ރިސޯޓްތަކުގެ މިއަހަރުގެ ފަހު 6 މަސް ދުވަހުގެ ކުލި ދައްކަންޖެހޭ މުއްދަތު ފަސްކޮށްދީފި
ދަނޑުވެރިކަމަށް ދޫކޮށްފައި ހުރި ރަށްތަކުގެ ވެސް، ކުރިއަށް އޮތް 6 މަހުގެ ބިމު ކުލި، ދައްކަންޖެހޭ މުއްދަތު ފަސްކޮށްދިނުމަށް ވަނީ ނިންމާފައި
ރާއްޖޭގެ ރިސޯޓެއް- ކޮވިޑް-19 ގެ ސަބަބުން ފަތުރުވެރިކަމަށް އަންނަނީ ބޮޑެތި ގެއްލުންތަކެއް ވަމުން
ރިސޯޓްތަކުގެ މިއަހަރުގެ ފަހު ހަ މަސްދުވަހުގެ ބިމު ކުލި ދައްކަންޖެހޭ މުއްދަތު ފަސްކޮށްދިނުމަށް ނިންމާފައިވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެ އެވެ.
ކޮވިޑް-19 އާ ގުޅޭގޮތުން ބުދަ ދުވަހުގެ ރޭ ގައުމާ މުޚާތަބު ކުރައްވަމުން ރައީސުލްޖުމްހޫރިއްޔާ ވިދާޅުވީ ކޮވިޑް-19 ގެ ދަތިކަމުން އަރައިގަނެ، ފަތުރުވެރިކަން އަލުން ފެށިގެންދާއިރު ރިސޯޓްތަކަށް ލުއިފަސޭހަ ގޮތްތަކެއް ހޯދައިދޭންޖެހޭ ކަމަށް ދެކިވަޑައިގަންނަވާ ކަމަށެވެ. އެއާއެކު ފަތުރުވެރިކަމުގެ ދާއިރާއަށް ރިސޯޓް ކުލި ދެއްކުމަށް ލުއި ތަކެއް ދެއްވުމަށް ނިންމެވިއިރު އަލުން ފަތުރުވެރިކަން ހުޅުވާލުމަށް ސަރުކާރުން މިހާރު މަސައްކަތް ކުރައްވަމުން ގެންދަވަނީ ޖުލައި މަހުގެ ތެރޭގައެވެ.
ފަތުރުވެރިކަމުގެ ދާއިރާގެ އިތުރުން ދަނޑުވެރިކަމަށް ދޫކޮށްފައި ހުރި ރަށްތަކުގެވެސް ކުރިޔަށް އޮތް ހަ މަސް ދުވަހުގެ ބިމު ކުލި ދައްކަންޖެހޭ މުއްދަތު ފަސްކޮށްދިނުމަށް ސަރުކާރުން މިހާރު ވަނީ ނިންމާފައިވާ ކަމަށް ރައީސް ވިދާޅުވި އެވެ.
ކޮވިޑް 19 ފެތުރުނަ ނުދިނުމަށް އަޅާފައިވާ ފިޔަވަޅުތަކާ މެދު، ހިތްހަމަނުޖެހޭ ބަޔަކު ވެސް ތިބެދާނެ ކަމަށް ރައީސް ވިދާޅުވި އެވެ. ނަމަވެސް އެ ފިޔަވަޅުތައް އަޅަން ޖެހުނީ، އެންމެންގެ ރައްކާތެރި ކަމަށްޓަކައި ކަމަށް ރައީސް ވިދާޅުވި އެވެ. ދުނިޔޭގެ އެހެން ޤައުމުތަކަށް މި ބަލި އެތެރެވިތާ ކުރީކޮޅު އެފަދަ ފިޔަވަޅުތައް ނޭޅުމުގެ ސަބަބުން، މިހާރު އެ ޤައުމުތައް އުފުލަމުންދާ އުނދަގޫތައް އެންމެންނަށްވެސް ފެންނަމުންދާ ކަމަށް ރައީސް ވިދާޅުވި އެވެ.
ރައީސް ވިދާޅުވީ ރާއްޖޭގައި ކޮވިޑް-19 ފެތުރެން ފެށިތާ އެންމެ ދޮޅު މަސްވެސް ނުވަނީސް، މިކަމުން އަރައިގަތުމުގެ ވާހަކަ، މާތް الله ގެ ވާގިފުޅާއެކު މި ދެކެވެނީ، ދުރާލައި މިފިޔަވަޅުތައް އެޅުމުގެ ސަބަބުން ކަމަށެވެ. އެހެން ނޫން ނަމަ، އަޅުގަނޑުމެންވެސް މިއަދު ތަޖުރިބާކުރަމުން ދާނީ، ޞިއްޙީ ތަޖުރިބާކާރުން އަންދާޒާކުރެއްވި އެންމެ ނުރައްކާތެރި ޙާލަތު ކަމަށް ރައީސް ވިދާޅުވި އެވެ.
