ގެވެށި އަނިޔާ ހުއްޓުވުމުގެ ގާނޫނުން ކޯޓަށް ހުށަހެޅުނީ 18 މައްސަލަ
ރައްޔިތުންގެ މަޖިލީހުގެ ނައިބު ރައީސް، އިވާ އަބްދުﷲ
ޖިންސީ ފުރައްސާރަކުރުން ހުއްޓުވުމުގެ ގާނޫނު ފާސްކުރެވުނުތާ ހަ އަހަރުވެގެން ދިޔައިރު ކޯޓަށް ހުށަހެޅިފައިވަނީ އެންމެ މައްސަލައެއް ކަމަށް ރައްޔިތުންގެ މަޖިލީހުގެ ނައިބު ރައީސް އިވާ އަބްދުﷲ ވިދާޅުވެއްޖެއެވެ.
އަންގާރަ ދުވަހުގެ މަޖިލީހުގެ ޖަލްސާގައި ދިވެހިރާއްޖޭގައި އަންހެނުންނާމެދު ކުރާ ތަފާތުކުރުންތަކަށް ހުއްޓުމެއް ގެނައުމަށްޓަކައި، ކަމާގުޅޭ ސިޔާސަތުތަކާއި، ނިޒާމާއި ޤާނޫނުތަކާއި ގަވާއިދުތަކުގައި ހުރި ހުރަސްތަކާއި ތަފާތުކުރުންތައް ދެނެގަތުމަށްޓަކައި ޕާލިމަންޓަރީ އިންކުއަރީއެއް ހެދުމަށް ގޮވާލައި ހުށަހަޅާ ޤަރާރަށް ބަހުސް ކުރައްވަމުން ގަލޮޅު އުތުރު ދާއިރާގެ މެމްބަރު އީވާ ވިދާޅުވީ އެކިއެކި ގޮތްގޮތުން ރާއްޖޭގައި ޖިންސީ ފުރައްސާރަ އާއި ކުރިމަތިލާން ނުޖެހޭ އެއްވެސް އަންހެނަކާ ބައްދަލު ނުވާނެ ކަމަށެވެ. އަދި އިންސާފު ލިބުނު އެންމެ އަންހެނަކާވެސް ބައްދަލެއްނުވާނެ ކަމަށެވެ.
އިވާ ވިދާޅުވީ މިކަންކަމާއި ގުޅިގެން ހެދިފައިވާ ގާނޫނުތައް ތަންފީޒު ކުރުމަށް ކުރެވުނީ ކިހާ މަސައްކަތެއްތޯ ބެލުމަށްޓަކައި ކަމާ ގުޅުން ހުރި މުއައްސަސާތަކަށް ހުށަހެޅުއްވި ކަމަށެވެ. އެގޮތުން ޕްރޮސެކިއުޓަރ ޖެނެރަލް (ޕީޖީ) އޮފީހުން ފޮނުއްވި ޖަވާބު މެމްބަރު ވަނީ ތަޅުމުގައި ހިއްސާ ކުރައްވާފައެވެ.
މެމްބަރު ވިދާޅުވީ މައްސަލަ ހުށަނޭޅުމުގެ މާނައަކީ ޖިންސީ ފުރައްސާރައާއި، ގޯނާ ކުރުމާއި އަނިޔާއާޢި ހަމަހަމަ ކަން ނިގުޅައި ގަތުން ފަދަ ކަންކަމާއި ކުރިމަތިލާން ނުޖެހުމެއް ނޫން ކަމަށެވެ. މި ފަދަ މައްސަލަތައް ހުށަހެޅުމަށް ގިނަ ފަހަރު ފަސް ޖެހެނީ އިންސާފު ނުލިބޭނެތީ ކަމަށެވެ. މައްސަލަ ހުށަހެޅި ނަމަވެސް، ތަންފީޒީ އިދާރާތަކުން ނަސޭހަތްދީފައި ގެއަށް ފޮނުވާލާ ފަހަރު މަދުނުވާނެ ކަން ވެސް މެމްބަރު ފާހަގަކުރެއްވިއެވެ. މެމްބަރު ވަނީ ކޯޓުތަކުގެ ފަނޑިޔާރުންނަށް މި މައްސަލަތައް ސާބިތުނުވަނީ ސާބިތު ކުރަން ބޭނުންފުޅު ނުވާތީ ކަމަށް ވިދާޅުވެފައެވެ.
މެމްބަރު ވިދާޅުވީ ގާނޫނުތައް ތަންފީޒު ކުރެވެމުންދާ މިންވަރު ބެލުމަށް މޮނީޓަރިން މެކޭނިޒަމްއެއް އެކުލަވާލާ ކޮންމެވެސް މުއައްސަސާތައަކަށް އެ މައްސޫލިއްޔަތު ހަވާލުކުރަންޖެހޭ ކަމަށެވެ.
މެމްބަރު މި ހުށަހެޅުއްވި ގަރާރުގައި ވަނީ މުޖްތަމަޢުގައި އަންހެނުންނާމެދު ކުރާ ނޭދެވޭ ތަފާތުކުރުންތައް ނައްތާލުމަށް އެކަށީގެންވާ ފިޔަވަޅުއެޅުމަށާއި، ދިވެހި މުޖްތަމަޢުގައި އަންހެނުންނަށް ހަމަހަމަ ފުރުޞަތު މަގުފަހިކޮށްދިނުމަށާއި، ޤާނޫނުގެ ކުރިމަތީގައި ހަމަހަމަކަން ކަށަވަރުކޮށްދިނުމަށް ޤާނޫނުތަކާއި ގަވާއިދުތަކާއި، ސިޔާސަތުތަކާއި، ނިޒާމުގައި ހުރި ދަތިތަކާއި ގޮންޖެހުންތަކަކީ ކޮބައިކަން ދެނެގަތުމަށް ރައްޔިތުންގެ މަޖިލީހުގެ ކަމާގުޅޭ ކޮމިޓީން ޕާލިމަންޓަރީ އިންކުއަރީއެއް ހެދުމަށް ގޮވާލާފައެވެ. އަދި އެކަމަށް ދާއިމީ ޙައްލެއް ހޯދުމަށްޓަކައި، އިޞްލާޙުކުރަންޖެހޭ ކަންކަން ބަޔާންކޮށް އެ ކޮމިޓީގެ ރިކޮމެންޑޭޝަންސްތައް ރައްޔިތުންގެ މަޖިލީހަށް ހުށަހެޅުމަށް ވެސް ގޮވާލައްވާފައިވެއެވެ.
