އޮސްޓްރިއާ ލީގު ޖޫން މަހުގެ ދެވަނަ ދުވަހު ފަށަން ނިންމައިފި
14 މެއި 2020 | ބުރާސްފަތި 14:43ލީގު އަލުން ފަށާނީ ދަނޑަށް ސަޕޯޓަރުން ނުވައްދައި މެޗުތައް ކުޅޭ ގޮތަށް
އޮސްޓްރިއާ ލީގުގެ މެޗެއްގެ ތެރެއިން: ޖޫން މަހުގެ ދެވަނަ ދުވަހު ލީގު އަލުން ފަށަން ވަނީ ނިންމާފައި
މެދުކަނޑާލާފައިވާ އޮސްޓްރިއާ ލީގު ޖޫން މަހުގެ ދެވަނަ ދުވަހު ފަށަން ނިންމައިފި އެވެ.
ކޮރޯނާވައިރަސް (ކޮވިޑް-19) އާ ގުޅިގެން މީ ދެ މަސް ކުރިން އޮސްޓްރިއާ ލީގު މެދުކަނޑާލިއިރު، ބުދަ ދުވަހު އޮސްޓްރިއަން ފުޓްބޯލް ލީގުން ވަނީ ޖޫން މަހުގެ ދެވަނަ ދުވަހު ލީގު އަލުން ފަށާނެކަން އިއުލާން ކޮށްފަ އެވެ.
އޮސްޓްރިއަން ފުޓްބޯލް ލީގުގެ ރައީސް ކްރިސްޓިއަން އީބެންބައުއާ ވިދާޅުވީ ލީގު އަލުން ފެށުމަން ނިންމުމަކީ ލިބުނު ބޮޑު ކުރިއެރުމެއް ކަމަށެވެ. އަދި ލީގު އަލުން ފަށާއިރު، ލީގު ކުރިއަށްދާނީ ދަނޑަށް ސަޕޯޓަރުން ނުވައްދައި މެޗުތައް ކުޅޭ ގޮތަށް ކަމަށްވެސް ވިދާޅުވި އެވެ.
ޖޫން މަހުގެ ދެވަނަ ދުވަހު އޮސްޓްރިއާ ލީގު އަލުން ފަށާއިރު، ޖުލައި މަހުގެ ފުރަތަމަ ހަފުތާގައި ލީގުގެ މެޗުތައް ނިންމުމަށް ވަނީ ތާވަލު ކޮށްފަ އެވެ.
ޖޫން މަހުގެ ދެވަނަ ދުވަހު އޮސްޓްރިއާ ލީގު އަލުން ފެށުމަށް ނިންމިއިރު، ޔޫރަޕުން މިހާތަނަށް ލީގުތައް އަލުން ފަށަން ނިންމާފައި ވަނީ ޖަރުމަން ލީގާއި، ޕޯޗުގަލް ލީގާއި، ޑެންމާކް ލީގުގެ އިތުރުން ތުރުކީ ލީގުންނެވެ.
މީގެ އިތުރުން އިނގިރޭސި ޕްރިމިއާ ލީގު ޖޫން މަހު އަލުން ފެށުމުގެ ހުއްދަ އިނގިރޭސިވިލާތުގެ ސަރުކާރުން ދީފައިވާއިރު، ސްޕެނިޝް ލީގާއި އިޓާލިއަން ވެސް ޖޫން މަހު ފަށަން އަންނަނީ މަސައްކަތް ކުރަމުންނެވެ. އަދި ޖޫން މަހުގެ ހަވަނަ ދުވަހު ކްރޮއޭޝިއާ ލީގު ފަށަންވެސް އަންނަނީ މަސައްކަތް ކުރަމުންނެވެ.
