މިހާތަނަށް 61.9 މިލިއަން ޑޮލަރު އެހީއާއި ލޯނުގެ ގޮތުގައި ލިބިފައިވޭ
ވާރލްޑް ބޭންކުން ލިބިފައިވަނީ 17.3 މިލިއަން ޑޮލަރު
ނެޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރ އަމީރު ބައިވެރިވެވަޑައިގަންނަވަނި
މިހާތަނަށް 61.9 މިލިއަން ޑޮލަރު އެހީއެއް ލޯނުގެ ގޮތުގައި ލިބިފައިވާ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
ނެޝަނަލް އިމަރޖެންސީ އޮޕަރޭޝަން ސެންޓަރުގައި ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ފިނޭންސް މިނިސްޓަރު ވިދާޅުވީ ވާރލްޑް ބޭންކުން ލިބިފައި ވަނީ 17.3 މިލިއަން ޑޮލަރު ކަމަށާއި، އޭޝިއަން ޑިވެލޮޕްމަންޓް ބޭންކް (އޭޑީބީ) އިން ލިބިފައި ވަނީ 0.6 މިލިއަން ޑޮލަރު ކަމަށެވެ. މީގެ އިތުރުން އިސްލާމިކް ޑިވެލޮޕްމަންޓް ބޭންކް (އައިޑީބީ) މެދުވެރިކޮށް ލިބިފައި ވަނީ 15.1 މިލިއަން ޑޮލަރު ކަމަށާއި، އިންޓަރނޭޝަނަލް މަނިޓަރީ ފަންޑް (އައިއެމްއެފް) މެދުވެރިކޮށް ލިބިފައި ވަނީ 28.9 މިލިއަން ޑޮލަރު ކަމަށެވެ.
މީގެ އިތުރުން އެކިއެކި ފައިނޭންޝިއަލް އިންސްޓިޓިއުޓްތަކުން މަސައްކަތް ކުރަމުން ދަނީ ފައިސާ ހަމަޖައްސަން ކަމަށާއި، 'އިންޑިކޭޓިވް ފިގަރ' އެއްގެ ގޮތުގައި ގާތްގަޑަކަށް 290 މިލިއަން ޑޮލަރުގެ ފަންޑިންގ މިހާތަނަށް ޔަގީން ކުރެވިފައިވާނެ ކަމަށް މިނިސްޓަރ ވިދާޅުވި އެވެ.
މިނިސްޓަރ ވިދާޅުވީ ވާރލްޑް ބޭންކުން ލިބިފައިވާ 17.3 މިލިއަން ޑޮލަރުގެ ތެރެއިން 10 މިލިއަން ޑޮލަރުގެ 50 އިންސައްތަ އަކީ ލޯނު ކަމަށާއި 50 އިންސައްތަ އަކީ ހިލޭ އެހީ ކަމަށެވެ. އަދި 7.3 މިލިއަން ޑޮލަރުގެ ތެރެއިންވެސް 50 އިންސައްތަ އަކީ ލޯން އަދި އަނެއް 50 އިންސައްތަ އަކީ ހިލޭ އެހީ ކަމަށެވެ.
މީގެ އިތުރުން ކޮވިޑް-19 އާއި ގުޅިގެން އިންޑިއާ، ޖަޕާން، އެމެރިކާ، ޗައިނާ، ޔުނިސެފް، ޔޫރަޕިއަން ޔޫނިއަން އަދި ބަންގުލަދޭޝުން އެހީތެރިވެފައިވާ ކަމަށް މިނިސްޓަރ އަމީރު ވިދާޅުވި އެވެ.
