ސެލްޓަ ވީގޯގެ ތަރިން ރާއްޖޭގެ ފަތުރުވެރިކަން އިސްތިހާރު ކޮށްފި

ކޮރޯނާވައިރަސް (ކޮވިޑް-19) ށްފަހު ރާއްޖޭގެ ފަތުރުވެރިކަން އަލުން ހުޅުވާލުމަށް ކުރިއަށް ގެންދާ ހަރަކާތްތަކުގައި، ރާއްޖޭން ސްޕޮންސާކޮށްފައިވާ ސްޕެނިޝް ލީގުގެ ސެލްޓަ ވީގޯގެ ކުޅުންތެރިން ބައިވެރިވެއްޖެއެވެ.

ރާއްޖެއިން އަންނަ ޖުލައި މަހު ބޯޑަރު އަލުން ހުޅުވާލަން ނިންމާފައިވާކަން ފަތުރުވެރިކަމާ ބެހޭ ވުޒާރާއިން އިއުލާން ކޮށްފައިވަނީ މިދިޔަ މެއި މަހުގެ 30 ވަނަ ދުވަހު އެވެ. އެގޮތުން އެ ވުޒާރާއިން ނެރުނު ބަޔާނެއްގައި ވަނީ، ޖުލައި މަހުން ފެށިގެން ރާއްޖެއަށް އަންނަން ބޭނުންވާ ފަތުރުވެރިންނަށް އާދެވޭނެ ކަމަށާއި، ފަތުރުވެރިން ރާއްޖެއަށް ޒިޔާރަތްކުރާއިރު، ހާއްސަ ފީއެއް ދައްކަން ނުޖެހެނޭ ކަމަށް ބުނެފައެވެ. ރާއްޖޭގެ ބޯޑަރު ބަންދުކުރީ ކޮވިޑް-19ގެ ނުރައްކާ ބޮޑުވުމުގެ ސަބަބުން މާޗު މަހުގެ 27 ވަނަ ދުވަހުއެވެ.

ރާއްޖޭގެ ފަތުރުވެރިކަން އަލުން އިސްތިހާރު ކުރުމަށް ކުރިއަށް ގެންދާ ހަރަކާތްތަކުގައި ސެލްޓަގެ ކުޅުންތެރިން ވަނީ ބައިވެރިވެ ހާއްސަ މެސެޖެއް ދީފައެވެ. ސެލްޓައިން ރާއްޖެ އިސްތިހާރު ކުރުމުގައި ބައިވެރިވީ ސްޕެއިން ގައުމީ ޓީމަށްވެސް ކުޅެފައިވާ ފޯވާޑް އިއާގޯ އަސްޕާސް އާއި ބާސެލޯނާގެ ލޯނެއްގެ ދަށުން ކުޅެމުން އަންނަ ބްރެޒިލްގެ ރަފީނިއާ އަލްކަންޓްރާ އާއި ކުރިން އާސެނަލާއި ބާސެލޯނާ އަށް ކުޅުނު ސްޕެއިންގެ ޑެނިސް ސުއާރޭޒް އަދި ރަޝިއާ ގައުމީ ޓީމުގެ ތަރި ފިޔޯޑޯ ސްމޯލޯފް އެވެ.

ރާއްޖޭގެ ފަތުރުވެރިކަން އިސްތިހާރު ކުރުމަށް ސެލްޓަ އާއެކު އެއްބަސްވުމުގައި ސޮއި ކޮށްފައިވަނީ މިދިޔަ އަހަރުގެ ނޮވެމްބަރު މަހުގެ ކުރީކޮޅު އެވެ. ތިން އަހަރު ދުވަހުގެ މުއްދަތަށް ވެފައިވާ މި އެއްބަސްވުމުގެ ދަށުން އަހަރަކު 900،000 (ނުވަ ލައްކަ) ޑޮލަރު ރާއްޖެއިން ޚަރަދު ކުރާނެއެވެ. އަހަރުން އަހަރަށް ބަދަލު ގެނެވޭގޮތަށް ހެދި މި އެއްބަސްވުމާއެކު ރާއްޖެއިން ތިން އަހަރުގެ ތެރޭގައި ސެލްޓަގެ ޖާޒީ އާއި ސްޓޭޑިއަމްގައި ރާއްޖޭ އިސްތިހާރު ކުރާނެއެވެ.

އަދި މި އެއްބަސްވުމުގެ ދަށުން ސެލްޓައިން ރާއްޖޭގެ ފުޓްބޯޅަ ކުރިއެރުވުމަށްވެސް އެކި ގޮތްގޮތުން އެހީވުމަށް ވަނީ ހަމަޖެހިފައެވެ. އެގޮތުން ރާއްޖޭގެ އެކި އުމުރު ފުރާތަކުގެ ގައުމީ ޓީމުތައް ސްޕެއިނަށް ގޮސް، އެ ކްލަބުގެ ޓްރެއިނިންގ ފެސިލިޓީތައް ބޭނުން ކުރެވޭނެ މަގު ފަހިވެގެން ދާނެއެވެ. އަދި ރަހުމަތްތެރިކަމުގެ މެޗުތައް ކުޅުމާއި ކޯޗުން ތަމްރީން ކުރުމާއި ސެލްޓަގެ އެކަޑަމީގައި ރާއްޖޭގެ ގައުމީ ޓީމުން ބޭނުންވާ ކުޅުންތެރިން ތިބެ ތަމްރީނުވުމުގެ ފުރުސަތުވެސް ފަހިކޮށްދޭ ގޮތަށް ވަނީ ހަމަޖެހިފައެވެ.

ކޮވިޑް-19 އާ ގުޅިގެން މެދުކަނޑާލި ސްޕެނިޝް ލީގުގެ ކުޅުން ބުރާސްފަތި ދުވަހުގެރޭ އަލުން ފަށާއިރު، ލީގުގެ 17 ވަނައިގައި އޮތް ސެލްޓަ ކުޅޭ މެޗުގައި އަމިއްލަ ދަނޑުގައި ހޮނިހިރު ދުވަހު ނުކުންނާނީ ވިޔަރެއާލްއާ ދެކޮޅަށެވެ.