ޑެންމާކް ލީގު މިމަހުގެ 28 ވަނަ ދުވަހު ފަށަން ނިންމައިފި

މެދުކަނޑާލާފައިވާ ޑެންމާކް ސުޕަ ލީގު މިމަހުގެ 28 ވަނަ ދުވަހު ފަށަން ނިންމައިފި އެވެ.

ކޮރޯނާވައިރަސް (ކޮވިޑް-19) އާ ގުޅިގެން ޑެންމާކު ލީގު މެދު ކަނޑާލާފައި ވަނީ މާޗު މަހުގެ ނުވަވަނަ ދުވަހު އެވެ. ލީގު އަލުން ފަށަން ޑެނިޝް ފުޓްބޯލް ޔޫނިއަނުން ނިންމާފައިވަނީ ދަނޑަށް ސަޕޯޓަރުން ނުވައްދައި މެޗުތައް ކުޅޭ ގޮތަށެވެ.

މިމަހުގެ 28 ވަނަ ދުވަހު ލީގުގެ ކުޅުން އަލުން ފެށުމަށް ތާވަލު ކޮށްފައިވަނީ އޭޖީއެފް އާހުސް އާއި ރޭންޑާސް އެފްސީ ބައްދަލުކުރާ މެޗުންނެވެ. ލީގުގެ ކުޅުން ނިންމުމަށް މިހާރު ތާވަލު ކޮށްފައި ވަނީ ޖުލައި މަހުގެ 16 ވަނަ ދުވަހު އެވެ.

ޑެންމާކު ލީގު މެދުކަނޑާލިއިރު، އެފްސީ މިޗީލޭންޑް އެއްވަނައިގައި އޮތީ 12 ޕޮއިންޓުގެ ލީޑަކާއެކު އެވެ. އެޓީމަށް 62 ޕޮއިންޓު ލިބިފައި ވާއިރު، ދެވަނައިގައި އޮތް އެފްސީ ކޯޕެންހޭގަން އަށް ލިބިފައިވަނީ 50 ޕޮއިންޓެވެ.

ޑެންމާކް ލީގު ފަށަން ނިންމިއިރު، ދެން ޔޫރަޕުން ލީގުތައް އަލުން ފަށަން ނިންމާފައި ވަނީ ޖަރުމަން ލީގާއި ތުރުކީ ލީގުންނެވެ. ޖަރުމަން ލީގު މިމަހުގެ 16 ވަނަ ދުވަހު ފަށާއިރު، ތުރުކީ ލީގު ފަށަން ނިންމާފައި ވަނީ ޖޫން މަހުގެ 12 ވަނަ ދުވަހު އެވެ.

އަދި އިނގިރޭސި ޕްރިމިއާ ލީގު ޖޫން މަހު އަލުން ފެށުމުގެ ހުއްދަ އިނގިރޭސިވިލާތުގެ ސަރުކާރުން ދީފައިވާއިރު، ސްޕެނިޝް ލީގާއި އިޓާލިއަން ލީގު ޖޫން މަހު ފަށަން އަންނަނީ މަސައްކަތް ކުރަމުންނެވެ. އޭގެ އިތުރަށް ޖޫން މަހުގެ 6 ވަނަ ދުވަހު ކްރޮއޭޝިއާ ލީގު ފަށަންވެސް އަންނަނީ މަސައްކަތް ކުރަމުންނެވެ.