‎ސްކޮޓްލެންޑް ލީގު ކެންސަލް ކޮށް، ޗެމްޕިއަންކަން ސެލްޓިކަށް ދީފި

ސްކޮޓްލެންޑްގެ ފުރަތަމަ ޑިވިޝަން ކަމަށްވާ ސްކޮޓިޝް ޕްރިމިއާޝިޕް ކެންސަލް ކޮށް، އެއްވަނައިގައި އޮތް ސެލްޓިކަށް ޗެމްޕިއަންކަން ދޭން ނިންމައިފި އެވެ.

ކޮރޯނާވައިރަސް (ކޮވިޑް-19) އާ ގުޅިގެން ސްކޮޓްލެންޑްގައި ވަނީ ޖޫން މަހުގެ 10 ވަނަ ދުވަހުގެ ކުރިން ކުޅިވަރު ހަރަކާތްތައް ބޭއްވުން މަނާ ކޮށްފައެވެ. ސްކޮޓްލެންޑް ލީގު މެދުކަނޑާލީ މާޗުމަހުގެ 13 ވަނަ ދުވަހު އެވެ.

ލީގުތަކާ މެދު އަމަލުކުރާނެ ގޮތެއް މިމަހުގެ 25 ގެ ކުރިން އަންގަން ޔުއެފާ އިން އެދިފައިވާއިރު، ސްކޮޓްލެންޑް ލީގު ކެންސަލް ކުރަން ސްކޮޓިޝް ޕްރޮފެޝަނަލް ފުޓްބޯލް ލީގު (އެސްޕީއެފްއެލް) ގެބޯޑުން ނިންމީ ހޯމަ ދުވަހު ލީގުގެ 12 ކްލަބާއެކު ބޭއްވި ބައްދަލުވުމުގައެވެ. މި ބައްދަލުވުމުގައި 12 ކްލަބުން ވެސް ވަނީ ލީގު ކެންސަލް ކުރަން ތާއީދު ކޮށްފައެވެ.

ލީގު ޗެމްޕިއަންކަން ސެލްޓިކަށް ދިންއިރު، ލީގުގެ އެއްވަނައިގައި އެޓީމު އޮތީ 13 ޕޮއިންޓުގެ ލީޑަކާ އެކުއެވެ. ދެވަނައިގައި އޮތީ ރޭންޖާސް އެވެ. މީގެ އިތުރުން ހޯމަ ދުވަހު އޮތް ބައްދަލުވުމުގައިވަނީ ތާވަލުގެ ފުލުގައި އޮތް ހާޓްސް ދެވަނަ ޑިވިޝަނަށް ރެލިގޭޓް ކުރަން ނިންމާފައެވެ.

ސްކޮޓްލެންޑްގެ ފުރަތަމަ ޑިވިޝަން ކަމަށްވާ ސްކޮޓިޝް ޕްރިމިއާޝިޕް ކެންސަލް ކުރިއިރު، މީގެ ކުރިން ވަނީ ސްކޮޓްލެންޑްގެ ދަށް ޑިވިޝިންތަކުގެ ލީގުތައް ކެންސަލް ކޮށްފައެވެ. ދަށްޑިވިޝަންތަކުގެ ލީގުތައް ކެންސަލް ކުރީ ސްކޮޓްލެންޑްގެ 42 ކްލަބުގެ ވޯޓުގެ 81 އިންސައްތަ ލިބުމުންނެވެ.

ސްކޮޓްލެންޑް ލީގަކީ ކޮވިޑް-19 އާ ގުޅިގެން ޔޫރަޕުން ކެންސަލް ކުރި ހަތަރުވަނަ ލީގެވެ. މީގެ ކުރިން ބެލްޖިއަމް ލީގު ވަނީ ކެންސަލް ކޮށް، އެއްވަނައިގައި އޮތް ކްލަބު ބްރޫޖަށް ޗެމްޕިއަންކަންދީފައެވެ. އަދި ފްރެންޗު ލީގުވެސް ވަނީ ކެންސަލް ކޮށް ޕީއެސްޖީ އަށް ޗެމްޕިއަންކަން ދީފައެވެ. އެކަމަކު ނެދަލެންޑްސް ލީގު ކެންސަލް ކުރީ ޗެމްޕިއަނެއް ކަނޑަނާޅައެވެ.