އަންނަ ސީޒަނުގައި ވެސް ޕީއެސްޖީގައި އެ ކްލަބުގެ ކޯޗު ތޯމަސް ޓުޗެލް މަޑުކުރާނެ ކަމަށް ސްޕޯޓިންގ ޑިރެކްޓަރު ލިއެނާޑޯ ބުނެފިއެވެ.

2017 ވަނަ އަހަރު ބޮރޫޝިއާ ޑޯޓްމަންޑުން ވަކިވުމަށްފަހު، ޕީއެސްޖީއާ ޓުޗެލް ހަވާލުވީ 2018 ވަނަ އަހަރުގެ މެއި މަހުގެ ތެރޭގައެވެ. ޕީއެސްޖީން ޓުޗެލްއަށް ފުރަތަމަ ދީފައިވަނީ ދެ އަހަރު ދުވަހުގެ އެއްބަސްވުމެކެވެ. އެކަމަކު ފަހުން އެ އެއްބަސްވުން ވަނީ 2021 ވަނަ އަހަރުގެ ނިޔަލަށް އާކޮށްފައެވެ.

ޕީއެސްޖީގައި ޓުޗެލް މަޑުކުރާނެ ކަމަށް އެ ކްލަބުގެ ސްޕޯޓިންގ ޑިރެކްޓަރު ބުނިއިރު، މީގެ ކުރިން ބައެއް މީޑިއާތަކުން ވަނީ ޕީއެސްޖީން ޓުޗެލްގެ ބަދަލުގައި އެހެން ކޯޗަކު ހޯދުމަށް މަސައްކަތް ކުރަމުން އަންނަ ކަމަށް ބުނެފައެވެ. އެގޮތުން އޭސީ މިލާނާއި ޔުވެންޓަސްއަށް ކޯޗުކަން ކޮށްދީފައިވާ މަސިމިލިއާނޯ އެލެގްރީއަށް ޕީއެސްޖީން ފާރަލަމުން އަންނަ ކަމަށް މީޑިއާތަކުން ވަނީ ރިޕޯޓުކޮށްފައެވެ.

އެކަމަކު ޕީއެސްޖީގެ ސްޕޯޓިންގ ޑިރެކްޓަރު ލިއެނާޑޯ ބުނީ އެ ކްލަބުގައި މިހާތަނަށް ޓުޗެލް ރަނގަޅު މަސައްކަތްތަކެއް ކޮށްފައިވާ ކަމަށެވެ. އެގޮތުން އޭނާގެ އެއްބަސްވުމުގައި ބާކީ އެއް އަހަރު އެބައޮތް ކަމަށާއި، އަންނަ ސީޒަނުގައި ޕީއެސްޖީއަށް އިރުޝާދު ދޭނީ ޓުޗެލް ކަމަށެވެ.

އުމުރުން މިހާރު 46 އަހަރުގެ ޓުޗެލް ޑޯޓްމުންޑުގައި ވިދާލި ނަމަވެސް، އޭނާއަށް އެ ކްލަބާއެކު ކާމިޔާބުކުރެވިފައިވަނީ ޖަރުމަން ކަޕް އެކަންޏެވެ. އެކަމަކު ޕީއެސްޖީއަށް ބަދަލުވުމަށްފަހު ޓުޗެލް ވަނީ މިދިޔަ ދެ ސީޒަނުގައި ވެސް ފްރެންޗު ލީގުގެ ޗެމްޕިއަންކަން ހޯދާފައެވެ.

މިފަހަރުގެ ފްރެންޗު ލީގުގެ ޗެމްޕިއަންކަން ޕީއެސްޖީއަށް ލިބުނީ ކޮރޯނާވައިރަސް (ކޮވިޑް-19)އާ ގުޅިގެން ފްރެންޗު ލީގު ކެންސަލް ކުރަން ނިންމުމުންނެވެ. އެހެންކަމުން މި ސީޒަނުގައި ދެން ޕީއެސްޖީއަށް އޮތީ ޔުއެފާ ޗެމްޕިއަންސް ލީގު އެކަންޏެވެ. އަންނަ އޮގަސްޓް މަހުގެ ތެރޭގައި ޗެމްޕިއަންސް ލީގު އަލުން ފަށަން ޔުއެފާއިން މިހާރު އަންނަނީ މަސައްކަތް ކުރަމުންނެވެ.