އިތުރު ދުވަސްތަކެއް ކަރަންޓީންގައި ތިބެންޖެހޭ މައްސަލަ ހައްލުކުރުމަށް ދަނީ މަސައްކަތް ކުރަމުން: މަބްރޫކް
ސާމްޕަލް ނެނުގި ތިބި ބަޔަކުވެސް ތިބެދާނެ
ކޮވިޑް-19ގެ އެންމެފަހުގެ މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި، ކޮވިޑް-19 ޓާސްކްފޯހުގެ ތަރުޖަމާނު މަބްރޫކު ޢަޒީޒް
ކޮވިޑް-19ށް ސާމްޕަލް ނެގުމުގެ ޕްރޮސަސްގައި ލަސްތަކެއް ހުރުމާ ގުޅިގެން ކަރަންޓީންގައި ތިބޭ މީހުން އިތުރު ދުވަސްތަކެއް ކަރަންޓީންގައި ތިބެންޖެހޭ ކަމަށާއި، މި މައްސަލަ ޙައްލުކުރުމަށް މަސައްކަތް ކުރަމުންދާ ކަމަށް ކޮވިޑް-19 ޓާސްކްފޯހުގެ ތަރުޖަމާނު މަބްރޫކު ޢަޒީޒް ވިދާޅުވެއްޖެ އެވެ.
ހޮނިހިރު ދުވަހުގެ ރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ކަރަންޓީން ކުރެވިފައި ތިބި ބައެއް މީހުންގެ ސާމްޕަލް ނެގުނުއިރު 21 ދުވަސް ވެފައިވާ ކަމަށާއި، ފަހަރުގައި ސާމްޕަލް ނުނެގި ތިބި ބަޔަކު ތިބެދާނެ ކަމަށެވެ.
މަބްރޫކް ވިދާޅުވީ މިހާރު ކުރިއަށްދާ ޕްރޮސަސްގެ ތެރެއިން ސާމްޕަލްތައް ނެގުމުގެ މަސައްކަތް ކުރިއަށް ގެންދާނެ ކަމަށާއި، އަބަދުވެސް މިޕްރޮސަސްގައި ލަސްތައް ހުންނަ ކަމަށެވެ. ނަމަވެސް މި މަމަސައްކަތް އިތުރަށް ހަރަދުނާ ކުރުމަށް މަސައްކަތް ކުރަމުންދާކަން މަބްރޫކް ފާހަގަކުރެއްވި އެވެ.
މަބްރޫކް ވިދާޅުވީ ކަރަންޓީން ފެސިލިޓީތަކުގެ ތިބޭ މީހުންގެ ޞިއްޙީ ކަންކަން ބެލުމަށް ކޮންމެ ދުވަހަކު ވެސް ނަރުހުން ޒިޔާރަތްކޮށް ބަލަން ޖެހޭ ކަންކަން ބަލާނެ ކަމަށެވެ. މަބްރޫކް ވިދާޅުވީ މެޑިކަލް ފެސިލިޓީއަށް ފުރަތަމަ ގެންދާއިރު ޑޮކްޓަރުން ޗެކް ކުރާނެ ކަމަށާއި، ދޫކޮށްލުމުގެ ކުރިން ވެސް ޑޮކްޓަރުން ޗެކްކުރާނެ ކަމަށެވެ. އަދި ވިދާޅުވީ ޙާލަތު ސީރިއަސް ކަމަށް ނަރުހުން ފާހަގަކުރާ ބަލިމީހުންގެ ކަންކަން ޑޮކްޓަރުން ޚާއްޞަ ސަމާލުކަމެއް ދީގެން ބަލަމުންދާ ކަމަށެވެ.
ކޮވިޑް-19ށް ޓެސްޓުކުރާ މީހުންގެ ނަތީޖާ ނުލިބޭ މައްސަލައަށް އަލިއަޅުއްވާލައްވާ މަބްރޫކް ވިދާޅުވީ ކޯލް ސެންޓަރަށް ގުޅާފަ ސާމްޕަލްގެ ނަތީޖާ އެހުމުން އެސާންޕަލްގެ ނަތީޖާއެއް ނުދޭނެ ކަމަށެވެ.
ފެސިލިޓީތަކުގައި ތިބި މީހުންނަށް ޖަވާބު އެރުވުމުގެ އިންތިޒާމުތަކާއި ބެހޭ ގޮތުން މަބްރޫކް ވިދާޅުވީ އެ ނަތީޖާތައް ދޫކުރާނީ ފެސިލިޓީގައި ތިބޭ މެޑިކަލް ޕްރޮފެޝަނަލުންނަށް ކަމަށެވެ. އަދި އެފެސިލިޓީއެއްގައި ތިބޭ ޑޮކްޓަރުންނާއި، ނަރުހުން ސާމްޕަލްގެ ނަތީޖާ ދެމުންދާނެކަން މަބްރޫކް ފާހަގަކުރެއްވި އެވެ.
