އިތުރު ހަ މީހެއްގެ ބަލި ފަސޭހަވެ، ޖުމްލަ އަދަދު 46ށް
14 މެއި 2020 | ބުރާސްފަތި 17:55ރަނގަޅުވި މީހުންގެ ތެރޭގައި ހިމެނެނީ 1 އަންހެނަކާއި 5 ފިރިހެނުން
މާލޭގައި ރޭންޑަމް ސާމްޕަލް ނެގުން: މަގުމަތިން މީހެއްގެ ސާމްޕަލް ނަގަނީ
ރާއްޖޭގައި ކޮވިޑް-19 ޖެހުނު މީހުންގެ ތެރެއިން އިތުރު 6 މީހަކު ރަނގަޅުވެފައިވާ ކަމަށް ނެޝަނަލް އެމަރޖެންސީ އޮޕަރޭޝަން ސެންޓަރު (އެންއީއޯސީ) އިން ހާމަކޮށްފި އެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ސެންޓަރުގެ ތަރުޖަމާނު މަބްރޫކް އަޒީޒު ވިދާޅުވީ 6 މީހަކު ބަލިން ފަސޭހަވެފައިވާ ކަމަށާއި، މި 6 މީހުންނަކީ ވެސް ދިވެހިންނެވެ. ރަނގަޅުވި މީހުންގެ ތެރޭގައި ހިމެނެނީ 1 އަންހެނަކާއި 5 ފިރިހެނުންނެވެ.
މިހާތަނަށް ރާއްޖޭގައި 46 މީހަކު ވަނީ ބަލިން ރަނގަޅުވެފައެވެ. އަދި މީގެ ތެރޭގައި ގިނައީ ދިވެހިންނެވެ. އަދި މި އަދަދުގެ ތެރޭގައި ރާއްޖޭގެ ރިސޯޓްތަކުން މި ބަލި ފެނުނުއިރު ފާހަގަކުރެވުނު ބިދޭސީން ވެސް ހިމެނެ އެވެ. މިހާރު ރިކަވަރނުވެ ހުރި ކޭސްތަކުގެ ތެރޭގައި ގިނައީ މާލެ ސިޓީއިން ކޮމިއުނިޓީ ޓްރާންސްމިޝަން ދެނެގަނެވުނު ފަހުން ފެންމަތިވެފައިވާ ކޭސްތަކެވެ.
ރާއްޖޭގައި މީހުން ރިކަވަރވާން ނަގާ ދުވަސްތައް ހީކުރި ވަރަށްވުރެ، އިތުރު ކަމަށް އެޗްޕީއޭ އިން ވަނީ ހާމަކޮށްފަ އެވެ. އަދި މިއީ ކީއްވެގެންކަން ދެނެގަންނަން މަސައްކަތްކުރާއިރު، ރާއްޖެއިން މިހާތަނަށް ރިކަވަރވެފައިވާ ފަރާތްތައް ބަލިން ފަސޭހަވެފައިވަނީ އެވަރެޖްކޮށް 17 ދުވަހުގެ ތެރޭގައި އެވެ.
