ކޮވިޑް-19 އަށް ޕޮޒިޓިވްވެފައި ހުއްޓައި، ފިލި ހަތް މީހުންގެ ތެރެއިން އިތުރު އެކަކު ހޯދާފައިވާ ކަމަށް ނެޝަނަލް އެމަރޖެންސީ އޮޕަރޭޝަން ސެންޓަރ (އެންއީއޯސީ) ގެ ތަރުޖަމާނު މަބްރޫކް އަޒީޒު ވިދާޅުވެއްޖެއެވެ.

އެންއީއޯސީން ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ މި މީހާއަކީ ހޯމަ ދުވަހާ ހަމައަށް ނުފެނި ތިބި ދެ މީހުންގެ ތެރެއިން އެކަކު ކަމަށާއި، އެއީ ކޭސް ނަންބަރު 594 ކަމަށެވެ. މިއީ ޕޮޒިޓިވްވި ފަހުން ފިލި 7 ބިދޭސީންގެ ތެރޭގައި ހިމެނޭ މީހެކެވެ.

މި މީހާއަކީ ބަންގުލަދޭޝް މީހެކެވެ. އޭނާ ބައްޔަށް ޕޮޒިޓިވްވެފައިވަނީ މި މަހުގެ 5 ވަނަ ދުވަހުއެވެ. މަބްރޫކް ވިދާޅުވީ އެމީހާ ފެނުމާއެކު ހޯދަމުންދާ މީހުންގެ ތެރެއިން ނުފެނި ވަނީ އެއްމެ މީހެއް ކަމަށެވެ.

ބާކީ ނުފެނި ހޯދަމުންދާ މީހާގެ ވަނަވަރު އާންމު ނުކުރާތީ އެކަމާއި ގުޅިގެން ނޫސްވެރިއަކު ކުރި ސުވާލަކަށް ޖަވާބު ދެއްވަމުން މަބްރޫކް ވިދާޅުވީމީހާގެ ވަނަވަރު އާންމުކުރަން އޮންނަ ގޮތަކީ ފުލުހުންނަށް އެންގުމަށްފަހު ފުލުހުންނަށް އޭނާ ނުފެނުނުކަމަށް ޑިކްލެއަރ ކުރުމުން ދެން ޑިރެކްޓަރ ޖެނެރަލް އޮފް ޕަބްލިކް ހެލްތް އެ މައުލޫމާތު އާންމު ކުރައްވާ ގޮތަށް ކަމަށެވެ. ނަމަވެސް މިހާ ހިސާބަށް އައި އިރު އެކަކު ހޯދިފައިވާ ކަމަށާއި، ދެން ހުރި މީހާ ވެސް ހޯދޭނެކަމަށް ބެލެވޭ ކަމަށެވެ. އެހެންނަމަވެސް އެމީހާ ނުހޯދިއްޖެނަމަ އެމީހާގެ މައުލޫމާތު އާންމުކުރައްވާނެ ކަމަށް މަބްރޫކް ވިދާޅުވިއެވެ.