ބަންގްލަދޭޝް ޕްރިމިއާ ލީގު ކެންސަލް ކޮށްފި

ކޮރޯނާވައިރަސް (ކޮވިޑް-19) ގުޅިގެން މެދުކަނޑާލާފައިވާ ބަންގްލަދޭޝް ޕްރިމިއާ ލީގު ކެންސަލް ކުރަން އެ ގައުމުގެ ފުޓްބޯޅަ ފެޑެރޭޝަނުން ނިންމައިފި އެވެ.

ފެބްރުއަރީ މަހުގެ 13 ވަނަ ދުވަހު ފެށި ބަންގްލަދޭޝް ލީގު މެދުކަނޑާލީ މާޗު މަހުގެ 16 ވަނަ ދުވަހު އެވެ. ލީގު މެދުކނޑާލިއިރު، އެއްވަނައިގައި އޮތް ޑާކާ އަބަހާނީ ލިމިޓެޑާއި ދެވަނައިގައި އޮތް ޗިޓަގޮންގް އަބަހާނީ ލިމިޓެޑަށް ކުޅުނު ހަ މެޗުން ލިބިފައިވަނީ 13 ޕޮއިންޓެވެ.

މީގެ ކުރިން ބަންގްލަދޭޝްގެ ކްލަބުތަކުންވެސް ވަނީ ލީގު ކެންސަލް ކުރަން ގޮވާލާފައެވެ. ލީގު ކެންސަލް ކުރަން ބަންގްލަދޭޝް ފުޓްބޯލް ފެޑެރޭޝަނުން ނިންމީ އާދީއްތަ ދުވަހު ބޭއްވި އެ އިދާރާގެ ހިންގާ ކޮމިޓީގެ ބައްދަލުވުމުގައެވެ.

ބަންގްލަދޭޝް ފުޓްބޯލް ފެޑެރޭޝަނުގެ ރައީސް ކަޒީ ސަލާހުއްދީން ވިދާޅުވީ ކޮވިޑް-19 އާ ގުޅިގެން ލީގު ކުރިއަށް ގެންދިޔުމުގެ ފުރުސަތެއް ނެތް ކަމަށާއި އެހެންކަމުން ލީގު ކެންސަލް ކޮށްފައިވާ ކަމަށެވެ. އަދި ލީގު ކެންސަލް ކުރަން ނިންމީ އެއްވެސް ޓީމެއް ދެވަނަ ޑިވިޝަނަށް ރެލިގޭޓްނުވާ ގޮތަށް ކަމަށްވެސް ވަނީ ވިދާޅުވެފައެވެ.

ބަންގްލަދޭޝް ޕްރިމިއާ ލީގު ކެންސަލް ކުރިއިރު، ބަންގްލަދޭޝް ފުޓްބޯލް ފެޑެރޭޝަނުން ވަނީ މިއަހަރު ބޭއްވުމަށް ތާވަލު ކޮށްފައި އޮތް އިންޑިޕެންޑެންސް ކަޕް ވެސް ކެންސަލް ކޮށްފައެވެ.

ކޮވިޑް-19 ގެ އަސަރު ބަންގްލަދޭޝް އަށްވެސް ކޮށްފައިވާއިރު، މިހާތަނަށް އެ ގައުމުން މި ވައިރަހަށް 22،268 މީހަކު ވަނީ ޕޮޒިޓިވް ވެފައެވެ. އަދި މި ވައިރަސް ޖެހިގެން ބަންގްލަދޭޝް އިން 328 މީހަކު މަރުވެފައިވާއިރު، 4،373 މީހަކު ވަނީ ވައިރަހުން ރަނގަޅު ވެފައެވެ.