ރައްޔިތުންގެ ރައްކާތެރިކަން ކަށަވަރު ކުރެވޭ ވަރަށް ސިފައިން އެބަތިބި: މިނިސްޓަރު މާރިޔާ
ސިފައިންގެ އަދަދުތައް ހާމަނުކުރަނީ އެއީ ސަލާމަތީ ސަބަބުތަކަށްޓަކައި
ހުޅުމާލޭގައި ހަދަމުންދާ މެޑިކަލް ފެސިލިޓީގެ މަސައްކަތް ބައްލަވާލެއްވުމަށް މިނިސްޓަރު މާރިޔާ އެތަނަށް ކުރެއްވި ޒިޔާރަތުގެ ތެރެއިން
ސިފައިންގެ ތެރެއިން އޮފިސަރުންތަކެއް ކޮވިޑް-19 އަށް ޕޮޒިޓިވްވިޔަސް، ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރެވޭ ވަރަށް ސިފައިން އެބަތިބި ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެ އެވެ.
މިހާތަނަށް 40 އަށް ވުރެ ގިނަ ސިފައިން ކޮވިޑް-19 އަށް ޕޮޒިޓިވްވެފައިވާއިރު، ޑިފެންސް މިނިސްޓަރު ވިދާޅުވީ، ސިފައިންނާ ގުޅުވައި އެކި ކަހަލަ ވާހަކަތައް ދައްކަމުންދާ ކަމަށެވެ. އެގޮތުން އެކަހެރި ކޮށްފައިވާ ސިފައިންގެ އަދަދުތަކާއި ބެހޭ ގޮތުންވެސް ވާހަކަތައް ދެކެވެމުންދާ ކަމަށެވެ. މިނިސްޓަރު ވިދާޅުވީ، ސިފައިންގެ އަދަދުތައް ހާމަނުކުރަނީ އެއީ ސަލާމަތީ ސަބަބުތަކަށްޓަކައި ކަމަށާއި، އެއްވެސް ވަރަކަށް މައުލޫމާތު ފޮރުވުމުގެ ބޭނުމުގައެއް ނޫން ކަމަށެވެ.
ރައްޔިތުން ސަލާމަތްކޮށް ރައްކާތެރި ކުރުމަށް އެކަށީގެންވާ ސިފައިން އެބަތިބިކަން ފާހަގަ ކުރައްވާ މިނިސްޓަރު މާރިޔާ ވިދާޅުވީ ރާއްޖޭގެ އެކި ސަރަހައްދުތަކުގައި މިހާރުވެސް 1398 ސިފައިން ހަރަކާތްތެރިވަމުން އަންނަކަމަށެވެ. އަދި ހުރިހާ ސިފައިން ވެސް ތިބީ އެލަރޓްގައި ކަމަށާއި، ކޮވިޑް-19 ގެ ސަބަބުން ލޮކްޑައުން އައިސުރެ ސިފައިން ތިބެނީ ހެޑްކުއާޓާގެ ތެރޭގައި އެއްވެސް ކަހަލަ ކަމެއް ދިމާވެއްޖެއްޔާ އެޓެންޑް ކުރެވޭ ގޮތަށް ކޮންޓިޖެންސީ ޕްލޭން ހަދައިގެން ކަމަށެވެ.
