އޭޝިއާ ސަރަހައްދުގެ ވޯލްޑް ކަޕް ކޮލިފައިންގ މެޗުތައް އޮކްޓޯބަރު މަހަށް ތާވަލުކޮށްފި

ކޮރޯނާވައިރަސް (ކޮވިޑް-19) އާ ގުޅިގެން ފަސްކުރި އޭޝިއާ ސަރަހައްދުގެ ފީފާ ވޯލްޑް ކަޕް ކޮލިފައިންގ މެޗުތައް އޮކްޓޯބަރު މަހަށް ތާވަލުކޮށްފި އެވެ.

އޭޝިއާ ސަރަހައްދުގައި ފީފާ ވޯލްޑް ކަޕް ކޮލިފައިންގ މެޗުތައް ކުރިއަށްދަނީ އޭއެފްސީ އޭޝިއަން ކަޕާ ގުޅުވާލައިގެން ޖޮއިންޓް ކޮލިފިކޭޝަނެއްގެ ގޮތުގައެވެ.

އެގޮތުން މީގެ ކުރިން އޭއެފްސީ އާއި ފީފާ އިން ވަނީ މާޗު މަހާއި ޖޫން މަހު ކުޅެން ތާވަލުކޮށްފައި ހުރި މެޗުތައް މުއްދަތެއް ނެތް ގޮތަށް ފަސްކޮށްފައެވެ. އޭގެ ތެރޭގައި މާޗު މަހުގެ 26 ވަނަ ދުވަހު ރާއްޖެ އާއި ޗައިނާ ކުޅޭ މެޗާއި 31 ވަނަ ދުވަހު ރާއްޖެ އާއި ސީރިއާ ކުޅޭ މެޗު އަދި ޖޫން މަހުގެ ނުވަވަނަ ދުވަހު ފިލިޕީންސް އާއި ރާއްޖެ ކުޅޭ މެޗު ހިމެނުނެވެ.

ދާދި ފަހުން އޭއެފްސީން ވަނީ ފީފާގެ ހުއްދަ އާއެކު އެ ދެ މަހު ކުޅެން ތާވަލުކޮށްފައި ހުރި މެޗުތައް އޮކްޓޯބަރު މަހާއި ނޮވެމްބަރު މަހަށް ތާވަލު ކޮށްފައެވެ. އެގޮތުން ރާއްޖެ އާއި ޗައިނާގެ މެޗު މިހާރު ވަނީ އޮކްޓޯބަރު މަހުގެ އަށްވަނަ ދުވަހަށް ތާވަލު ކޮށްފައެވެ. އެކަމަކު މި މެޗު ކުޅޭނެ ދަނޑެއް ނިންމާފައެއް ނުވެއެވެ. މީގެ ކުރިން މި މެޗު ވަނީ ތައިލެންޑުގައި ކުޅުމަށް ވެސް ތާވަލުކޮށްފައެވެ.

މީގެ އިތުރުން ރާއްޖެ އާއި ސީރިއާ ކުޅޭ މެޗު އޮކްޓޯބަރު މަހުގެ 13 ވަނަ ދުވަހަށް މާލޭގައި ކުޅުމަށް ތާވަލު ކޮށްފައިވާއިރު، ރަށުން ބޭރުގައި ފިލިޕީންސް އާ ދެކޮޅަށް ރާއްޖެ ކުޅޭ މެޗު ވަނީ ނޮވެމްބަރު މަހުގެ 17 ވަނަ ދުވަހަށް ތާވަލުކޮށްފައެވެ.

އޭޝިއާ ސަރަހައްދުގައި 40 ގައުމެއް ކޮލިފައިންގައި ވާދަކުރާއިރު، އޭއެފްސީން ބުނީ މެޗުތައް ބާއްވާނީ އެ ގައުމެއްގެ ސަރުކާރުން ދަތުރުކުރުމަށާއި ސިއްހީ ގޮތުން ކަނޑައަޅާ އުސޫލުތަކާ އެއްގޮތްވާ ގޮތުގެ މަތިން ކަމަށެވެ.

އޭޝިއާ ސަރަހައްދުން ހަތަރު ގައުމެއް 2022 ވަނަ އަހަރުގެ ފީފާ ވޯލްޑް ކަޕަށް ކޮލިފައިވާއިރު، ކޮލިފައިންގައި ރާއްޖެ އޮތީ ހަތަރު މެޗުން ހަ ޕޮއިންޓާ އެކު ގްރޫޕުގެ ހަތަރުވަނައިގަ އެވެ. ގްރޫޕުގެ އެއްވަނައިގައި އޮތީ ފަސް މެޗުން 15 ޕޮއިންޓާ އެކު ސީރިއާ އެވެ. ޗައިނާ ހަތަރު މެޗުން ހަތް ޕޮއިންޓާ އެކު ދެވަނައިގައި އޮތްއިރު، ތިންވަނައިގައި އޮތީ ފަސް މެޗުން ހަތް ޕޮއިންޓު ހޯދާފައިވާ ފިލިޕީންސެވެ. ރާއްޖޭގެ ފަހަތުން ފަސްވަނައިގައި އޮތީ ފަސް މެޗު ކުޅެ ޕޮއިންޓެއް ލިބިފައިނުވާ ގުއާމެވެ.