ޕާމާގެ ދެ ކުޅުންތެރިއަކު ކޮރޯނާވައިރަހަށް ޕޮޒިޓިވްވެ އައިސޮލޭޝަނަށް

އިޓާލިއަން ލީގުގައި ވާދަކުރަމުން އަންނަ ޕާމާގެ ދެ ކުޅުންތެރިއަކު ކޮރޯނާވައިރަސް (ކޮވިޑް-19) އަށް ޕޮޒިޓިވް ވެއްޖެ އެވެ.

ޖޫން މަހުގެ 13 ވަނަ ދުވަހު އިޓާލިއަން ލީގު އަލުން ފަށަން ކްލަބުތަކުން މީގެ ކުރިން ރުހުން ދީފައިވާއިރު، އިޓަލީގެ ސަރުކާރުން ވަނީ ހޯމަ ދުވަހުން ފެށިގެން ކުޅުންތެރިން އެކުގައި ތަމްރީނުތައް ހެދުމުގެ ހުއްދަ ދީފައެވެ. އެކަން ހޮނިހިރު ދުވަހު އިޓަލީގެ ބޮޑު ވަޒީރު ޖިސެއްޕޭ ކޮންޓޭ ވަނީ އިއުލާން ކުރައްވާފައެވެ.

ލީގު އަލުން ފަށަން ތައްޔާރުވަމުންދާތީ، ޕާމާގެ ހުރިހާ ކުޅުންތެރިންނާއި އޮފިޝަލުން ވަނީ ކޮވިޑް-19 އަށް ޓެސްޓު ކޮށްފައެވެ. އެގޮތުން އެންމެ ފުރަތަމަ ކުރި ޓެސްޓުން ޕާމާގެ ދެ ކުޅުންތެރިއަކު ކޮވިޑް-19 އަށް ޕޮޒިޓިވް ވުމާއެކު އެ ދެ ކުޅުންތެރިން ވަނީ އައިސޮލޭޝަނަށް ބަދަލު ކޮށްފައެވެ.

ޕާމާ އިން ނެރުނު ބަޔާނެއްގައި ބުނީ އެ ދެ ކުޅުންތެރިންގެ ފުރަތަމަ ޓެސްޓު ޕޮޒިޓިވްވި ނަމަވެސް، ދެވަނަ އަށް ހެދި ޓެސްޓު ނެގެޓިވް ވެފައިވާ ކަމަށެވެ. އެ ކުޅުންތެރިންގެ ހަށިގަނޑުން ވައިރަހުގެ އަލާމާތެއް ނުފެނުނު ނަމަވެސް، އިތުރަށް ބަލަން ހުރި ކަންތައްތައް ބެލުމަށް އެ ދެ ކުޅުންތެރިން މިހާރު އައިސޮލޭޝަނަށް ބަދަލުކޮށްފައިވާ ކަމަށްވެސް ވަނީ ބުނެފައެވެ. މި ބަޔާނުގައި އިތުރަށް ބުނެފައިވަނީ އެ ކްލަބުގެ ދެ ކުޅުންތެރިއަކު ކޮވިޑް-19 އަށް ޕޮޒިޓިވްވި ނަމަވެސް، އެހެން ހުރިހާ ކުޅުންތެރިންނާއި އޮފިޝަލުން ވައިރަހަށް ނެގެޓިވް ވެފައިވާ ކަމަށެވެ.

ޕާމާގެ ދެ ކުޅުންތެރިއަކު ކޮވިޑް-19 އަށް ޕޮޒިޓިވް ވިއިރު، މީގެ ކުރިން ސަމްޕްޑޯރިއާގެ ހަތަރު ކުޅުންތެރިއަކާއި ޓޮރީނޯގެ ކުޅުންތެރިއެއްގެ އިތުރުން ފިއޮރެންޓީނާގެ ތިން ކުޅުންތެރިއަކު ވަނީ ކޮވިޑް-19 އަށް ޕޮޒިޓިވްވެފައެވެ.

ޖޫން މަހުގެ 13 ވަނަ ދުވަހު އިޓާލިއަން ލީގު ފަށަން ގިނަ ކްލަބުތަކުން ރުހުން ދީފައިވީ ނަމަވެސް، ލީގު އަލުން ފަށާނެ ތާރިޚެއް ފައިނަލް ކުރާނީ އިޓަލީގެ ސަރުކާރުން ރުހުން ދިނުމުންނެވެ.