ވީޑިއޯ ހަދަން ހަރަދުވީ 3000 ރުފިޔާ: އަލީ ވަހީދު
ވީޑިއޯ ނެގުމާއި އެޑިޓް ކުރުމުގައި ހަރަކާތްތެރިވީ މިނިސްޓްރީ މުވައްޒަފުން
ބޯޑަރު ހުޅުވާލާކަން އާންމު ކުރުމަށް ޓުއަރިޒަމް މިނިސްޓްރީން ހެދި ވީޑިއޯގެ ޝޫޓިންގެ ތެރެއިން މިނިސްޓަރ އަލީ ވަހީދު
ޖުލައިގައި އަލުން ފަތުރުވެރިކަމަށް ހުޅުވާލުވުމަށް ތައްޔާރުވެފައިވާކަން ދައްކުވައިދިނުމަށް ޓުއަރިޒަމް މިނިސްޓްރީން ހެދި ވީޑިއޯއަށް ހަރަދުވީ 3000 ރުފިޔާކަމަށް ޓުއަރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.
މިނިސްޓަރ އަލި ވަހީދު ފެނިގެންދާ މި ވީޑިއޯއަށް ހަރަދުވި މިންވަރު ހާމަކުރައްވާފައިވަނީ އޮންލައިން ނޫހެއް ކަމަށްވާ ދިޔަރެސް އިން އެކަމުގެ މައުލޫމާތު ހޯދަން އެދިފައިވާތީއެވެ. 56 ސިކުންތުގެ މި ވީޑިއޯއަކީ ޖުލައިމަހު ރާއްޖޭގެ ބޯޑަރު އަލުން ހުޅުވާލާކަން އާންމުކުރުމުގެ ގޮތުން ޓުއަރިޒަމް މިނިސްޓްރީން ތައްޔާރު ކުރި ވީޑިއޯއެކެވެ.
ދިޔަރެސް އިން ހޯދަން އެދިފައިވާ މައުލޫމާތުގައި ބުނެފައިވަނީ ކޮވިޑް-19 ގެ ސަބަބުން ދިވެހިރާއްޖެއަށް ފަތުރުވެރިން ގެނައުން ހުއްޓުވާފައި އޮތުމަށްފަހު، އަންނަ ޖުލައި މަހު ރާއްޖޭގެ ބޯޑަރު ބޭރުގެ ފަރާތްތަކަށް ހުޅުވާލާނެކަން އިއުލާންކުރެއްވުމަށް، ޓުއަރިޒަމް މިނިސްޓްރީން ތައްޔާރު ކުރި 56 ސިކުންތުގެ ވީޑިއޯ ކްލިޕް ތައްޔާރު ކުރަން މިނިސްޓްރީން ކުރި ހަރަދަކީ ކޮބައިކަން ހޯދުމަށެވެ. މިގޮތުން، އެއްވެސް އަމިއްލަ ފަރާތަކާއި ހަވާލުކޮށްގެން އެ މަސައްކަތް ކުރިއަށް ގެންގޮސްފައިވާނަމަ، އެ ފަރާތަކަށް ދިން ފައިސާގެ އަދަދާއި އެ ފަރާތަކާއި އެކު ވެވުނު އެއްބަސްވުމުގެ ކޮޕީ އަދި ކުރެވިފައިވާ އެހެން މުއާމަލާތްތަކުގެ ކޮޕީގެ އިތުރުން މިކަމަށް އިތުރު ހަރަދެއް ކުރެވިފައިވާނަމަ އޭގެ ތަފްސީލު ދިނުމަށް އެދިފައިވެއެވެ.
ދިޔަރެސް ނޫހުން ކޮށްފައިވާ ޓްވީޓާއި ގުޅިގެން މިނިސްޓަރ އަލީ ވަހީދު ވިދާޅުވީ އެކަން ބަލަމުންދާތީ ޝުކުރު އަދާކުރައްވާ ކަމަށެވެ. އަދި ކެމެރާގެ މަސައްކަތާއި ޕްރޮޑަކްޝަންގެ މަސައްކަތަކީ ޓުއަރިޒަމް މިނިސްޓްރީންގެ ސްޓާފުންގެ ބުރަ މަސައްކަތެއް ކަމަށާއި، 3000 ރުފިޔާ މިއުޒިކް ކޮމްޕޯސަރަށް ދީފައިވާނެ ކަމަށެވެ. އެހެންކަމުން މި މަސައްކަތުގެ ޖުމްލަ އަގަކީ 3000 ރުފިޔާ ނުވަތަ 194 ޑޮލަރު ކަމަށެވެ.
އަންނަ މަހު ބޯޑަރު ހުޅުވާލަން ނިންމާފައިވާ ކަން ޓޫރިޒަމް މިނިސްޓްރީން އިއުލާންކޮށްފައިވަނީ މިދިޔަ މަހުގެ 30 ގައެވެ.
ޓޫރިޒަމް މިނިސްޓްރީން ނެރުނު ބަޔާނެއްގައި ވަނީ، ޖުލައި މަހުން ފެށިގެން ރާއްޖެއަށް އަންނަން ބޭނުންވާ ފަތުރުވެރިންނަށް އާދެވޭނެ ކަމަށެވެ. އަދި ފަތުރުވެރިން ރާއްޖެއަށް ޒިޔާރަތްކުރާއިރު ހާއްސަ ފީއެއް ދައްކަން ނުޖެހެނޭ ކަމަށް ވެސް އެ ބަޔާނުގައި ބުނެފައިވެއެވެ. ރާއްޖޭގެ ބޯޑަރު ބަންދުކުރީ ކޮވިޑް-19ގެ ނުރައްކާ ބޮޑުވުމުގެ ސަބަބުން ނިމުނު މާރިޗު މަހުގެ 27 ވަނަ ދުވަހުއެވެ.
