ކޮސްޓާ އަށް ކުރި ޖަލު ހުކުން ޖޫރިމަނާއަކަށް ލުއިކޮށްދީފި

ޓެކުހަށް މަކަރު ހެދިކަން ސާބިތުވެ އެތުލެޓިކޯ މެޑްރިޑްގެ ފޯވާޑް ޑިއޭގޯ ކޮސްޓާ އަށް ސްޕެއިންގެ ކޯޓަކުން ކުރި ހަ މަހުގެ ޖަލު ހުކުން ޖޫރިމަނާއަކަށް ލުއިކޮށްދީފި އެވެ.

ރިޕޯޓުތައް ބުނާ ގޮތުން ކޮސްޓާ ވަނީ ޓެކުހުގެ ގޮތުގައި ދައްކަން ޖެހޭ އެއް މިލިއަނަށް ވުރެ ގިނަ ޔޫރޯ އަށް މަކަރު ހަދާފައެވެ. އޭގެ ތެރޭގައި 2014 ވަނަ އަހަރު ޗެލްސީން އެތުލެޓިކޯއަށް ބަދަލުވިއިރު، ޓްރާންފާ ފީން ދައްކަން ޖެހޭ ޓެކުހުން މަކަރު ހަދާފައިވާ ކަމަށް ވަނީ ރިޕޯޓު ކޮށްފައެވެ. އަދި އިމޭޖް ރައިޓްސްގެ ގޮތުގައި ލިބިފައިވާ އާމްދަނީން ދައްކަން ޖެހޭ ޓެކުހުގެ އެއް މިލިއަން ޔޫރޯ އިންވެސް އޭނާ މަކަރު ހަދާފައިވާ ކަމަށް ވަނީ ރިޕޯޓު ކޮށްފައެވެ.

މި މައްސަލައިގައި މެޑްރިޑްގެ ކޯޓަކުން ބުރާސްފަތި ދުވަހު ހުކުންކުރީ ކޮސްޓާ ހަ މަސް ދުވަހަށް ޖަލަށް ލުމަށެވެ.

ސްޕެއިނުގެ ގާނޫނުގައިވާ ގޮތުން، ފުރަތަމަ ފަހަރަށް ނުރައްކާތެރި ނޫން މިފަދަ ކުށެއް ކުރާ މީހަކަށް ދެ އަހަރަށް ވުރެން ކުރު މުއްދަތެއްގެ ޖަލު ހުކުމެއް އައިސްފިނަމަ ޖޫރިމަނާ ދައްކައިގެން ޖަލު ހުކުމް ތަންފީޒު ނުކޮށް ސަލާމަތްވެވޭނެ އެވެ.

ކުރެވުނު ކުށަށް އިއުތިރާފުވެ، އުމުރުން 31 އަހަރުގެ ކޮސްޓާ ނިންމީ ޖަލު ހުކުމް ތަންފީޒުނުކޮށް ޖޫރިމަނާގެ ގޮތުގައި 36،000 (ތިރީސް ހަ ހާސް) ޔޫރޯ ދައްކާށެވެ. އަދި ކޮސްޓާ ވަނީ އިމޭޖް ރައިޓްސް ކޮމްޕެނީ މެދުވެރިކޮށް ޓެކުހަށް މަކަރު ހެދި އެއް މިލިއަން ޔޫރޯ ދައްކާފައެވެ.

ފާއިތުވި 15 ވަރަކަށް އަހަރަށް ބަލާއިރު ސްޕެއިން ލީގުގެ ވަރަށް ގިނަ ކުޅުންތެރިންނާއި އެ ކުޅުންތެރިންގެ އޭޖެންޓުން އަދި ކޯޗުން ޓެކުހަށް މަކަރު ހެދުމުގެ ތުހުމަތުގައި ވަނީ ކޯޓަށް ހާޒިރުކޮށް ޖަލު ހުކުން އިއްވާފައެވެ. އޭގެ ތެރޭގައި މަޝްހޫރު ފުޓްބޯޅަ ދެ ތަރިން ކަމަށްވާ ލިއޮނެލް މެސީ އާއި ކްރިސްޓިއާނޯ ރޮނާލްޑޯ ވެސް ހިމެނެއެވެ.

އެގޮތުން ޓެކުހަށް މަކަރު ހެދި ކަމަށް ބުނެ ދެ އަހަރު ދުވަހުގެ ޖަލު ހުކުމެއް ރޮނާލްޑޯ އަށް އިއްވިއިރު، އޭނާ އެ މައްސަލަ ހައްލުކުރީ 20 މިލިއަން ޔޫރޯ ދައްކައިގެންނެވެ. އަދި މެސީ އަށް 21 މަހުގެ ޖަލު ހުކުމެއް އިއްވިއިރު، މެސީ އެ މައްސަލަ ހައްލުކުރީ 252،000 (ދެ ލައްކަ ފަންސާސް ދެ ހާސް) ޔޫރޯ ދައްކައިގެންނެވެ.