ދުވާލަކު 3000 ސާމްޕަލް ނެގުމުގެ ކެޕޭސިޓީ އެބަހުރި: އާރުއާރުޓީ
ދުވާލެއްގެ މައްޗަށް ނެގެނީ 250-300 ސާމްޕަލް
ސާމްޕަލް ނެގުމުގެ މަސައްކަތުގައި އާރްއާރްޓީ ޓީމުން ހަކާތްތެރިވަނީ
ދުވާލެއްގެ މައްޗަށް 3000 ސާމްޕަލް ނެގުމުގެ ގާބިލުކަން އެބަހުރި ކަމަށް ރެޕިޑް ރެސްޕޮންސް ޓީމު (އާރުއާރުޓީ) ގެ ލީޑު މެމްބަރު އަބްދުލް ހަމީދު ވިދާޅުވެއްޖެއެވެ.
ރާއްޖެޓީވީން ގެނެސްދޭ ކޮވިޑް-19 ކަވަރޭޖަށް ދެއްވި އިންޓަރވިއުއެއްގައި ހަމީދު ވިދާޅުވީ ދުވާލެއްގެ މައްޗަށް 3000 ސާމްޕަލް ނެގުމަށް ބޭނުންވާ ވަސީލަތްތައް އެބަހުރި ކަމަށެވެ.
މިހާރު ދުވާލެއްގެ މައްޗަށް ނެގެނީ 250-300 ސާމްޕަލްކަން ފާހަގަކުރައްވާ ހަމީދު ވިދާޅުވީ ކުރިއަށް އޮތް 6 ދުވަހެއްގެ ތެރޭގައި ސާމްޕަލްތައް ނަގާ އަދަދު ދެގުނަ ވެގެންދާނެ ކަމަށެވެ. އަދި އޭގެ 6 ދުވަސްފަހުން ހަތަރު ގުނައަށް އިތުރުވެގެންދާނެ ކަމަށެވެ.
ހަމީދު ވިދާޅުވީ މިހާރު 24 ގަޑިއިރާއި 48 ގަޑިއިރުގެ ތެރޭގައި ގިނަ ސާމްޕަލްތައް ނެގޭނެ ކަމަށެވެ.
ހަމީދު ވިދާޅުވީ ކުރިއަށް އޮތް ދެދުވަހެއް ތެރޭގައި ހޯމް ކަރަންޓީނު ކުރަން ފެށުމާއި އެކްޓިވް ސަރވެއިލެންސްގެ ދަށުން ސާމްޕަލް ނެގުމުގެ ކަންކަން ވަރަށް ބޮޑަށް ފުޅާވެގެންދާނެ ކަމަށެވެ. އަދި ޓެސްޓުކުރުންވެސް އިތުރުވެގެންދާނެކަން ފާހަގަކުރައްވާ ހަމީދު ވިދާޅުވީ މިހާރު ސާމްޕަލްތައް ނެގުމަށް ވަކިތަންތަން ކަނޑައެޅުމަށް މަޝްވަރާ ކުރަމުންދާނެކަމަށެވެ.
