ވެލެންސިއާއާ ދެކޮޅަށް އެޓަލާންޓާ ކުޅުނު މެޗަށް ދިޔައިރު، އެ ޓީމުގެ ކޯޗު ޖިއަން ޕިއޭރޯ ގެސްޕަރީނީގެ ކިބައިން ކޮރޯނާވައިރަސް (ކޮވިޑް-19) ގެ އަލާމާތްތައް ފެނުނު ކަމަށް ބުނެ ވާހަކަ ދެއްކުމާ ގުޅިގެން އެ މައްސަލަ ހޫނުވެއްޖެ އެވެ.

ކޮވިޑް-19ށް އެޓަލާންޓާގެ ކޯޗު ގެސްޕަރީނީ ޕޮޒިޓިވްވީ މާޗު މަހުގެ ކުރީކޮޅުއެވެ. އެގޮތުން މާޗު މަހުގެ 11 ވަނަ ދުވަހު ޔުއެފާ ޗެމްޕިއަންސް ލީގުގެ ގަދަ 16 ގެ ދެވަނަ ބުރުގެ ދެވަނަ ލެގުގައި ރަށުން ބޭރުގައި އެޓަލާންޓާ އިން ވެލެންސިއާއާ ދެކޮޅަށް ކުޅުނު މެޗުގެ ކުރިން ވައިރަހުގެ އަސަރު އޭނާ އަށް ކުރި ކަމަށް ގެސްޕަރީނީ ވަނީ ބުނެފައެވެ.

އެ މެޗަށްފަހު ވެލެންސިއާ ސްކޮޑުގެ 35 އިންސައްތަ ކުޅުންތެރިން ވަނީ ކޮވިޑް-19ށް ޕޮޒިޓިވް ވެފައެވެ. އެހެންކަމުން ވެލެންސިއާ އިން ވަނީ ވައިރަހުގެ އަސަރު ހުރެ ގެސްޕަރީނީ އެ ދުވަހު މެޗަށް ދިޔަކަން ހާމަކުރުމުން، ނުރުހުން ފާޅު ކޮށްފައެވެ.

ވެލެންސިއާގެ އޮފިޝަލަކު ބުނީ ކޮވިޑް-19ގެ އަލާމަތްތައް ހުއްޓައި ގެސްޕަރީނީ މެޗަށް އައުމަކީ އޭނާ ހެދި ވަރަށް ބޮޑު ގޯހެއް ކަމަށާއި އޭގެ ސަބަބުން ވަރަށް ގިނަ މީހުން ނުރައްކަލަކަށް ހުށަހެޅިގެންދިޔަ ކަމަށެވެ. މި މައްސަލައިގައި ސްޕެއިންގެ ސަރުކާރުން ވެސް ވަނީ ގެސްޕަރީނީގެ ފަރާތުން ފެނުނު ކަންތައްތަކާ މެދު ހިތްހަމަނުޖެހުން ފާޅުކޮށްފަ އެވެ.

ވެލެންސިއާ އިން ފާޑުކިޔުމާ ގުޅިގެން ގެސްޕަރީނީ ވެސް ވަނީ އޭނާގެ ދިފާއުގައި ވާހަކަ ދައްކައިފަ އެވެ. ގެސްޕަރީނީ ބުނީ ހަގީގަތުގައި ކަން ހިގައިދިޔަ ގޮތް ކިޔައިދިނީ އެއީ އޭނާ ބޭނުންވި ގޮތް ކަމަށާއި އެކަން ނުފޮރުވުމުން މިހާރު އޭނާ އަށް ކުރިމަތިވެފައި މިވަނީ މާ އުނދަގޫ ހާލަތެއް ކަމަށެވެ.

ކޮވިޑް-19ން ގެސްޕަރީނީ މިހާރު ރަނގަޅުވެފައިވާއިރު، މީގެ ކުރިން ގެސްޕަރީނީ ވަނީ މީޑިއާގައި އޭނާގެ ތަޖުރިބާ ހިއްސާ ކޮށްފައެވެ. ގެސްޕަރީނީ ބުނީ ކޮވިޑް-19 ގެ ސަބަބުން އޭނާ އަށް ވަރަށް ބޮޑަށް އަސަރުކުރި ކަމަށާއި، މަރާ ކުރިމަތިލާން ޖެހިދާނެ ކަމުގެ ބިރު އޭނާ އަށް ހީވި ކަމަށެވެ.

ދެ ލެގުން ވެލެންސިއާގެ މައްޗަށް ކުރިހޯދައި އެޓަލާންޓާ ވަނީ ޗެމްޕިއަންސް ލީގުގެ ކުއާޓާ ފައިނަލުން ފުރުސަތު ހޯދާފައެވެ. ކޮވިޑް-19ގެ ސަބަބުން މާޗު މަހު ޗެމްޕިއަންސް ލީގު މެދުކަނޑާލީ ދެވަނަ ބުރުގެ ދެވަނަ ލެގުގެ މެޗުތަކުގެ ތެރެއިންނެވެ. ޔުއެފާ އިން މިހާރު އަންނަނީ އޮގަސްޓް މަހު ޗެމްޕިއަންސް ލީގާއި ޔޫރޮޕާ ލީގު އަލުން ފަށަން މަސައްކަތް ކުރަމުންނެވެ.