މިހާލަތުން އަވަހަށް އަރަައިގަނެވޭނީ ކެތްތެރިކަން އިސްކޮށްގެން: އިމްރާން
19 މެއި 2020 | އަންގާރަ 09:43އެންމެން އެއްރޫހެއްގައި މަސައްކަތް ކުރަން ޖެހޭ
މިހާލަތުގައި ވެސް ބައެއް މީހުން ގައުމު ހަލޮބޮލި ކުރުމަށް މަސައްކަތް ކުރާ ކަމަށް ހޯމް މިނިސްޓަރު ޝައިޚް އިމްރާން ޢަބްދުﷲ ވިދާޅުވެފައިވޭ
ރާއްޖެއަށް ކުރިމަތިވެފައިވާ ކޮވިޑް-19ގެ ނުރައްކާތެރިކަމުން އަވަހަށް އަރައިގަނެވޭނީ ރައްޔިތުން ކެތްތެރިކަން އިސްކޮށްގެން ކަމަށް ހޯމް މިނިސްޓަރު ޝައިޚް އިމްރާން ޢަބްދުﷲ ވިދާޅުވެއްޖެ އެވެ.
މާލެ ސިޓީން ކޮވިޑް-19ގެ ކޭސްއެއް ފެނުމާ ގުޅިގެން އޭޕްރީލް މަހުގެ 15 ވަނަ ވަނަ ދުވަހު ވަނީ 'ލޮކްޑައުން' ކޮށްފަ އެވެ. މިމަހުގެ 28ގެ ނިޔަލަށް ލޮކްޑައުން ހަމަވާއިރު، މިހާރު ގުނަމުން މިދާ ދެހަފުތާއަކީ އެންމެ ގިނަ ކޭސްތައް ފެންނާނެ ދެހަފުތާ ކަމަށް އެންއޯއީސީގެ ޑޮކްޓަރުންގެ ޓީމުން ވަނީ ބުނެފައެވެ. އެކަމާ ގުޅިގެން މިހާރު ރައްކާތެރިވުމަށް އަޅާ ފިޔަވަޅުތައް އިތުރަށް ވަނީ ހަރުކަށި ކޮށްފަ އެވެ.
އެގޮތުން ގޭބިސީތަކުން ބޭރަށް ނުކުމެ އުޅުން މަނާ ކޮށްފައިވާ މުއްދަތުގައި ފުލުހުން މެދުވެރިކޮށް ޒަރޫރީ ބޭނުންތަކަށް މުދާ ވިއްކާ ފަރާތްތަކަށް ހުއްދަ ދޫކުރުން، 28 މެއި 2020ގެ ނިޔަލަށް، ވަގުތީ ގޮތުން ވަނީ ހުއްޓާލާފަ އެވެ. އަދި ކުރިން ކޮންމެ ގޭބިސީއަކުން ވިޔަފާރި ކުރުމަށް ކޮންމެ ތިން ދުވަހަކުން އެއް ދުވަހު ލިބޭ ހުއްދަ މިހާރު ދޫކުރަން ހަމަޖެހިފައި ވަނީ ހަފުތާއަކު އެންމެ ދުވަހަކު އެވެ. މީގެ އިތުރުން ސިނަމާލެ ބްރިޖު ދަންވަރު 1:00ން ހެނދުނު 9:00ށް ބަންދު ކުރުމަށް ވެސް ވަނީ ނިންމާފަ އެވެ.
ރާއްޖޭގެ ޙާލާތާ ބެހޭ ގޮތުން މިނިސްޓަރު އިމްރާން ވިދާޅުވީ މި ޙާލަތުން އަވަހަށް އަރައިގަނެވޭނީ ހުރިހާ ރައްޔިތުން ކެތްތެރިކަން އިސްކޮށްގެން ކަމަށާއި، އެއް ރޫޙެއްގައި އެކުގައި މަސައްކަތް ކޮށްގެން ކަމަށެވެ.
މި ޙާލަތުގައި ދަތިތައް ކުރިމަތިވި ނަމަވެސް ރައްޔިތުންގެ އެއްބާރުލުން ދިނުމަށް މިނިސްޓަރު އެދިވަޑައިގެންނެވި އެވެ.
އެއް ރޫޙެއްގައި މަސައްކަތް ކުރުމަށް މިނިސްޓަރު އިމްރާން ގޮވާލައްވާފައި ވާއިރު، މިދަނޑިވަޅުގެ ނާޖާއިޒު ފަދާ ނަގާ ޤައުމު ހަލޮބޮލި ކުރަން އުޅުނު ކޭސްއެއް ފުލުހުން ވަނީ ހުއްޓުވާފަ އެވެ. ކޮވިޑް-19ގެ މަސައްކަތުގައި މުޅި ޤައުމު މަސައްކަތް ކުރި ނަމަވެސް ދަނޑިވަޅުގެ ފައިދާ ނެގުމުގެ ފުރުޞަތު ނުދެއްވާނެ ކަމުގެ ޔަޤީންކަން މިނިސްޓަރު ވަނީ ދެއްވާފަ އެވެ.
