ސިޓީ ސަސްޕެންޑް ކުރި މައްސަލައިގައި ގޮތް ނިންމުން ޖުލައި މަހުގެ ކުރީކޮޅު

ޔުއެފާއިން މެންޗެސްޓާ ސިޓީ ސަސްޕެންޑް ކުރި މައްސަލައިގައި ކޯޓް އޮފް އާބިޓްރޭޝަން ފޯ ސްޕޯޓްސް (ސީއޭއެސް) އިން ގޮތެއް ނިންމުން އަންނަ ޖުލައި މަހުގެ ކުރީކޮޅަށް ތާވަލުކޮށްފިއެވެ.

މިދިޔަ ފެބްރުއަރީ މަހު ޔުއެފާއިން ވަނީ ފައިނޭންޝިއަލް ފެއާ ޕްލޭ (އެފްއެފްޕީ) ގަވާއިދާ ސިޓީން ޚިލާފުވެފައި ވާތީ އެ ކްލަބު ޔޫރަޕުގެ މުބާރާތްތަކުން ސަސްޕެންޑް ކުރަން ނިންމާފަ އެވެ. ޔުއެފާއިން ކުރިއަށް އޮތް ދެ ސީޒަނަށް ސިޓީ ސަސްޕެންޑް ކުރުމުން، 2020/2021 އަދި 2021/2022 ވަނަ އަހަރުގެ ސީޒަނުގެ ޔޫރަޕް މުބާރާތްތަކުގައި އެޓީމަށް ނުކުޅެވޭނެ އެވެ. މީގެ އިތުރުން ޔުއެފާ އިން ވަނީ އެޓީމު 30 މިލިއަން ޔޫރޯ އިން ޖޫރިމަނާވެސް ކޮށްފައެވެ.

މީގެ ކުރިން ޔުއެފާގެ ކްލަބު ފައިނޭންޝިއަލް ކޮންޓްރޯލް ބޮޑީ (ސީއެފްސީބީ) އިން ވަނީ މި މައްސަލައިގައި ސިޓީން ފުރިހަމަ އެއްބާރުލުން ދީފައި ނުވާ ކަމަށްވެސް ބުނެފަ އެވެ.

އެކަމަކު ސިޓީން ވަނީ ސަސްޕެންޑްކުރި މައްސަލަ ސީއޭއެސް ގައި އިސްތިއުނާފު ކޮށްފަ އެވެ. ސިޓީގެ އިސްތިއުނާފް މައްސަލައިގެ އަޑުއެހުންތައް ސީއޭއެސްގައި ހޯމަ ދުވަހު ފެށިއިރު، މިހާރު ވަނީ މައްސަލަ ބަލައި ނިންމާފައެވެ. އަދި މި މައްސަލައިގައި ގޮތެއް ނިންމުން ޖުލައި މަހުގެ ކުރީކޮޅަށް ތާވަލުކޮށްފައިވާ ކަމަށް ރިޕޯޓުތައް ބުނެއެވެ.

ޔުއެފާއިން ސިޓީ ސަސްޕެންޑް ކުރި ނަމަވެސް، ސިޓީން އަންނަނީ އެއްވެސް ގޯހެއް ހަދާފައި ނުވާނެ ކަމަށް ތަކުރާރުކޮށް ބުނަމުންނެވެ. އަދި އެ ޓީމަށް ދީފައިވާ އަދަބަކީ އިންސާފުވެރިކޮށް ކޮށްފައިވާ ކަމެއް ނޫން ކަމަށް އެ ޓީމުން ބުނެއެވެ.

ސިޓީގެ މި މައްސަލައިގައި ޔުއެފާ އިން އަދަބު ދިންއިރު، އިނގިރޭސި އެފްއޭ އިންވެސް އަންނަނީ މި މައްސަލަ ބަލަމުންނެވެ. އަދި އެފްއޭ އިން ކުރާ ތަހުގީގު ސިޓީގެ މައްޗަށް ސާބިތުވެއްޖެނަމަ، އެ ކްލަބުގެ އަތުން 2014 ވަނަ އަހަރުގެ ލީގު ތަށި ނެގުމުގެ ފުރުސަތު އެބައޮތް ކަމަށް ރިޕޯޓުތައް ބުނެއެވެ.