ބެސިކްޓަސްގެ ޗެއާމަން ކޮރޯނާވައިރަހަށް ޕޮޒިޓިވް ވެއްޖެ

ތުރުކީގެ ފުރަތަމަ ޑިވިޝަން ކަމަށްވާ ޓާކިޝް ސުޕަ ލީގުގައި ވާދަކުރަމުން އަންނަ ބެސިކްޓަސްގެ ޗެއާމަން އަހުމަދު ނޫރު ޖެބީ ނޮވެލް ކޮރޯނާވައިރަސް (ކޮވިޑް-19) ށް ޕޮޒިޓިވް ވެއްޖެ އެވެ.

މިދިޔަ 24 ގަޑީއިރުގެ ތެރޭގައި ތުރުކީ ލީގުގެ ތިން ޓީމަކުން ވަނީ ކޮވިޑް-19ށް ޕޮޒިޓިވް ކޭސްތަކެއް ފެނިފައެވެ. އެއީ ބެސިކްޓަސް އާއި ކަސިމްޕާސަ އަދި އޭޒުރުމްސްޕޯ އިންނެވެ.

އެގޮތުން ބެސިކްޓަސް އިން 8 ޕޮޒިޓިވް ކޭސް ފެނުނު އިރު، އޭގެ ތެރޭގައި އެ ކްލަބުގެ ޗެއަރމަންވެސް ހިމެނެއެވެ. އެއާއެކު ބެސިކްޓަސް އިން ވަނީ އެ ކްލަބުގެ ފަރިތަކުރުންތައް މެދުކަނޑާލާ ފައެވެ.

މީގެ އިތުރުން ކަސިމްޕަސާ އިން މިހާތަނަށް ދެ ކުޅުންތެރިއަކު ކޮވިޑް-19ށް ޕޮޒިޓިވްވެފައި ވާއިރު، އޭޒުރުމްސްޕޯގެ ހަތަރު ކުޅުންތެރިއަކު ވެސް ވަނީ ވައިރަހަށް ޕޮޒިޓިވް ވެފައެވެ.

ތުރުކީ ލީގުން ކޮވިޑް-19ގެ ގިނަ ޕޮޒިޓިވް ކޭސްތަކެއް ފެނުނުއިރު، ޖޫން މަހުގެ 12 ވަނަ ދުވަހު ލީގު އަލުން ފަށަން ވަނީ ނިންމާފައެވެ. ކޮވިޑް-19 އާ ގުޅިގެން ތުރުކީ ލީގު މެދުކަނޑާލާފައި ވަނީ މާރޗު މަހުގެ 18 ވަނަ ދުވަހެވެ.

ޖޫން މަހުގެ 12 ވަނަ ދުވަހު ތުރުކީ ލީގު އަލުން ފެށުމަށް ނިންމާފައި ވާއިރު، އެ ގައުމުގެ ދަށް ޑިވިޝަނުގެ ލީގުތައް ވެސް ޖޫން މަހު ފެށުމަށް ވަނީ ނިންމާފައެވެ.