އަންހެނުންގެ ވޯލްޑް ކަޕަށް ބިޑް ނުކުރަން ބްރެޒިލުން ނިންމައިފި

2023 ވަނަ އަހަރު ބޭއްވުމަށް ހަމަޖެހިފައިވާ ފީފާ އަންހެނުންގެ ވޯލްޑް ކަޕަށް ބިޑް ނުކުރަން ބްރެޒިލުން ނިންމައިފިއެވެ.

އަންހެނުންގެ ވޯލްޑް ކަޕަށް ބިޑް ކުރާނެ ކަމަށް ކުރިން ބްރެޒިލުން އިއުލާން ކުރިނަމަވެސް، އަންހެނުންގެ ވޯލްޑް ކަޕަށް ބިޑް ނުކުރަން ބްރެޒިލުން ނިންމީ ކޮރޯނާވައިރަސް (ކޮވިޑް-19) ގެ ސަބަބުން ބްރެޒިލަށް ދިމާވެފައިވާ މާލީ ހާލަތުގެ ސަބަބުން، އަންހެނުންގެ ވޯލްޑް ކަޕަށް ބޮޑު ޚަރަދެއް ނުކުރެވޭނެ ކަމަށް އެ ގައުމުގެ ސަރުކާރުން އެންގުމުންނެވެ. ހަމައެއާއެކު ބްރެޒިލްގެ ފުޓްބޯޅައިގެ މައި އިދާރާ، ބްރެޒިލިއަން ފުޓްބޯލް ކޮންފެޑެރޭޝަނުން މިހާރު ވަނީ އަންހެނުންގެ ވޯލްޑް ކަޕް ބޭއްވުމަށް ކޮލަމްބިއާއިން ކޮށްފައިވާ ބިޑަށް އެއްބާރުލުން ދޭން ނިންމާފައެވެ.

ކޮލަމްބިއާގެ އިތުރުން އަންހެނުންގެ ވޯލްޑް ކަޕް ބޭއްވުމަށް ބިޑް ކުރާނެ ކަމަށް އިއުލާން ކޮށްފައިވަނީ ޖަޕާނުގެ އިތުރުން އޮސްޓްރޭލިއާ އަދި ނިއުޒިލޭންޑް (ޖޮއިންޓް ބިޑުގެ އުސޫލުން) ނެވެ.

32 ޓީމު ވާދަކުރާ 2023 ވަނަ އަހަރުގެ އަންހެނުންގެ ވޯލްޑް ކަޕް ބޭއްވުމަށް ބިޑް ކޮށްފައިވާ ގައުމުތަކުގެ މެދުގައި ވޯޓުލުން ކުރިޔަށް ދާނީ މި މަހު 25 ވަނަ ދުވަހު އެވެ.

ބްރެޒިލިއަން ފުޓްބޯލް ކޮންފެޑެރޭޝަނުން ނެރުނު ބަޔާނެއްގައި ބުނެފައިވަނީ ކޮވިޑް-19ގެ ސަބަބުން އެ ގައުމަށް ދިމާވެފައިވާ މާލީ ހާލަތުން އަރައިގަތުމަކީ އުނދަގޫ ކަމެއް ކަމަށާއި މި ދަނޑިވަޅުގައި ވޯލްޑް ކަޕް ފަދަ ބޮޑު މުބާރާތެއް ބޭއްވުމަށް ބިޑް ނުކުރުމަށް ސަރުކާރުން ލަފާދީފައިވާ ކަމަށެވެ.

ބްރެޒިލުން ވަނީ ފަހަކަށް އައިސް ބޮޑެތި މުބާރާތްތަކެއް އެގައުމުގައި ބާއްވާފައެވެ. އޭގެތެރޭގައި 2014 ވަނަ އަހަރުގެ ފިރިހެނުންގެ ފީފާ ވޯލްޑް ކަޕާއި، 2016 ވަނަ އަހަރުގެ އޮލިމްޕިކް ގޭމްސް އާއި 2019 ވަނަ އަހަރުގެ ކޮޕަ އެމެރިކާ ހިމެނެއެވެ.

ކޮވިޑް-19ގެ އަސަރު ބްރެޒިލަށް ވެސް ކޮށްފައިވާއިރު، އެ ގައުމުން މިހާތަނަށް 742،000 ށްވުރެ ގިނަ މީހުން ވަނީ ވައިރަހަށް ޕޮޒިޓިވް ވެފައެވެ. އަދި ވައިރަސް ޖެހިގެން އެގައުމުން މިހާތަނަށް 38،400 ށްވުރެ ގިނަ މީހުން ވަނީ މަރުވެފައެވެ.