ކޮރޯނާވައިރަސް (ކޮވިޑް-19) އާ ގުޅުވައިގެން ޓޮޓެންހަމް ހޮޓްސްޕާގެ މިޑްފީލްޑަރު ޑެލޭ އަލީ ކުރި ވީޑިއޯއެއްގެ މައްސަލައިގައި އޭނާ އެއް މެޗަށް ސަސްޕެންޑް ކުރަން އިނގިރޭސި އެފްއޭއިން ނިންމައިފިއެވެ.

ފެބްރުއަރީ މަހު ސްނެޕްޗެޓަށް އަލީ އަޕްލޯޑްކުރި ވީޑިއޯއެއްގައި ވަނީ އެއާޕޯޓުގައި މާސްކް އަޅައިގެން ހުރެ ކުރިމަތީ ހުރި ޗައިނާ މީހާ އެރުވުމަށްފަހު ކޮވިޑް-19އާ ގުޅޭގޮތުން މަލާމާތްކުރުމުގެ ގޮތުން ވާހަކަދައްކާފައެވެ. އެ ވީޑިއޯއާ ގުޅިގެން ގިނަ ބަޔެއްގެ ފާޑުކިޔުން އޭނާއަށް އަމާޒުވުމުން އަލީ ވަނީ އެ ވީޑިއޯ ޑިލީޓް ކޮށްފައެވެ. އަދި ފަހުން ވަނީ އެކަމަށް މައާފަށްވެސް އެދިފައެވެ.

އެކަމަކު އިނގިރޭސި އެފްއޭއިން އެ މައްސަލަ ބެލިއިރު، އެ މައްސަލައިގައި އޭނާ އެއް މެޗަށް ސަސްޕެންޑް ކުރަން މިހާރު ވަނީ ނިންމާފައެވެ. އެހެންކަމުން މި މަހުގެ 17 ވަނަ ދުވަހު އިނގިރޭސި ޕްރިމިއާ ލީގު އަލުން ފަށާއިރު، 19 ވަނަ ދުވަހު ޓޮޓެންހަމުން އަމިއްލަ ދަނޑުގައި މެންޗެސްޓާ ޔުނައިޓެޑާ ދެކޮޅަށް ކުޅޭ މެޗުގައި އޭނާއަށް ނުކުޅެވޭނެއެވެ. މީގެ އިތުރުން އެފްއޭއިން ވަނީ އަލީ 50،000 (ފަންސާސް ހާސް) ޕައުންޑުން ޖޫރިމަނާވެސް ކޮށްފައެވެ.

އެފްއޭގެ ނިންމުމަށް ޖަވާބުދާރީވުމުގެ ގޮތުން އަލީ ނެރުނު ބަޔާނެއްގައި ވަނީ އަނެއްކާވެސް އެކަމަށް މާފަށް އެދިފައެވެ. އަދި މި ބަޔާނުގައި އޭނާ ވަނީ އެފްއޭގެ ނިންމުމަށް އިޚުތިރާމު ކުރާ ކަމަށްވެސް ބުނެފައެވެ.