"މާޓިނޭޒް ވިއްކާނީ ބާސާ އިން 111 މިލިއަން ޔޫރޯ ދެއްކުމުން"

އާޖެންޓީނާ ގައުމީ ޓީމުގެ ފޯވާޑް ލަޓާރޯ މާޓިނޭޒް ބާސެލޯނާ އަށް ވިއްކާނީ އޭނާގެ އެއްބަސްވުން އުވާލަން ޖެހޭ 111 މިލިއަން ޔޫރޯ ދެއްކުމުން ކަމަށް އިންޓަ މިލާނުގެ ސްޕޯޓިންގ ޑިރެކްޓަރު ޕިއޭރޯ އައުސީލިއޯ ބުނެފި އެވެ.

ބާސާ އިން ފޯވާޑެއް ހޯދުމަށް މަސައްކަތް ކުރަމުން އަންނައިރު، ކުރިއަށް އޮތް ހޫނު މޫސުމުގެ ޓްރާންސްފާ ބާޒާރުގައި އެޓީމުން އެންމެ ބޮޑަށް ފާރަލާ ކުޅުންތެރިއަކީ މާޓިނޭޒް އެވެ. އެއާއެކު ކުރިއަށް އޮތް ހޫނު މޫސުމުގައި ބާސާ އަށް ބަދަލުވާން ބޭނުންވާކަން އިންޓަ އަށް މާޓިނޭޒް އަންގާފައިވާ ކަމަށް ރިޕޯޓުތައް ބުނެއެވެ.

މާޓިނޭޒް އިންޓަ އާއެކު ހަދާފައިވާ އެއްބަސްވުން އުވާލަން، ބާސާ އިން 111 މިލިއަން ޔޫރޯ ދައްކަން ޖެހެއެވެ. އެކަމަކު ކޮރޯނާވައިރަސް (ކޮވިޑް-19) އާ ގުޅިގެން ބާސާ އަށްވެސް މާލީ ދަތިތަކާ ކުރިމަތިލާން ޖެހިފައިވާއިރު، އިންޓަ އިން އެ އަދަދު 90 މިލިއަން ޔޫރޯ އަށް ކުޑަކޮށްދީފައިވާ ކަމަށް މީގެ ކުރިން ރިޕޯޓުތައް ވަނީ ބުނެފައެވެ. އެއާއެކު ބާސާ އިން އެ އަދަދު ދެއްކުމަށާއި، ބާސާގެ ބައެއް ކުޅުންތެރިން އިންޓަ އަށް ހުށަހެޅުމަށް މަސައްކަތް ކުރި ކަމަށް ރިޕޯޓުތައް ބުންޏެވެ.

އެކަމަކު އިންޓަގެ ސްޕޯޓިންގ ޑިރެކްޓަރު ޕިއޭރޯ އައުސީލިއޯ ބުނީ މާޓިނޭޒް އަކީ އިންޓަ އިން ވިއްކަން ބޭނުންވާ ކުޅުންތެރިއެއް ނޫން ކަމަށާއި، ބާސާ އަށް މާޓިނޭޒް ވިއްކާނީ އޭނާގެ އެއްބަސްވުން އުވާލަން ދައްކަން ޖެހޭ 111 މިލިއަން ޔޫރޯ ދެއްކުމުން އެކަނި ކަމަށެވެ.

ބާސާ އިން މާޓިނޭޒް ހޯދުމަށް މަސައްކަތް ކުރަމުން އަންނައިރު، މީގެ ކުރިން ބައެއް މީޑިއާތަކުން ވަނީ ބާސާ އިން މާޓިނޭޒްއަށް އަހަރަކު 10 މިލިއަން ޔޫރޯގެ މުސާރައެއް ހުށަހަޅަންވެސް ތައްޔާރަށް އޮތް ކަމަށް ރިޕޯޓުކޮށްފައެވެ. ބާސާގެ އިތުރުން މެންޗެސްޓާ ސިޓީން ވެސް އަންނަނީ މާޓިނޭޒް އަށް ފާރަލަމުންނެވެ.

އުމުރުން 22 އަހަރުގެ މާޓިނޭޒް އިންޓަ އަށް ބަދަލުވީ މިދިޔަ އަހަރުގެ ސީޒަނުގައި ފަސް އަހަރުގެ އެއްބަސްވުމެއް ދަށުންނެވެ. އާޖެންޓީނާގެ ރޭސިން ކްލަބުން 22 މިލިއަން ޔޫރޯއަށް އިންޓައަށް ބަދަލުވި މާޓިނޭޒް އަންނަނީ އެޓީމުގައި މޮޅު ކުޅުމެއް ދައްކަމުންނެވެ. އެގޮތުން މާޓިނޭޒް ވަނީ މިހާތަނަށް އިންޓަ އަށް ކުޅެދިން 66 މެޗުގައި 25 ލަނޑު ޖަހާފައެވެ.

އަދި އޭނާ ވަނީ އާޖެންޓީނާ ގައުމީ ޓީމަށް މިހާތަނަށް ކުޅެދިން 17 މެޗުގައި 9 ލަނޑު ކާމިޔާބުކޮށްފައެވެ.