އައިޔޫއެމްއިން މިއަހަރުގެ ކޯސް ފީ އިން 20 އިންސައްތަ އުނިކުރުމަށް ނިންމައިފި
24 މެއި 2020 | އާދީއްތަ 18:12މާލީ ދަތިތަކަށް ލުޔެއް ހޯދައިދިނުމަށް ޔުނިވަރސިޓީ ކައުންސިލުން ނިންމާފައިވޭ
އިސްލާމިކް ޔުނިވާސިޓީ - އެ ޔުނިވާސިޓީން ވަނީ ދަރިވަރުންނަށް ގިނަ ލުއިތަކެއް ދީފައި
އިސްލާމިކް ޔުނިވަރސިޓީ (އައިޔޫއެމް) ގައި ތައުލީމު ހާސިލްކުރާ ދަރިވަރުންގެ މި އަހަރުގެ ކޯސް ފީ އިން 20 އިންސައްތަ އުނިކުރުމަށް ނިންމައިފިއެވެ.
އައިޔޫއެމްއިން މި ނިންމުން ނިންމާފައިވަނީ ކޮވިޑް-19އާ ގުޅިގެން ދިމާވެފައިވާ ދަތިހާލަތާއި ގުޅިގެން ދަރިވަރުންނަށް ލުއި ގޮތްތައް ހޯދައިނުމަށެވެ.
ރާއްޖޭގެ މިީޑިޔާއަކަށް ދެއްވި އިންޓަވިޔުއެއްގައި އައިޔޫއެމްގެ ޑެޕިއުޓީ ވައިސް ޗާންސެލަރ ޑރ. ސައުދުﷲ އަލީ ވިދާޅުވީ ކޮވިޑް-19އާ ގުޅިގެން ދަރިވަރުންނަށް ދިމާވާ މާލީ ދަތިތަކަށް ލުޔެއް ހޯދައިދިނުމަށް ޔުނިވަރސިޓީ ކައުންސިލުން ނިންމާފައިވާ ކަމަށެވެ. އެގޮތުން މިއަހަރުގެ ކޯސް ފީގެ 20 އިންސައްތަ ކުޑަ ކުރުމަށް ނިންމާ އެކަން މިހާރު ދަރިވަރުންނަށް އަންގާފައިވާ ކަމަށް ވެސް ޑރ.ސައުދުﷲ ވިދާޅުވިއެވެ. އަދި މާލެސިޓީ ލޮކްޑައުން ކުރުމާ ގުޅިގެން ވެސް ގިނަ ދަތިތަކެއް ދަރިވަރުންނަށް ކުރިމަތިވެފައިވާކަން ޑރ. ސައުދުﷲ ފާހަގަކުރެއްވިއެވެ.
ކޮވިޑް-19ގެ މިހާލަތުގައި އޮންލައިންކޮށް ކޯސްތަކުގެ ކިޔެވުން ފެށުމަށް ތައްޔާރުވަމުން އަންނަކަން ފާހަގަކުރައްވައި ޑރ. ސައުދުﷲ ވިދާޅުވީ ދިރާގާ އުރީދޫއާ މަޝްވަރާތައް ކުރެވި ކޮންމެ ދަރިވަރަކަށް 5 ޖީބީގެ ޑޭޓާ ހިލޭ ދިނުމާއި، ކަނެކްޝަން ހުންނަ ގޭގެއިން ހިލޭ މޫޑުލްއަށް ވަދެވޭ ގޮތަށް ހަދާފައިވާކަމަށެވެ. މާލެ ސިޓީ ލޮކްޑައުން ކުރުމުގެ ކުރިން ވެސް އައިޔޫއެމްއިން ދިޔައީ އޮންލައިންކޮށް ކްލާސްތައް ނަގާ ދެމުންނެވެ.
މީގެ އިތުރުން ޑރ. ސައުދުﷲ ވިދާޅުވީ އޮންލައިންކޮށް ކޯސްތައް ހިންގުމަށް މިިހާރު ޚާއްސަ ޕްލޭންތަކެއް ހަދާފައިވާ ކަމަށާއި، މިމަހުގެ 28 ވަނަ ދުވަހުން ފެށިގެން އަނެއްކާ ވެސް އޮންލައިންކޮށް ކިޔަވައިދޭން ފަށާނެ ކަމަށެވެ. އަދި ވިދާޅުވީ މިހާރު ހަދާފައިވާ ޕްލޭންގައި ވާގޮތުން މިއަހަރުގެ ފުރަތަމަ ސެމިސްޓަރގެ ކިޔެވުން ޖުލައިމަހުގެ ނިޔަލަށް އެއްކޮށް ނިންމާލެވޭނެ ކަމަށެވެ.
