ލިވަޕޫލްގެ ދަނޑުގައި މެޗުތައް ކުޅުނަސް މައްސަލައެއް ނެތް: މޭޔަރު

އިނގިރޭސި ޕްރިމިއަރ ލީގުގެ ބާކީ ހުރި މެޗުތައް ލިވަޕޫލްގެ ދަނޑުގައި ކުޅުނަސް މައްސަލައެއް ނެތް ކަމަށް ލިވަޕޫލްގެ މޭޔަރު ޖޯ އެންޑަރސަން ވިދާޅުވެއްޖެ އެވެ.

މާރޗު މަހު ޕްރިމިއަރ ލީގު ކުޅުން ހުއްޓާލިއިރު، ސަޕޯޓަރުން ނުވައްދާ މެޗުތައް ކުޅޭ ގޮތަށް މިމަހުގެ 17 ވަނަ ދުވަހު ޕްރިމިއަރ ލީގު އަލުން ފަށަން މިހާރު ވަނީ ނިންމާފަ އެވެ.

މީގެ ކުރިން އޭޕްރީލް މަހުގެ ތެރޭގައި އެންޑަސަން ވަނީ ލީގު މެޗުތައް ސަޕޯޓަރުން ނުވައްދައި ކުޅުނު ނަމަވެސް، ދަނޑު ބޭރަށް މީހުން އެއްވާނެ ކަމަށާއި އެހެން ކަމުން މި ދަނޑިވަޅުގައި ލީގު ކުރިއަށް ގެންދިއުމަކީ ގެއްލުންތަކެއް ވެދާނެ ކަމެއް ކަމަށް ވުމުން، ލީގު ކެންސަލް ކުރަން ގޮވާލައްވާފަ އެވެ.

އެކަމަކު ދާދި ފަހުން ކުރިއަށް ގެންދިޔަ މަޝްވަރާތަކަށް ފަހު އެންޑަރސަން ވަނީ ލިވަޕޫލްގެ ދަނޑުގައި މެޗުތައް ކުޅުނަސް އެއްވެސް މައްސަލައެއް ނެތް ކަމަށް ވިދާޅުވެފަ އެވެ.

ދަނޑަށް ސަޕޯޓަރުން ނުވައްދައި މެޗުތައް ކުޅެން ނިންމާފައިވީ ނަމަވެސް، ދަނޑު ބޭރުގައި ސަޕޯޓަރުން އެއްވެ، އިޖުތިމާއީ ގައިދުރުކަމުގެ އުސޫލުތަކާ ޚިލާފުވާ ގިނަ ކަންތައްތަކެއް ހިނގައިފާނެ ކަމަށް ފެންނާތީ އިނގިރޭސިވިލާތުގެ ފުލުހުން ވަނީ ފަސް މެޗެއް 'ނިއުޓްރަލް' ދަނޑެއްގައި ކުޅެން ލަފާދީފަ އެވެ.

އެ ފަސް މެޗަކީ އެވަޓަން އާއި ލިވަޕޫލް ކުޅޭ މެޗާއި، މެންޗެސްޓަރ ސިޓީ އާއި ލިވަޕޫލް ކުޅޭ މެޗާއި، މެންޗެސްޓަރ ސިޓީ އާއި ނިއުކާސަލް ކުޅޭ މެޗާއި، މެންޗެސްޓަރ ޔުނައިޓެޑާއި ޝެފީލްޑް ޔުނައިޓެޑް ކުޅޭ މެޗުގެ އިތުރުން ނިއުކާސަލް އާއި ލިވަޕޫލް ބައްދަލުކުރާ މެޗު ކަމަށް ރިޕޯޓުތައް ބުނެއެވެ.

މިހާތަނަށް ލިވަޕޫލުން އެވަޓަން އާއި ސިޓީއާ ދެކޮޅަށް ކުޅޭ މެޗުތައް ކުރިއަށް ގެންދާނެ ދަނޑެއް ކަނޑައަޅާފައި ނުވާއިރު، މިމަހުގެ 21 ވަނަ ދުވަހު އެވަޓަން އާއި ލިވަޕޫލް ޑާބީ މެޗުގައި ބައްދަލުކުރާނެ އެވެ. ރިޕޯޓުތައް ބުނާ ގޮތުން އެވަޓަން އާއި ލިވަޕޫލް ބައްދަލުކުރާ މެޗު ކުޅޭނެ ދަނޑަކާ ގުޅޭގޮތުން މަޝްވަރާ ކުރުމަށް ލިވަޕޫލްގެ ސިޓީ ކައުންސިލުން ހޯމަ ދުވަހު ބައްދަލުވުމެއް ބޭއްވުމަށް ވަނީ ނިންމާފަ އެވެ.

ޕްރިމިއަރ ލީގު މެދުކަނޑާލިއިރު، އެއްވަނައިގައި 82 ޕޮއިންޓާއެކު ލިވަޕޫލް އޮތީ 25 ޕޮއިންޓުގެ ލީޑަކާ އެކު އެވެ. 30 އަހަރަށްފަހު ލީގު ޗެމްޕިއަންކަން ހޯދަން ލިވަޕޫލަށް ބޭނުންވަނީ އެންމެ 6 ޕޮއިންޓެވެ.