ޕްރިމިއާ ލީގަށް އެނބުރި ދާން ބޭލް ބޭނުމެއް ނުވޭ: އޭޖެންޓް

ރެއާލް މެޑްރިޑަށް ކުޅެމުން އަންނަ ވޭލްސްގެ ތަރި ގެރެތު ބޭލް އެނބުރި އިނގިރޭސި ޕްރިމިއާ ލީގަށް ދާން ބޭނުންނުވާ ކަމަށް އޭނާގެ އޭޖެންޓް ބުނެފި އެވެ.

ރެއާލަށް 2013 ވަނަ އަހަރުގެ ސީޒަނުގައި ބަދަލުވި ބޭލް، އެ ކްލަބާއެކު ހަދާފައިވާ އެއްބަސްވުން 2022 ގެ ނިޔަލަށް އާކޮށްފައި ވާއިރު، އެއްބަސްވުން ހަމަވުމުން އޭބނާ ކްލަބު ބަދަލުކުރަން ބޭނުންވާ ކަމަށް މީގެ ކުރިން ވަނީ ރިޕޯޓުކޮށްފައެވެ. ބޭލް މީގެ ކުރިން ވަނީ ރެއާލް އާއެކު ހަދާފައިވާ އެއްބަސްވުން ހަމަވުމުން، ދެން ކުޅެން ޝައުގުވެރިވަނީ އެމެރިކާގެ މޭޖާ ލީގުގައި ކަމަށް ބުނެފަ އެވެ. އެއާއެކު އެމެރިކާގެ އިންޓަ މަޔާމީން ވެސް އަންނަނީ ބޭލް ހޯދުމަށް މަސައްކަތް ކުރަމުންނެވެ.

ބޭލް ހޯދުމަށް އޭނާގެ ކުރީގެ ކްލަބު ޓޮޓެންހަމް ހޮޓްސްޕާ އާއި ނިއުކާސަލް ޔުނައިޓެޑުން ވެސް މަސައްކަތް ކުރަމުން އަންނައިރި، ބޭލްގެ އޭޖެންޓް ދާދި ފަހުން ބުނީ ބޭލް ރެއާލް ދޫކޮށްލިޔަސް، އެނބުރި ޕްރިމިއާ ލީގަށް ނުދާނެ ކަމަށެވެ. އަދި މިވަގުތު ބޭލް ރެއާލްގައި ހުރީ ހިތްހަމަޖެހިގެން ކަމަށާއި، އެހެން ޓީމަކަށް ބަދަލުވުމާއި މެދު ގޮތެއް ނިންމާނީ ރެއާލް އާއެކު ހަދާފައިވާ އެއްބަސްވުން ހަމަވުމުން ކަމަށްވެސް ބުންޏެވެ.

ޕްރިމިއާ ލީގަށް އެނބުރި ދާން ބޭލް ބޭނުންނުވާ ކަމަށް އޭނާގެ އޭޖެންޓް ބުނި ނަމަވެސް، ނިއުކާސަލް ޔުނައިޓެޑުން އަންނަނީ ބޭލް ގަތުމަށް 53 މިލިއަން ޕައުންޑް ޚަރަދުކުރަން ތައްޔާރުވަމުންނެވެ.

2013 ވަނަ އަހަރު ބޭލް ރެއާލަށް ބަދަލުވީ އޭރު ދުނިޔޭގެ ރެކޯޑް އަގެއް ކަމަށްވާ 100 މިލިއަން ޑޮލަރަށެވެ. ރެއާލާއެކު ބޭލް ވަނީ މިދިޔަ ހަތް ސީޒަނުގައި ފާހަގަކޮށްލެވޭ ގިނަ ކާމިޔާބީތަކެއް ހޯދާފައެވެ. އެގޮތުން ބޭލް ވަނީ ރެއާލަށް މިހާތަނަށް ކުޅުނު 249 މެޗުގައި 105 ލަނޑު ކާމިޔާބުކޮށް، އެ ކްލަބާއެކު ޔުއެފާ ޗެމްޕިއަންސް ލީގު ހަތަރު ފަހަރު، ޔުއެފާ ސުޕަ ކަޕް ތިން ފަހަރު، ކްލަބު ވޯލްޑް ކަޕް ތިން ފަހަރު، ސްޕެނިޝް ލީގު އެއް ފަހަރު، ސްޕެނިޝް ކަޕް އެއް ފަހަރު އަދި ސްޕެނިޝް ސުޕަ ކަޕް އެއް ފަހަރު ކާމިޔާބުކޮށްފައެވެ.