ރާއްޖޭގައި އިއުލާނުކޮށްފައިވާ ފުރަބަންދަށް 40ށް ވުރެ ގިނަ ދުވަސް ވެފައިވާއިރު، ހުރިހާ ގޮތަކުންވެސް މި ފުރަބަންދު ވަނީ އަޅުގަނޑުމެންގެ ދިރިއުޅުމަށް ބޮޑެތި ބަދަލުތަކެއް ގެނެސްފައެވެ. ދައުލަތުގެ ބޮޑެތި މުއައްސަސާތަކުގެ މަސައްކަތްތަކުން ފެށިގެން އެންމެ އާދައިގެ ރައްޔިތުންގެ އާންމު ދިރިއުޅުމަށްވެސް ވަނީ ބޮޑެތި ބަދަލުތަކެއް އައިސްފައެވެ. އެއާއެކު އިޖުތިމާއީ ގުޅުންތަކާއި، އާންމު ދިރިއުޅުމުގައި އެކަކު އަނެކަކާ އޮންނަ ގުޅުންތައް ބަދަހި ކުރުމަށް ކޮށްއުޅޭ ކަންކަމަށްވެސް ބަދަލުތަކެއް އައިސްފައިވާއިރު، އޭގެ ތެރޭގައި އުފަންދުވަހުގެ ތަހުނިޔާއާއި މުބާރަކްބާދީ އަދާކުރުމުގެ އިތުރުން، އުފަންދުވަސް ފާހަގަ ކުރުމުގައި އައިސްފައިވާ ބަދަލުތައް ފާހަގަކޮށްލެވެއެވެ.

ރާއްޖެޓީވީގެ އޮންއެއަރ އޮޕަރޭޓަރ ރޫނާ ޝިޔާމްއަށް 21 އަހަރު ފުރުނު އުފަންދުވަހާ ކުރިމަތިލީއިރު، ރޫނާ ހުރީ މަސައްކަތް ކުރަމުންދާ އޮފީހުގައި ލޮކްޑައުންވެ، އެ މަސައްކަތުގައި މަސްއޫލުވެގެންނެވެ. އާއިލާއާއި ރައްޓެހިންނާ ދުރުގައި އޮފީހުގައި މަހަކަށްވުރެ ގިނަ ދުވަސްވެފައިވާއިރު، ރޫނާގެ އެންމެ ގާތް އެކުވެރިޔާ ވަނީ އެތަކެއް މޭލު ދުރުން ބެލަރުސްއިން ރޫނާގެ އުފަންދުވަސް ފާހަގަކޮށްދީފައެވެ.

ފުރަބަންދުގެ މިފަދަ ޙާލަތެއްގައިވެސް އިޖުތިމާއީ ގުޅުންތައް ބަދަހި ކުރުމަކީ މާ އުނދަގޫކަމެއް ނޫންކަން ރޫނާގެ "ބެސްޓްފްރެންޑް" ޝަހުރު މިވަނީ ސާބިތު ކޮށްދީފައެވެ.

ބެލަރުސްގައި ތައުލީމު ހާސިލުކުރަމުންދާ ޝަހުރު އޭނާގެ އެކުވެރިންނާއެކު ރޭވި މި ސަޕްރައިޒް ހަޤީޤަތުގައިވެސް ވަރަށް ފުރިހަމައެވެ. އަދި އުފަންދުވަހު މި މަންޒަރުތައް އެތަކެއް މޭލު ދުރުން އޮފީސް ލޮކްޑައުންއެއްގައި ހުރެ ފޭސް ބުކް ލައިވްއިން ބަލަމުންދިޔަ ވަގުތު ލިބުނު އުފާވެރިކަން ރޫނާ ވަނީ ހިއްސާކޮށްފައެވެ.

ކޭކް ފެޅުމުގެ އިތުރުން، ޝަހުރު ވަނީ ރޫނާގެ އުފަންދުވަހަށް ޚާއްސަކޮށް ހަވާވެސް އަރުވާފައެވެ. އެގޮތުން ހަވާ އަރުވާފައިވަނީ އެކުވެރިޔާއަކީ އަބަދުވެސް ހަވާ އަރުވާ މަންޒަރު ބެލުމަށް ޝައުޤުވެރިވާ މީހަކަށްވެފައި، ފުރަބަންދުގެ މި ޙާލަތުގައި އެކުވެރިޔާގެ އުފަންދުވަސް އިތުރަށް ޚާއްސަކޮށްލުމުގެ މަޤްސަދުގައި ކަމަށް އޭނާ ބުންޏެވެ.

ރާއްޖޭގައި ސިއްޙީ ކުއްލި ނުރައްކަލުގެ ޙާލަތު އިއުލާނުކޮށް، މާލެ ސަރަޙައްދު ފުރަބަންދު ކުރިތާ ގިނަ ދުވަސްތަކެއް ވެފައިވާއިރު، މިފަދައިން އިޖުތިމާއީ ގުޅުންތައް ބަދަހި ކުރާ ގޮތްތަކަށް މިވަނީ ވަރަށް ބޮޑަށް ބަދަލު އައިސްފައެވެ.

އާއިލާއާއި ރައްޓެހިންނާއި އެކުގައި އެއްތަނަކަށް އެއްވެ ވަގުތު ހޭދަކުރުން މިވަނީ މަދު ކުރަން ޖެހިފައެވެ. އެއާއެކުވެސް އިޖުތިމާއީ ގުޅުން ބަދަހި ކުރާނެ އިތުރު ގޮތްތަކަކަށް މިވަނީ ހޭނެން ޖެހިފައެވެ.

ރާއްޖޭގައި ކޮވިޑް-19 ކޮންޓްރޯލް ކުރުމަށް އަޅަމުންދާ ފިޔަވަޅުތަކަށް އެއްބާރުލުން ދިނުމަށްޓަކައި، އައު ނޯރމަލްއެއްގައި އިޖުތިމާއީ ގުޅުންތައް ބަދަހި ކުރާނެ ގޮތްތަކެއް ހޯދަން މިވަނީ ޖެހިފައެވެ. މިފަދަ ދަނޑިވަޅެއްގައި ގިނަ ބަޔަކު އެއް ތަނަކަށް އެއްވެ ހަފްލާތައް ބޭއްވުމުގެ ބަދަލުގައި ދުރުގައި ތިބެގެންވެސް އައު ނޯރމަލްއެއްގައި ހަފްލާތައް ބާއްވާނެ ގޮތެއް މިހާރު މިވަނީ ހޯދަން ޖެހިފައެވެ. ޝަހުރު މިވަނީ އެކަމުގެ ފުރިހަމަ މިސާލެއް ދައްކުވައިދީފައެވެ.