ޣައްޒާގެ މިސްކިތްތައް ހުޅުވައިފި

ފަލަޞްޠީނުގެ ޣައްޒާގެ މިސްކިތްތައް ޢާންމުކޮށް ހުޅުވާލައިފި އެވެ.

ޙަމާސް ޖަމާޢަތުން ކޮންޓްރޯލް ކުރަމުންދާ ޣައްޒާގެ މިސްކިތްތައް ހުޅުވާލާފައިވަނީ ބުދަ ދުވަހުގެ ކަމަށް ގަލްފުގެ މީޑިއާތަކުން ރިޕޯޓުކޮށްފައިވެއެވެ. މިސްކިތްތަކުގެ އިތުރުން ޕްރީސް ސްކޫލްތައްވެސް ބުދަ ދުވަހު ހުޅުވާލާފައިވާކަމަށް ޚަބަރު ލިބެއެވެ.

މިޞްރާއި، އިސްރާއީލުން ޣައްޒާގެ ޞަރަހައްދީ އިންތައް ކޮންޓްރޯލް ކުރަމުންދާއިރު، ޣައްޒާގައި ކޮވިޑް-19 ގެ ޚާއްޞަ ޙާލަތުގައި ޣައްޒާގެ ރައްޔިތުން ތަޙައްމަލު ކުރަމުން ދިޔައީ ދަތި އުދަނގޫ ދުވަސްތަކެއްކަމަށް ބައިނަލްއަޤުވާމީ މުޙައްލިލުން ބުނެއެވެ. ޣައްޒާއިން 61 މީހުން ކޮވިޑް-19 ށް ޕޮޒިޓިވްވެފައިވާއިރު، މަރުވެފައިވަނީ އެންމެ މީހެކެވެ. ދެމިލިއަންގެ އާބާދީއެއް އޮންނަ ޣައްޒާގައި އަދިވެސް ކަރަންޓީން އާއި އައިސޮލޭޝަން ފެސިލިޓީސްތަކުގައި އަދިވެސް މީހުން އެޑްމިޓްކޮށްގެން ފަރުވާ ދެމުން އެބަދެއެވެ.

ދެ މަސްދުވަހަށްފަހު ޣައްޒާގެ މިސްކިތްތައް ހުޅުވާލުން ގިނަ ބަޔަކު މިސްކިތައް ޖަމާވަމުންދާއިރު، ފަލަޞްޠީނުގެ ކަމާއިބެހޭ ފަރާތްތަކުން ވަނީ މިސްކިތައް ޖަމާވާއިރު، އަމަލު ކުރަން ޖެހޭ ޚާއްޞަ އުޞޫލުތަކެއް ކަނޑައަޅާފައެވެ. އޭގެތެރޭގައި ގޭގައި ވުޟޫކުރުމާއި، ޤުރުއާނުގެ މުޞްޙަފް ހިފައިގެން މިސްކިތައް ދިއުމަށް އުޞޫލުގައި ވެއެވެ. އަދި މިސްކިތުން އެހެން އަޚުންނާއި ދިމާވާއިރު ސަލާމް ނުކުރުމަށާއި، މިސްކިތުގައި ހުންނަ ޤުރުއާނުގެ މޫޞްޙަފުތަކާއި، ދީނީ އެހެނިހެން ފޮތްތަައް ނުނެގުމަށް އިލްތިމާސްކޮށްފައިވެއެވެ.

ޣައްޒާގެ ޕްރީ ސްކޫލްތައްބަންދު ކުރީ މަރޗް މަހުގައެވެ. ޣައްޒާގެ އިބްތިދާއީ، މެދު މަދުރަސީ އަދި ޘާނަވީ ގްރޭޑްތަކުގެ ދަރިވަރުންގެ ދިރާސީ އަހަރުގެ ކިޔެވުން މިހާރު ވަނީ ނިމިފައެވެ. އަންނަ ހޮނިހިރު ދުވަހަކީ އެ ދަރިވަރުންގެ ފަހު އިމްތިހާނު ބާއްވާ ދުވަަހެވެ.

ކޮވިޑް-19 އާއި ގުޅިގެން ޙަމާސް ޖަމާއަތުން ޣައްޒާގައި ސަލަމާތާއުި ރައްކާތެރިކަމުގެ ގޮތުން ފިޔަވަޅުތައް އެޅިނަމަވެސް، ޙާލަތު ބަދަލުވަމުން ދިއުމާއި ގުޅިގެން ބައެއް ފިޔަވަޅުތައް ލުއިކޮށް އަދި ބައެއް ފިޔަވަޅުތައް އުވާލާފައިވެއެވެ. އެގޮތުން ރެސްޓޯރެންޓުތަކާއި ބައެއް ކުދި ވިޔަފާރިތައް ހުުވުމުގެ ހުއްދަ ދިނެވެ. އެހެންނަމަވެސް އިޤުތިޞާދީ މައި ޙަރަކާތްތައް އަދިވެސް އޮތީ ހުއްޓިފަ އެވެ.