ބަންގުލަދޭޝްގެ އިތުރު 200 މީހަކު ފުރުވާލައިފި
މިހާތަނަށް 2000ށް ވުރެ ގިނަ މިހުން ވަނީ ފުރުވާލާފައި
މިއަދު ފުރި ބަންގުލަދޭޝް މީހުން ވެލާނާ އެއަރޕޯޓުގައި
ބަންގުލަދޭޝްފެ އިތުރު 200 މީހަކު ފުރުވާލައިފިއެވެ.
މޯލްޑިވިއަންއިން ކުރި ޓްވީޓެއްގައި ބުނެފައިވަނީ ބަންގުލަދޭޝްގެ 200 މީހަކު ގޮވައިގެން ޑާކައަށް ފުރާފައިވާ ކަމަށެވެ. މިއީ ބަންގުލަދޭޝް މީހުން ގޮވައިގެން މޯލްޑިވިއަނުން ކުރި 10 ވަނަ ދަތުރެވެ.
ފޮރިން މިނިސްޓްރީން ބުނެފައިވަނީ މިހާތަނަށް 2000ށް ވުރެ ގިނަ ބަންގުލަދޭޝް މީހުން އަނބުރާ ގައުމަށް ފޮނުވާލާފައިވާ ކަމަށެވެ. ބަންގްލަދޭޝް މީހުން ފޮނުވާލުމުގެ މަސައްކަތް ކުރަނީ އިކޮނޮމިކް މިނިސްޓްރީއާ ފޮރިން މިނިސްޓްރީ ގުޅިގެންނެވެ.
ބަންގްލަދޭޝް މީހުން އަނބުރާ ގައުމަށް ފޮނުވާލުމުގެ މަސައްކަތް ފެށުނީ، ރާއްޖޭގައި މަސައްކަތްކުރާ ބަންގްލަދޭޝްގެ އާބާދީގެ ތެރޭގައި ހަލުވިކަމާއި އެކު ކޮވިޑް-19 ފެތުރެން ފެށުމުންނެވެ. ހާއްސަކޮށް ތޮއްޖެހިގެން ދިރިއުޅޭ ބިދޭސީންގެ ތެރެއިން ޕޮޒިޓިވްވާ ކޭސްތަކުގެ އަދަދު ވަނީ ގިނަވެފައިއެވެ. ތޮއްޖެހުން ކުޑަކުރުމުގެ ގޮތުން ސަރުކާރުން ކުރަމުންދާ މަސައްކަތުގެ ތެރެއިން ބައެއް ބިދޭސީން ވަނީ ސަރުކާރުން ގާއިމްކޮށްފައިވާ ފެސިލިޓީސްތަކަށް ބަދަލުކޮށްފައެވެ.
ހެލްތް މިނިސްޓްރީގެ ތަފާސް ހިސާބުތައް ދައްކާގޮތުން ބަންގްލަދޭޝްގެ 1000ށް ވުރެ ގިނަ މީހުން ވަނީ ޕޮޒިޓިވްވެފައި އެވެ. ބިދޭސީން ގަވާއިދާ އިމުގެ ތެރެއަށް ވެއްދުމަށް އިކޮނޮމިކް މިނިސްޓްރީން ދަނީ މަސައްކަތްތަކެއްވެސް ކުރަމުންނެވެ. އެކަމަކު ކޮވިޑް-19 ގެ ނުރައްކާ ބޮޑުވުމުން އެކަންތައްވަނީ މަޑު ޖައްސާލާފައެވެ.
