މިއަހަރު ބޭއްވުމަށް ހަމަޖެހިފައިވާ ޓްވެންޓީ20 ވޯލްޑް ކަޕް ފަސްކުރަން ނިންމި ވާހަކަތައް އިންޓަނޭޝަނަލް ކްރިކެޓް ކައުންސިލް (އައިސީސީ) ން ދޮގުކޮށްފި އެވެ.

މިއަހަރުގެ ޓީ20 ވޯލްޑް ކަޕް ބޭއްވުމަށް ތާވަލުކޮށްފައިވަނީ އޮސްޓްރޭލިއާގައި އޮކްޓޯބަރު މަހުގެ 18 ވަނަ ދުވަހުން ފެށިގެން ނޮވެމްބަރު މަހުގެ 15 ވަނަ ދުވަހުގެ ނިޔަލަށެވެ. އިންޑިއާގެ ބައެއް މީޑިއާތަކުން ވަނީ މި މުބާރާތް 2022 ވަނަ އަހަރަށް ފަސްކުރަން އައިސީސީން ނިންމާފައިވާ ކަމަށް ރިޕޯޓުކޮށްފައެވެ.

ޓީ20 ވޯލްޑް ކަޕާ ގުޅޭ ގޮތުން މަޝްވަރާ ކުރުމަށް އައިސީސީގެ ބޯޑު މެމްބަރުން ބުރާސްފަތި ދުވަހު ބައްދަލުކުރާނެއެވެ.

އައިސީސީގެ ސްޕޯކްސްޕާސަން ވިދާޅުވީ މިއަހަރު ބޭއްވުމަށް ތާވަލުކޮށްފައި އޮތް ޓީ20 ވޯލްޑް ކަޕާ ގުޅޭ ގޮތުން އަދި ވަކި ނިންމުމެއް ނިންމާފައި ނުވާނެ ކަމަށާއި، ރޭވިފައި އޮތީ މިހާރު އޮތް ތާވަލާ އެއްގޮތަށް ކުރިއަށް ދިޔުމަށެވެ. އަދި އެކަމާ ގުޅޭ ގޮތުން ވަކި ގޮތެއް ނިންމާނީ ބުރާސްފަތި ދުވަހު އޮންނަ ބައްދަލުވުމުގައި ކަމަށްވެސް ވިދާޅުވިއެވެ.

ޓީ20 ވޯލްޑް ކަޕް ބޭއްވުމަށް ހަމަޖެހިފައި އޮތް އޮސްޓްރޭލިއާއަކީ މިހާތަނަށް ކޮރޯނާވައިރަސް (ކޮވިޑް-19) ފެތުރުން ކޮންޓްރޯލް ކުރި ގައުމުތަކުގެ ތެރޭޣައި ފާހަގަކޮށްލެވޭ ގައުމެކެވެ. އޮސްޓްރޭލިއާގެ ކްރިކެޓް އޮފިޝަލަކުވެސް ވަނީ ޓީ20 ވޯލްޑް ކަޕް ބޭއްވުން ފަސްކުރި ޚަބަރު ދޮގުކޮށްފައެވެ.