ދިރާސީ އާ އާހަރުގެ ކިޔެވުން ފެށޭނީ އަންނަ އަހަރު މެދު ތެރޭގައި: މިނިސްޓަރު
އެހެން ވިދާޅުވީ، ރާއްޖެ ޓީވީއަށް ދެއްވި އިންޓަވިއުއެއްގައި
ރައީސް އޮފީހުގައި ބޭއްވި ޕްރެސްކޮންފަރެންސެއްގައި އެޑިއުކޭޝަން މިނިސްޓަރު ވާހަކަދައްކަވަނީ
ކޮވިޑް-19 އާ ގުޅިގެން އެކަޑަމިކް ކަލަންޑަރަށް އައި ބަދަލުތަކާއިއެކު ދިރާސީ އާ އަހަރުގެ ކިޔެވުން ފެށޭނީ އަހަރުގެ މެދު ތެރޭގައި ކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެ އެވެ.
މިނިސްޓަރ ވިދާޅުވީ މިއަހަރުގެ އޮކްޓޯބަރު/ނޮވެންބަރު ގައި ބޭއްވުމަށް ކުރިން ތާވަލުކުރެވިފައިވާ ސާނަވީ ނިންމާ އިމްތިޙާނުތައް 2021 ވަނަ އަހަރުގެ މޭ/ޖޫން ގައި ބޭއްވުމަށް ނިންމާފައިވާ ކަމަށެވެ. އަދި މިބަދަލާއި އެކު އަލް މަދްރަސަތުލް ޢަރަބިއްޔަތުލް އިސްލާމިއްޔާގެ ދަރިވަރުން ހަދާ 'ޝަހާދާ ސާނަވިއްޔާ' އިމްތިހާންތައްވެސް މިއަހަރު ނޯންނާނެކަމަށް ވެސް ވިދާޅުވިއެވެ.
މި އިމްތިހާން ވެސް އޮންނާނީ މޭ/ޖޫން ގައިއެވެ.
އެޑިއުކޭޝަން މިނިސްޓްރީން ބުނީ މިހާރު ގްރޭޑް 10 ގައި ކިޔަވާ ދަރިވަރުންނާއި މިއަހަރު ޝަހާދާ ސާނަވިއްޔާ އިމްތިހާން ހަދާ އަރަބިއްޔާ ސްކޫލްގެ ދަރިވަރުން މޭ/ޖޫން އިމްތިޙާނުތައް ނިމެންދެން އެ ދަރިވަރަކު މިހާރު ކިޔަވަމުންދާ ސްކޫލެއްގެ ދަރިވަރެއްގެ ގޮތުގައި ދެމިތިބޭނެކަމަށެވެ.
