓީން ބޭއްވި ބަސްދަލުވުމުގައި، ޝިޔާމަށް އަނިޔާވި މައްސަލަ ދިރާސާކުރަން ނިންމާފައިވަނީ 3 މެމްބަރުންގެ ސަބް ކޮމެޓީއަކުންނެވެ. ސަބް ކޮމެޓީގައި ހިމެނި ވަޑައިގަންނަވަނީ، ކުޅުދުއްފުށި އުތުރު ދާއިރާގެ މެމްބަރު ޔާސިރު އަބްދުއްލަތީފް އާއި ގަމު ދާއިރާގެ މެމްބަރު މުހައްމަދު ވިސާމް އަދި މަޑުއްވަރީ ދާއިރާގެ މެމްބަރު އާދަމް ޝަރީފްއެވެ.
ސަބް ކޮމެޓީން މިމައްސަލަ ބެލުމަށްފަހު، ނިންމާ ރިޕޯޓް، ފުރަތަމަ ފޮނުވޭނީ، އިމްތިޔާޒް އަދި ސްލޫކް ކޮމެޓީއަށެވެ. އަދި ކޮމެޓީގެ ނިންމުމަކަށް ވާނީ އިމްތިޔާޒު އަދި ސްލޫކް ކޮމެޓީން ނިންމާ ނިންމުމެވެ. އެއަށްފަހު، އިމްތިޔާޒު އަދި ސްލޫކް ކޮމެޓީގެ ރިޕޯޓް ހުށަހެޅޭނީ މަޖިލީހުގެ ޖަލްސާއަށެވެ. އެއަށްފަހު، ކޮމެޓީގެ އެރިޕޯޓާމެދު ގޮތެއް ނިންމާނީ ރައްޔިތުންގެ މަޖިލީހުންނެވެ.
އިމްތިޔާޒު އަދި ސްލޫކް ކޮމެޓީގައި، ޕީޕީއެމްގެ ފަރާތުން، ތ. ގުރައިދޫ ދާއިރާގެ މެމްބަރު ގައްސާން މައުމޫން، ޕީއެންސީގެ ފަރާތުން، މަޑުއްވަރީ ދާއިރާގެ މެމްބަރު އާދަމް ޝަރީފް، ޖުމްހޫރީ ޕާޓީގެ ފަރާތުން ދަނގެތި ދާއިރާގެ މެމްބަރު މުހައްމަދު ނާޒިމް، އެމްޑީއޭގެ ފަރާތުން މީދޫ ދާއިރާގެ މެމްބަރު އަހުމަދު ޝިޔާމް މުހައްމަދު (ސަން ސިޔާމް) އަދި ވަކި ޕާޓީއަކަށް ނިސްބަތްވެވަޑައި ނުގަންނަވާ، ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ ހިމެނިވަޑާއިގަންނަވާއިރު، އެމްޑީޕީއަށް ނިސްބަތްވާ 8 މެމްބަރުން ހިމެނިވަޑައިގަންނަވައެވެ.
