ވާނާގެ ސޮއި ޗެލްސީން ހޯދައިފި

ޖަރުމަންގެ އާރުބީ ލެއިޕްޒީގަށް ކުޅެމުން އަންނަ ހުނަރުވެރި ފޯވާޑް ޓިމޯ ވާނާގެ ސޮއި ޗެލްސީން ހޯދައިފި އެވެ.

ވާނާގެ ސޮއި ޗެލްސީން ހޯދީ އޭނާ ލެއިޕްޒީގާއެކު ހަދާފައިވާ އެއްބަސްވުން އުވާލަން ދައްކަން ޖެހޭ 54 މިލިއަން ޕައުންޑް ޗެލްސީން ދައްކަން އެއްބސްވުމުން ކަމަށް ރިޕޯޓުތައް ބުނެއެވެ. ލެއިޕްޒީގާއެކު ވާނާ ހަދާފައިވާ އެއްބަސްވުމުގައިވާ ގޮތުން މިމަހު 15 ވަނަ ދުވަހުގެ ކުރިން 54 މިލިއަން ޕައުންޑް ޓްރާންސްފާ ފީ އެއް ދައްކައިގެން އޭނާ ގަތުމުގެ އިޚުތިޔާރު ލިބެ އެވެ.

ވާނާގެ ސޮއި ޗެލްސީން ހޯދިއިރު، އޭނާ ރަސްމީކޮށް ޗެލްސީ އަށް ބަދަލުވާނީ މި ސީޒަންގެ އިނގިރޭސި ޕްރިމިއާ ލީގު ނިމުމުންނެވެ.

ޗެލްސީ އަށް ބަދަލުވާން ވާނާ އެއްބަސްވިއިރު، އޭނާ ހޯދުމަށް މީގެ ކުރިން އިންޓަ މިލާނާއި، ބާސެލޯނާ އާއި، މެންޗެސްޓާ ޔުނައިޓެޑް އަދި ލިވަޕޫލުން ވެސް ވަނީ މަސައްކަތްކޮށްފަ އެވެ. މީގެ ތެރެއިން ވާނާ އަށް އެންމެ ބޮޑަށް ފާރަލީ ލިވަޕޫލުންނެވެ.

އެގޮތުން މީގެ ކުރިން ލިވަޕޫލްގެ ކޯޗު ޔާގެން ކްލޮޕް އާއެކު މަސައްކަތްކުރަން ބޭނުންވާ ކަމަށް ވާނާ ބުނި ނަމަވެސް، ލިވަޕޫލުން ވަނީ ކޮރޯނާވައިރަސް (ކޮވިޑް-19) ގެ މި ހާލަތުގައި އެ ވަރުގެ އަގެއް އިތުރު ފޯވާޑަކަށް ޚަރަދުކުރަން ބޭނުންނުވާ ކަމަށް ބުނެ، އަގު ކުޑަކުރަން ހުށަހަޅާފަ އެވެ. އެކަމަކު ލެއިޕްޒީގުން އެކަމަށް އެއްބަސްވެފައެއް ނުވެއެވެ.

އުމުރުން 24 އަހަރުގެ ވާނާ އަންނަ ސީޒަނުގައި ޗެލްސީ އަށް ބަދަލުވާން އެއްބަސްވިއިރު، އޭނާ އަންނަނީ މި ސީޒަނުގައި މޮޅު ކުޅުމެއް ދައްކަމުންނެވެ. އެގޮތުން ވާނާ ވަނީ މި ސީޒަނުގައި މިހާތަނަށް 40 މެޗުން 31 ލަނޑު ކާމިޔާބުކޮށްފައެވެ.

ގަވާއިދާ ޚިލާފާށް ކުޅުންތެރިން ރަޖިސްޓްރީ ކުރުމުގައި ޗެލްސީން ފީފާ ގަވާއިދުގެ 150 ކަމަކާ ޚިލާފުވެފައިވާތީ ދެ ޓްރާންސްފާ ބާޒާރުގައި ކުޅުންތެރިން ނުގެނެވޭ ގޮތަށް ދިން އަދަބު މިދިޔަ އަހަރުގެ ޑިސެމްބަރު މަހު ސީއޭއެސް އިން ލުއިކޮށްދިން އިރު، ވާނާ އަކީ އޭގެ ފަހުން ޗެލްސީން ހޯދި ދެވަނަ ކުޅުންތެރިޔާ އެވެ.

މީގެ ކުރިން އެ ކްލަބުން ސޮއި ހޯދާފައިވަނީ އަޔަކްސް އަށް ކުޅެމުން އަންނަ މޮރޮކޯގެ ތަރި ހަކީމް ޒިޔެކް އެވެ. އެކަމަކު އޭނާ ވެސް ޗެލްސީއާ ގުޅޭނީ މި ސީޒަނުގެ އިނގިރޭސި ޕްރިމިއާ ލީގު ނިމުމުންނެވެ.