ތުރާކުނު ކަރަންޓު މައްސަލަ ހައްލުކުރުމަށް 250 ކިލޯވޮޓްގެ ޖެނެރޭޓަރެއް
13 ޖޫން 2020 | ހޮނިހިރު 08:46މަހެއްހާ ދުވަހުގެ ކުރިން އެއް ޖެނެރޭޓަރު ހަލާކުވުމާއި ގުޅިގެން ދަތިތަކެއް ދިމާވި
ހއ. ތުރާކުނަށް ހޮނިހިރު ދުވަހު ޖެނެރޭޓަރު ގެންދިއުން
ހއ. ތުރާކުނަށް ދިމާވާ ކަރަންޓު މައްސަލަ ހައްލުކުރުމަށްޓަކައި 250 ކިލޯވޮޓްގެ ޖެނެރޭޓަރެއް އެރަށަށް ގެންގޮސްފިއެވެ.
މިކަމާއި ގުޅޭ ތަފްސީލު ހިއްސާކުރަމުން ތުރާކުނު ފެނަކަ ބްރާންޗުގެ މެނޭޖަރު އަހުމަދު ސައީދު ވިދާޅުވީ، ތުރާކުނުގައި ކަރަންޓު ދިނުމަށް ބޭނުންކުރަމުން ދިޔައީ 60 ކިލޯވޮޓްގެ ދެ ޖެނެރޭޓަރު ކަމަށެވެ. އެކަމަކު ރަމަޟާން މަހުގެ ފުރަތަމަ ހަފުތާ ތެރޭގައި އޭގެތެރިން އެއް ޖެނަރޭޓަރު ހަލާކުވުމާއެކު ކަރަންޓު ދިނުމުގައި ދަތިތަކެއް ދިމާވި ކަމަށް އޭނާ ފާހަގަކުރެއްވިއެވެ.
އެގޮތުން، އެކި ހިސާބުތަކުން ކަރަންޓު ކެނޑި ރައްޔިތުން ތަކުލީފުތަކާއި ކުރިމަތިލާން ޖެހުނުކަން ފާހަގަކުރައްވައި ސައީދު ވިދާޅުވީ، ހޮނިހިރު ދުވަހުގެ ހެނދުނު އަލަށް ގެނެވުނު ޖެނެެރޭޓަރުގެ ސަބަބުން ރައްޔިތުންނަށް 24 ގަޑިއިރު ކަރަންޓު ޔަގީންކަމާއެކު ފޯރުކޮށްދެވޭނެ ކަމަށެވެ. މިހާ އަވަސް މުއްދަތެއްގައި މައްސަލައަށް ދާއިމީ ހައްލެއް ލިބޭނެ އިންތިޒާމު ހަމަޖައްސަވައި ދެއްވުމަށްޓަކައި ހޯރަފުށީ ދާއިރާގެ މެމްބަރު އަހުމަދު ސަލީމް ދެއްވި އެއްބާރުލުމަށް އޭނާ ވަނީ ޝުކުރު އަދާކުރައްވާފައެވެ.
އަދި ކުރިޔަށް އޮތް ހަފުތާ ތެރޭގައި ޖެނެރޭޓަރު އިންސްޓޯލް ކުރެވޭނެ ކަމަށް އޭނާ ވަނީ ވިދާޅުވެފައެވެ.
